Sindikato sa ‘fund parking scheme’ sa DPWH, pinasisilip

PINAIIMBESTIGAHAN ni Senador Alan Peter Cayetano sa Development Budget Coordination Committee (DBCC) ang umano’y sindikatong nasa likod ng illegal realignment ng bilyon-bilyong pondo sa panukalang 2023 budget ng Department of Public Works and Highways (DPWH).

Ayon kay Cayetano, bilang dating Speaker ng Kamara ay nakarating sa kanyang impormasyon na mayroong grupo na nagkokontrol ng alokasyon ng mga proyekto sa iba’t ibang congressional districts.

Subalit ang nakakaalarma umano ay ang posibilidad na ang manipulasyon ng pondo ay nangyayari gamit ang pondo ng DPWH bago pa man ito maisumite sa Kongreso.

Paliwanag pa ni Cayetano na ang “parking” ng mga pondo ay dating ginagawa sa bicameral level at kadalasan ay sa maliitang halaga lang, subalit ngayon ay bilyon-bilyong piso na ang ginagalaw at mas naging laganap pa ito.

Ang nasabing gawain ay binansagan ni Cayetano na “expanded fund parking scheme,” kung saan sadyang babawasan ang badyet ng mga congressional district tsaka iaareglo ang pagbabalik ng naturang pondo kapalit ng pagbibigay ng proyekto sa mga piling contractor.

“Ang sumbong sa akin ay binabawasan daw ang budget ng mga distrito, tapos kakausapin nila ang congressman doon na pwede nilang ibalik ang pondo pero sila ang mamimili ng project at contractor nila ang gagawa nito. Hulidap ang tawag dito,” wika pa ng senador.

Idinagdag pa niya na binawasan sa ‘di-malamang dahilan ang pondo ng ilang mga distrito sa 2023 National Expenditure Program (NEP), kung saan naglalaro ang kabawasan mula 21.41 porsyento hanggang 93.12 porsyento.

Nanawagan din siya kay Finance Secretary Benjamin Diokno, bilang pinuno ng DBCC, na imbestigahan ang nasabing usapin at alamin ang katotohanan sa alegasyon na may sindikato sa DPWH na siyang iligal na nagpa-park ng pondo.