Pagbabalik ng Governor’s Cup inaayos na ng PBA

PINAPLANO na ng pamunuan ng Philippine Basketball Association (PBA) kung paano nito itutuloy ang naudlot na PBA Season 46 Governors’ Cup.

Tengga muna ang liga dahil patuloy na lumolobo ang bilang ng tinatamaan ng coronavirus disease (COVID-19).

Kaya naman habang naghihintay, nag-iisip na ng iba’t ibang paraan ang PBA para sa pagbabalik-aksiyon ng season.

Binabantayan ng PBA ang sitwasyon kung saan posibleng sa Pebrero pa maituloy ang liga base sa kasalukuyang estado ng bansa.

Pumalo na sa mahigit 20,000 ang kaso ng mga  tinatamaan ng COVID-19 kada araw.

At walang balak ang PBA na sumugal para lamang matuloy ang liga.

“Priority natin ang kaligtasan ng lahat,” ani PBA commissioner Willie Marcial.

Ilan sa mga posibleng  maging hakbang ng liga  ay ang paglipat ng mga laro sa lugar kung saan mababa ang kaso ng COVID-19 at nasa mababang alert level.