PBA bubble amenities kumpleto sa libangan

TITIYAKIN ng Philippine Basketball Association (PBA) na kumpleto ang amenities ng Quest Hotel sa Clark City sa Angeles City, Pampanga na pagtatayuan ng bubble sa pagpapatuloy ng Philippine Cup sa darating na Oktubre 9.

“Tsinek namin, may golf, may water sports,” bulalas kahapon ni Pro league Commissioner Wilfrido Marcial. “Maglalagay din kami ng parang screen para makanood sa gabi. May bilyaran at table tennis.”

Asinta ng unang Asia’s play- for-pay hoop na matapos ang all-Pinoy conference ng Disyembre 9 o 11, dalawang buwan tatagal sa bubble ang players na aabot ng finals. Ang mga maagang masisibak pagkatapos ng 11- game eliminations at sa bawat yugto ng playoffs ay puwede nang lumabas.

“It’s all about the wellness of the players. Imagine two months ka doon doing nothing,” dugtong ni chairman Victorico Vargas ng Talk ‘ N Text. Hindi na pababalikin ng bubble ang lalabas ng lugar.

“Hiling ng players kung p’wede raw tig-isa silang k’warto,” wakas na na sambit ni Marcial. “Pero hindi talaga kakayanin, kaya sharing sila tigalawa sa isang kuwarto.” (REC)