PDu30, humingi ng paumanhin sa publiko

HUMINGI ng  paumanhin si Pangulong  Rodrigo Roa  Duterte sa publiko sa kanyang naunang desisyon na payagan ang e-sabong operations sa kabila ng mga ulat na lumulubog sa utang ang mga mananaya at dahilan ng pagdukot sa mga sabungero.

Gaya ng kanyang mga nasabi sa mga nauna niyang talumpati, tinukoy ni Pangulong Duterte ang daang-bilyong piso na kinikita ng pamahalaan mula sa online cockfighting.

“On e-sabong, I am sorry, I realized it late,” ayon sa Pangulo sa kanyang talumpati matapos inspeksyunin ang main campus ng National Academy of Sports na matatagpuan sa New Clark City sa Capas, Tarlac.

“It was at P600 million a month, billions in a year because there are a lot of operations. I am very sorry it had to happen,” dagdag na pahayag nito.

Matatandaang buwan ng Mayo nang ipatigil ni Pangulong Duterte ang operasyon ng  e-sabong.

Sinang-ayunan ng Chief Executive  ang rekomendasyon ni Interior Secretary Eduardo Año kaugnay sa social cost na dulot ng e-sabong.

Subalit bago pa ito, buwan ng Marso at Abril nang  todo-depensa ang Pangulo sa operasyon ng e-sabong  sa katuwirang nakatutulong ito sa gobyerno sa gitna ng ulat na ilang sabungero na ang nawawala.

Samantala, hanggang sa kasalukuyan ay hindi pa rin nareresolba ang  kaso ng mga nawawalang sabungero dahil upang mapilitan ang mga pamilya na mag-alok na ng pabuya para  makapagbibigay impormasyon para sa nawawala nilang kaanak. (Daris Jose)