Deployment ban sa Ethiopia, partially lifted na- Andanar

“Partially lifted” na ang deployment ban ng Overseas Filipino workers sa Ethiopia.

Ito ang inanunsyo ni acting presidential spokesperson at Communications Secretary Martin Andanar base sa inilabas na resolusyon ng Philippine Overseas Employment Administration (POEA) makaraang ibaba sa Alert Level 2 ang Ethiopia mula sa dating Alert Level 4.

“Government has partially lifted the ban on the deployment of OFWs to Ethiopia based on board resolution made by the POEA. This after the Alert Level in Ethiopia was lowered from 4 to 2,” ani Andanar.

Matatandaang noong Nobyembre 2021 nang ideklara ng POEA ang total deployment ban sa Ethiopia matapos na itaas ng Department of Foreign Affairs sa Alert Level 4 ang sitwasyon doon.

Sa ulat, sa Alert Level 4, isasagawa na ang evacuation at mandatory repatriation ng mga Pinoy.

Sinasabing ang kaguluhan sa Ethiopia ay bunga ng laban ng Tigray People’s Liberation Front (TPLF) at Federal Government of Ethiopia. (Daris Jose)