PDU30: detensyon o pagpiit sa resource person sa Senate probe, isang pang-aabuso

IKINUNSIDERA ni Pangulong Rodrigo Roa Duterte bilang “oppression” ang detensyon o pagpipiit ng resource persons na tumangging sabihin ang nais ng mga senador na nais nilang marinig sa pagdinig sa Senate blue ribbon committee hinggil sa di umano’y overpriced ng pandemic supplies.

Sa Talk to the Peole, araw ng Miyerkules, hinamon ni Pangulong Duterte ang komite na magsampa ng kaso laban sa mga concerned personalities kung ang komite ay may sapat na ebidensiya.

“Pharmally o ano, idemanda na ninyo. May ebidensiya naman kaya kayo”, ayon kay Pangulong Duterte.

“But to detain someone because you are not getting answers you want to hear is pure oppression,” dagdag na pahayag nito.

Tinukoy ang Saligang Batas, binatikos ni Pangulong Duterte ang Senate committee dahil sa pagbabanta sa mga resource persons na mabibilanggo kapag tumanggi na sumagot sa ilan nilang katanungan.

“They are not respondents. As a matter of fact, they are called resource persons,” paglilinaw ni Pangulong Duterte.

“Tapos kukulungin mo? That’s a violation of the constitutional right of a person. Iyang contempt na ‘yan, it’s a very malaking question mark ‘yan,” diing pahayag nito

Nauna rito, binira ni Pangulong Duterte si Senador Gordon — nangunguna sa imbestigasyon ng blue ribbon committee para sa paggamit ng testimonya ng sinibak na si Police Colonel Eduardo Acierto, na tinawag nitong “perjured witness.”

Si Acierto ay ang pulis na naugnay sa Chinese businessman na si Michael Yang, dating economics adviser ni Pangulong Duterte.

Ang mga senador na nagsasagawa ng imbestigasyon ay nagpahayag na si Michael Yang, ay may kaugnayan sa Pharmally Pharmaceuticals Corporation, which is being questioned para sa di umano’y overpricing ng medical supplies para sa COVID-19 response ng pamahalaan.

Ang Pharmally, isang maliit na kompanya ang siyang nakasungkit ng P8 bilyong halaga ng procurement deals sa gobyerno.

Nauna rito, nagpalabas naman ng contempt citation ang Senado laban kay Yang, ana dahilan para arestuhin ito kasama ang ibang opisyal ng Pharmally, para sa di umano’y pag-iwas sa panahon ng pagdinig. (Daris Jose)