PDU30 wala pang susuportahang kandidato sa pagka-presidente

INANUNSIYO  ni Pangulong Rodrigo Duterte na wala siyang ieendorsong kandidato sa pagka-presidente sa ngayon.

Ayon kay Duterte, halos lahat ng tumatakbong presidente ay naghahangad ng kanyang endorsement.

Bagaman at lahat naman ng tumatakbo ay kuwalipikado, may mga kandidato aniya na iba ang ideolohiya.

Hindi naman pinangalanan ni Duterte kung sino ang kanyang tinutukoy.

“May iba kasi diyan na may ideology ang nakasabit eh…They are all qualified kung sino man sila, those running now are qualified to be president. I hope so but… Okay man ang tingin ko sa kanila except for a few misgivings about the danger of falling into the hands of — well, getting into a trap with the communists…” ani Duterte.

Samantala, wala pa ring ineendorsong kandidato sa pagka-pangulo ang ruling party Partido Demokratiko Pilipino–Lakas ng Bayan (PDP-Laban) bagaman at sinuportahan noong nakaraang buwan si Davao City Mayor Sara Duterte na tumatakbong bise presidente.

Sinabi ni acting Presidential Spokesperson Karlo Nograles na patuloy pa ring nag-uusap ang PDP-Laban lalo pa’t sinabi ni Duterte na wala pa siyang susuportahang kandidato maliban na lamang kung may magpapabago ng kanyang desisyon.