Ninoy Aquino International Airport (NAIA), isapribado suhestiyon ni Chairman Joey Salceda

SUHESTIYON  ito ni House Ways and Means Committee Chairman Joey Salceda upang makalikom ng malaking kita ang susunod na pamahalaan at bilang tugon na rin sa kung papaano makakaluwag ang bansa mula sa epekto sa pinansyal ng COVID-19 pandemic.

Ngunit paglilinaw ni Salceda, ang iminumungkahing privatization sa NAIA ay hindi nangangahulugan na tuluyang pagbebenta sa pag-aari ng gobyerno.

Maaari aniyang i-adopt ang ginamit na approach sa New Clark City International Airport kung saan kumikita ang pamahalaan sa pagbebenta ng development rights, pagpaparenta at sa iba pang bagong business activities.

Dagdag ni Salceda, aabot sa 625 hectares ang NAIA na doble sa laki ng Bonifacio Global City (BGC).

Maaari aniyang bumuo ng master-plan para sa mga espasyo tulad ng “in-city housing”, parke, pampublikong transportasyon at iba pang public spaces.

Base sa pag-aaral na ginawa, ang redevelopment ay maaring magpasok ng P5.4 trillion na kita sa pamahalaan. (ARA ROMERO)