Mga proyektong may kinalaman sa crime monitoring activities, irerekomenda ng DILG

IREREKOMENDA ng Department of the Interior and Local Government (DILG) sa incoming officials ng departamento ang mga proyektong may kaugnayan sa crime monitoring activities.

“Nasa sa kanila na po ‘yun kung gusto nilang ipagpatuloy pero highly recommended po ‘yun, kung nasimulan lang sana ng maaga nung 2019 dapat patapos na ‘yan today,’’ayon kay DILG Undersecretary Epimaco Densing III.

Gayunman, inamin ni Densing na ang isang proyekto ng departamento na hindi naisulong ay ang Safe Philippines Program dahil hindi naipalabas ang pondo na P20-bilyong piso para rito.

“Ito ‘yung paglalagay ng maraming CCTV (closed circuit television cameras), around more than 10,000 CCTVs supposedly sa buong Metro Manila na funded po ng Chinese or China import and export bank,” ani Densing.

Aniya, umatras sila sa proyekto “as early as late last year since we believe that the funding approval will come in late” idagdag pa na ang pondo ay hindi naipalabas kahit pa aprubado na ang proyekto.,

Sa paggamit naman ng body cameras sa panahon ng operayson, nanawagan naman si Densing sa susunod na administrasyon na mangyaring ipagpatuloy ito, tinukoy ni Densing na ito ang “most important project” na dapat na ipagpatuloy upang madetermina ang anumang human rights violation.

Ani Densing, ang pagbili sa body cameras ay nagsimula noong nakaraang taon, sa panahon ng liderato ng retirradong si PNP chief General Guillermo Eleazar.