La Salle ibinunton ang galit sa UST

IBINUHOS ng La Salle ang ngitngit sa University of Santo Tomas nang itarak ang 75-66 panalo sa UAAP Season 84 men’s basketball tournament kahapon sa Mall of Asia Arena sa Pa­say City.

Nasandalan ng Green Ar­chers si Justine Baltazar na kumamada ng 20 points, 7 rebounds at 5 assists para sa kanilang ikaapat na pa­nalo at mapatatag ang kapit sa No. 2 spot tangan ang 4-1 baraha.

Magandag resbak ito para sa La Salle matapos yumuko sa nagdedepensang Ateneo noong Sa­bado.

Nakakuha ng solidong suporta si Baltazar mula kay Kurt Lojera na nagsu­mite ng 15 markers.

“I think it’s very important for us, this win. It’s be­cause after coming up with a loss against Ateneo, the thing that I told the boys  the important thing is how we bounce back,” ani La Salle coach Derrick Pumaren.

Nakuha ng Green Archers ang 19 puntos na ka­lamangan sa huling 1:42 sa third quarter.

Sinubukan ng Growling Tigers na makahirit matapos maibaba sa siyam na puntos ang bentahe ng Green Archers, 58-67, sa fourth quarter subalit iyon na lamang ang nakayanan ng Espana-based squad.

Bumida para sa UST sina Nic Cabanero at Joshua Fontanilla na may ptig-20 points.

Nahulog ang UST sa 2-3 baraha.

Sa ikalawang laro, ti­na­kasan ng UP Fighting Ma­roons ang Adamson Fal­cons, 73-71, para sa ka­nilang 4-1 kartada.

Nagtala si Zavier Lucero ng 20 points.