NCR nasa ‘moderate risk’ na – OCTA

NASA ‘moderate risk classification’ na muli ang National Capital Region (NCR) maging ang mga karatig-lalawigan na Rizal at Cavite  dahil sa patuloy na pagbaba ng bilang ng mga bagong kaso ng COVID-19, ayon sa OCTA Research Group.

Base sa COVID Act Now, sinabi ni OCTA fellow Dr. Guido David na nasa 23.01 kada 100,000 indibiduwal na lamang ang ‘average daily attack rate (ADAR) sa NCR habang nasa 20.30 ito sa Cavite at 15.09 sa Rizal.

Nananatili naman sa ‘high risk classification’ ang lalawigan ng Batangas, Quezon at Laguna.

Naitala ang ‘case growth rate’ ng NCR sa -68% habang nasa -65% ito sa Cavite at -66% sa Rizal.

Nitong nakaraang Sabado, nakapagtala rin ng ‘very low’ na COVID-19 reproduction rate na nasa 0.47 na lamang sa NCR, 0.69 sa Cavite at .54 sa Rizal.  Ang reproduction number ay nangangahulugan na bilang ng tao na maaaring mahawa ng isang taong may COVID-19. (Gene Adsuara)