Presidential Adviser for Creative Communication Paul Soriano, 3 opisyal ng Comelec, nanumpa sa tungkulin sa harap ni PBBM

OPISYAL nang nanumpa ngayon sa harap ni Pangulong Ferdinand Marcos Jr. ang direktor at film producer na si Paul Soriano na itinalaga  bilang Presidential Adviser for Creative Communication.

Kasama ni Soriano ang kanyang asawa na si Toni Gonzaga at anak na si Severiano Elliott Gonzaga Soriano.

HIndi naman lingid sa kaalaman ng lahat na lantaran ang ginawang pangangampanya ng mag-asawang Paul Soriano at Toni Gonzaga para sa kandidatura nina Marcos at Duterte.

Si Soriano ang  rin  ang nagsilbing direktor ng mga campaign ads nina Bongbong at Sara habang si Toni naman ang nag-host ng mga campaign rallies ng UniTeam.

Si Soriano ay pamangkin ng misis ni BBM na si Liza Araneta at ninong din ang bagong halal na pangulo ng bansa sa kasal nina Paul at Toni.

Samantala, bukod kay Soriano, nanumpa rin sa kani-kanilang tungkulin sina Commissioner Ernesto Ferdinand P. Maceda, Jr. at Commissioner Nelson Java Celis at Comelec Chairman George Erwin Garcia. (Daris Jose)