MGA HEALTH WORKERS, NAGSAGAWA NG KILOS PROTESTA

MULING nagsagawa ng kilos protesta ang samahan ng health workers sa harap ng tanggapan ng Department of Health (DOH) kasabay ng pagdiriwang ng Valentine’s Day.

Tinawag na Black Hearts Day Protest ang nasabing pagkilos na pinangunahan ng Alliance of Health Workers

Naglakad ang mga health workers na pawang mga nasa pampubliko at pribadong hospital mula Legarda patungong DOH.

Muling panawagan ng grupo ang pagbibitiw ni Health Secretary Francisco Duque III dahil sa kapalpakan nito sa trabaho.

Giit pa ng grupo, tila hindi na naisip pa ng gobyerno ang kaligtasan, proteksyon, karapatan at kapakanan ng mga health workers na patuloy na tumutulong para hindi na kumalat pa ang COVID-19.

Bukod dito, naging talamak din ang contractualization scheme sa mga pampublikong hospital.

Nangangamba rin ang mga health workers na mabawasan pa ang mga benepisyong nakukuha nila ngayong may pandemya dahil natapos na ang ilang probisyon nito sa ilalim ng Bayanihan Law 2 kung saan napalitan na ito mg One Covid-19 Allowance (OCA).

Anila, sa loob ng dalawang taon ay hindi pa rin sapat ang mga hakbang ng pamahalaan para mabawasan ang tinatamaan ng COVID-19 kung saan nakakaramdam na rin ng pagod ang mga health workers. (GENE ADSUARA)