Mga rehiyon na may mataas na Covid-19 vaccine coverage dapat na tutukan ang pagbibigay ng booster shots —Galvez

KAILANGANG tutukan ng mga rehiyon na may mataas na COVID-19 vaccine coverage ang pagbibigay ng booster shots.

Sa Talk to the People ni Pangulong Rodrigo Roa Duterte, Lunes ng gabi, sinabi ni vaccine czar Secretary Carlito Galvez Jr. na 12 mula sa 17 rehiyon ng bansa ay maaari nang ikunsidera na mayroong mataas na vaccine coverage.

Ani Galvez, kailangang ituon ng pansin ng mga rehiyon na ito ang pag-aalok ng boosters habang ang natitirang limang rehiyon ay kailangan na subukan na palakasin ang kanilang primary vaccinations.

“We need to direct the 12 regions with high coverage to shift their focus to administering the boosters. Kailangan din po natin ang tulong ng mga pharmacies and medical clinics para po ma-expand ang mga boosters sa tulong ng ating private sector,” ayon kay Galvez.

“Kailangan din po na mag-dedicate tayo ng mga araw sa pagbabakuna ng boosters. At kailangan din po natin ang tulong ng lahat para hikayatin ang ating mga mamamayan na magpa-booster para tuluy-tuloy at may dagdag na proteksyon sa susunod sa future surges,” dagdag na pahayag nito.

Ani Galvez, ang limang rehiyon na nahuhuli na sa COVID-19 vaccinations ay ang Region 5 ( mayroong 69.96% fully vaccinated), CARAGA (69.75%), MIMAROPA (68.56%), Region 12 (61.25%), at BARMM (28.02%).

Sa ngayon, mayroon ng 9,709,375 booster shots na ang naiturok na sa buong bansa.

Target  ng pamahalaan na gawing fully vaccinated ang 90 milyong Filipino sa pagtatapos ng Hunyo 2022. (Daris Jose)