Fajardo inakay ang Gilas sa panalo

NAITAKAS ng Gilas Pilipinas ang dikit na 76-73 panalo kontra sa karibal na Thailand sa pagsisimula ng 31st Southeast Asian Games 5-on-5 basketball kagabi sa Thanh Tri Gymnasium sa Hanoi, Vietnam.

Maagang naiwan sa 10-point deficit ang Nationals bago sumandal kay June Mar Fajardo upang agawin ang manibela at diskarilin ang muntikang comeback win ng Thailand.

Humakot ng 28 markers, 12 boards at dalawang tapal si six-time PBA MVP Fajardo habang may 17 puntos, anim na rebounds at tatlong assists din si Thirdy Ravena upang banderahan ang atake ng Gilas sa gabay ni coach Chot Reyes.

Mabagal ang naging simula ng Gilas sa 11-21 bago buhatin ni Fajardo upang makasikwat ng 38-34 abante.

Kontrolado na ng Gilas ang laban buhat noon at abante pa sa komportableng 73-63 iskor sa huling tatlong minuto bago magkasya nalang sa tatlong puntos sa natitirang bahagi ng duwelo.

Noong 2017 sa Malaysia, nahirapan din ang Gilas sa Thailand subalit nakakuha pa rin ng dikit na 81-74 panalo.