11-K Pulis ipakakalat sa NCR para magbigay seguridad sa paggunita ng Semana Santa

SINIMULAN na ng pamunuan ng National Capital Region Police Office (NCRPO) ang mag deploy ng nasa 11,000 police personnel sa iba’t ibang panig ng Metro Manila.

Layon nito para masiguro ang seguridad para sa tahimik, maayos at mapayapang paggunita ng mga Katoliko sa Semana Santa.

Ayon kay NCRPO Spokesperson, P/LtCol. Jenny Tecson, inatasan na ni NCRPO Director, P/MGen. Felipe Natividad ang lahat ng District Police Directors nito na gawin ang ibayong hakbang para sa okasyon.

Partikular aniya rito ang paglalatag ng help desk sa mga places of convergence tulad ng mga Terminal ng Bus, mga Paliparan at Pantalan maging sa mga Simbahan at Mall gayundin sa iba pang mga pook pasyalan.

Pinayuhan naman ng NCRPO ang publiko na planuhing maigi ang kanilang pagbabakasyon at tiyaking susunod sa mga itinakdang minimum health protocols laban sa COVID-19. (Gene Adsuara)