PDu30, may hawak ng shortlist ng mga kandidato para maging susunod na hepe ng PNP

NAKASISIGURO si Presidential Spokesperson Harry Roque na mayroon nang hawak na listahan si Pangulong Rodrigo Roa Duterte ng mga posibleng kandidato para maging susunod na hepe ng Philippine National Police (PNP).

Nakatakda na kasing magretiro sa susunod na linggo si Outgoing PNP Chief Camilo Cascolan.

Iyon nga lamang ay wala pang impormasyon si Sec. Roque kung sino ang napipisil ng Pangulo para humalili sa pwesto ni outgoing PNP Chief Gen. Cascolan.

Kaya ang pakiusap ni Sec. Roque ay mas makabubuting hintayin na lamang ang magiging pinal na desisyon ng Chief Executive ukol dito.

Matatandaang, itinalaga ni Pangulong Duterte si Cascolan bilang PNP chief noong Setyembre at sa darating na Nobyembre 10, ang opisyal na pagbaba niya sa pwesto matapos na umabot na ito sa kanyang mandatory retirement age na 56. (Daris Jose)