Kuwaiti foreign minister, kinondena ang pagpatay sa OFW na si Ranara

KINONDENA ng Minister of Foreign Affairs na si  Kuwait Sheikh Salem Abdullah Al-Jaber Al-Sabah ang brutal na pagpatay sa Overseas Filipino Worker na Jullebee Ranara sa Kuwait.

Tinanggap ni Sheikh Salem si Philippine Charge d’ Affaires to Kuwait Jose A. Cabrera III, araw ng Linggo sa  Ministry of Foreign Affairs (MOFA).

Ayon kay Cabrera, hiniling ni Sheikh Salem  sa kanya na  iparating  ang taus-pusong pakikidalamhati sa pamilya at sa gobyerno nng Pilipinas sa brutal at kalunus-lunos na pagkamatay ni Jullebee Ranara.

Kinondena rin ng nasabing opisyal ang pagpatay kay Jullebee Ranara at sinabing ang salarin na naaresto at kasalukuyang nasa kulungan ay parurusahan para sa nasabing karumal-dumal na krimen.

Tinuran pa ni Sheikh Salem na ang ginawa ng salarin ay hindi kailanman sumasalamin sa pagkatao at asal ng Kuwaiti society,  Kuwaiti people, at  Kuwaiti government.

Sa isang kalatas na pinost ng Philippine Embassy sa Kuwait sa  official Facebook page nito,  nagpasalamat si Cabrera para sa kooperasyon at tulong ng mga Kuwaiti authority lalo na sa mabilis na aksyon at pagtugon sa pagtugis at paghuli sa suspek at sa ‘clearances’ para sa shipment ng mga labi ni Ranara.

Sa kalatas pa rin ng embahada, nakasaad dito ang inihayag ni Sheikh Salem na magbibigay ang MOFA sa Philippine Embassy ng lahat ng kakailanganing tulong habang ipinagpapatuloy nito ang pagmonitor sa kaso ni Ranara.

Ipinaalam naman  ni Cabrera kay  Sheikh Salem  na base sa kalatas ni Secretary of Migrant Workers Maria Susana V. Ople,  walang ipatutupad na ‘ban’ sa deployment sa  Kuwait.

Samantala, sa naturang pulong, tinalakay din nina Sheikh Salem at Cabrera ang bilateral relations sa pagitan ng Pilipinas at Kuwait at nagpahayag ng mutual commitment sa mas “closer dialogue and engagement” sa pagiitan ng  dalawang bansa lalo na sa mga darating na buwan.

Nananatili namang naghihintay ang Philippine Embassy  ng official forensic report mula sa mga  Kuwaiti authority. (Daris Jose)