Mag-asawang Dela Cruz papalaso sa SEA Games

BUO na pala ang national men’s and women’s archery team na mga tutudla sa 31st Southeast Asian Games 2022 sa Hanoi, Vietnam na nakatakda saa parating na Mayo 12-23.

Gigiyahan ng mag-asawang Paul Marton at Rachelle Anne Dela Cruz ang koponang puntiryang mahigitan ang nag-iisang gold medal na nakamit ng bansa nang huling ganapin ang 11-nation, biennial sports conclave sa ‘Pinas noong 2019.

Nakumpleto na ang delegasyon para sa nasabing sport pagkaraang maisagawa ng World Archery Philippines (dating NAAP) ang katatapos na national ranking & qualification tournament sa STI Gold Toe Archery Center sa Marikina nitong Pebrero 5.

Sina Dela Cruz ang tanging nakamedalya (gold) para sa ‘Pinas sa PH 30th SEA Games 2019 sa Clark Parade Grounds sa Angeles nang magkampeon sila sa non-Olympic event compound mixed team.

Swak sa men’s Olympic recurve sina Jason Feliciano, Jonathan Reaport, Girvin Garcia, Phoebe Amistoso at mag-utol na Gabrielle at Pia Bidaure. Ang mga reserba ay sina Riley Silos, Chkeil Enecio, Danielle Damares at Ketura Gonzalez.

Bubuo naman sa compound din sina Johann Olaño at Florante Matan, Andrea Robles at Jennifer Chan, 57.  Reserves sina  Arnold Stoney, Rojas Niño Maandig, Daphne Austria at Abbigail Tindugan. (REC)