Crime rate sa Metro Manila, bumaba ng 17% – PNP

INIULAT ng Philippine National Police na bu­maba ng 17 porsiyento ang crime incidents sa National Capital Region mula November 2021 hanggang Enero 2022.

Ayon kay PNP spokesperson P/Col. Jean Fajardo, ang pagbaba ng crime incidents mula Nob. 20, 2021 at hanggang Enero 23, 2022 ay indikasyon ng maigting na kampanya ng PNP laban sa iba’t ibang krimen sa bansa.

Kabilang sa mga tinututukang crime incidents sa Metro Manila ay physical injuries, theft at robbery.

Sa katunayan ang pagbaba ng mga kaso sa NCR ay nakita rin sa ilang rehiyon sa bansa.

Walong kaso ang tinutukan ng PNP na kinabibilangan ng murder, homicide, physical injury, rape, robbery, theft, motorcycle theft at carnapping.

Posibleng nakatulong sa pagbaba ng crime incidents ang ipinatutupad na qua­rantine restrictions sa COVID-19.

Gayunman, tiniyak ni Fajardo na hindi magi­ging kampante ang PNP lalo pa at papalapit ang halalan.