$2-M ADB grant para suportahan ang ‘Odette’ relief ng Pilipinas

INAPRUBAHAN ng Asian Development Bank (ADB) ang $2-million grant para suportahan ang emergency response ng gobyerno ng Pilipinas sa mga nasalanta at nawasak na lugar sa central at southern provinces dulot ng bagyong Odette.

Ang bagyong Odette ang itinturing na “strongest typhoon” na tumama sa bansa noong nakaraang taon.

Ang grant sa ilalim ng Asia Pacific Disaster Response Fund ng ADB ay magbibigay ng humanitarian assistance sa 15,000 households, o 75,000 katao sa Visayas at Mindanao na labis na naapektuhan ng nasabing bagyo.

Popondohan din nito ang food vouchers na ipamamahagi sa mga target communities, kung saan maaaring ipalit ng mga banepisaryo ang food vouchers sa mga pagkain sa piling pamilihan.

Kabilang din sa grant ang logistics support para sa food assistance delivery.

“Typhoon Odette’s damage on housing, agriculture, and infrastructure amid the Covid-19 (coronavirus disease 2019) pandemic has made life more difficult for Filipinos in affected areas,” ayon kay ADB Director General for Southeast Asia Ramesh Subramaniam.

“This assistance will help finance the humanitarian needs of those residents, especially people living in remote areas,” aniya pa rin.

Katuwang ng ADB ang United Nations World Food Programme (WFP) sa pagde-deliver ng food assistance.

Samantala, sa pagtantiya naman ng National Disaster Risk Reduction and Management Council, sinasabing pumalo sa P24.6 billion ($500 million) ang pinsala sa mga pananim, imprastraktura at private property. (Daris Jose)