PBA players, coaches officials nag-swab test na!

Sumalang na sa swab test kahapon ang lahat ng players, coaches, staff at officials para sa pagbabalik-aksyon ng PBA Season 46 Philippine Cup sa Pampanga.

Bahagi ng health protocols na ipinatutupad ng liga ang swab test bilang tugon sa nakasaad sa Join Admi­nistrative Order (JAO) ng PSC, GAB at DOH.

Tuwing Lunes idaraos ang regular swab testing sa lahat ng involve sa Philippine Cup.

Inaasahang ilalabas na rin ang schedule ng liga para sa linggong ito.

Nakabase ang schedule sa magiging resulta ng test.

Sa oras na may magpositibo sa isang miyembro ng team, posibleng hindi muna isama ang naturang team sa weekly schedule hangga’t sumasailalim sa confirmatory test o quarantine.

Mas mahigpit ang PBA sa pagkakataong ito.

Ang mga maglalaro sa unang araw ng restart ay kailangan ding sumailalim sa panibagong antigen test sa umaga ng kanilang play date.

Bagong patakaran ito ng PBA para masiguro na ligtas ang lahat ng mga players lalo pa’t mabilis na kumakalat ang COVID-19 sa ngayon sa pamamagitan ng contact lamang.

Kaya naman magiging requirement na ang antigen bago ang laro dahil mas magiging mabilis ang hawaan sa isang contact sport tulad ng basketball sakaling may makalusot na positibo sa COVID-19.

Gaganapin ang mga laro sa DHVSU gym sa Bacolor, Pampanga.