Fuel tax, suspendihin

Muling umapela si dating Speaker Alan Peter Cayetano na suspindihin muna ang ipinapataw na excise tax sa mga produktong petrolyo para matugunan ang mataas ma inflation rate sa bansa.

Isa pang suhestiyon ng mambaatas na magpatupad ng 5% savings rate sa lahat ng government agencies upang masolusyunan naman ang revenue shortfall.

“Number one talaga diyan is that we have to suspend yung excise tax on fuel. Di ba kaya ayaw natin tanggalin ang excise tax, kasi kailangan natin ang pondo. But if you have five-percent savings, then the government will spend five percent less anyway,” ani Cayetano.

Dapat aniyang pagtuunan ng pansin ngayon ang pagtaas ng presyo ng produktong petrolyo upang maagapan ang pagtaas pa ng inflation sa bansa na umabot na sa 4% nitong Marso.

Idinagdag nito na malaki rin ang epekto ng pagtaas ng presyo ng langis sa iba pang bilihin.

“Yung isang domino kapag bumagsak, sunud-sunod na. So hindi pwedeng sa gitna mo ihihinto kasi marami nang tumumba. Yung unang domino talaga e ang presyo ng gasolina. So we have to, for me, i-arrest mo muna ‘yan para hindi tumaas lahat,” pahayag nito.

Bilang sagot naman sa posibleng pagkawala ng kita o revenue ng gobyerno sa suspension ng fuel excise taxes, ay dapat magpatupad ng mandatory savings rate na 5% across all state agencies – na makakapagtipad sa pamahalaan ng P250 billion mula sa P5.04-trillion national budget para ngayong 2022. (ARA ROMERO)