5 hanggang 8 milyong Covid-19 vaccines darating ngayong linggo-Galvez

INAASAHAN ng Pilipinas na makatatanggap ito ng lima hanggang walong milyong doses ng bakuna laban sa coronavirus disease (COVID-19) sa ika-apat at huling linggo ng buwan ng Agosto.

Ito ang naging pagtataya ni vaccine czar at chief implementer ng National Task Force (NTF) Against COVID-19 Sec. Carlito Galvez Jr.

Ani Galvez, inaasahan niyang kabilang sa ide-deliver sa bansa ang tatlong milyong doses ng Sinovac, 360,000 doses ng Pfizer, at 1.8 milyong doses ng Moderna.

Ang mga bakunang Sinovac at Pfizer ay binili ng pamahalaan habang ang Moderna naman ay binili ng gobyerno at ng pribadong sektor sa pamamagitan ng trilateral arrangement.

Maliban dito, inaasahan din ni Galvez na magde-deliver ang COVAX facility ng “monthly pledge” nito na tatlong milyong doses sa Pilipinas.

“Napakasaya po natin dahil palaki nang palaki ang bilang ng ating mga kababayan na nakakakuha na ng complete doses ng mga bakuna,” ang pahayag ni Galvez

“The government is expected to breach the 30-millionth mark in administered jabs since it first began the national vaccination program in March. As of Aug. 20, more than 13 million Filipinos have already been fully vaccinated while 16.9 million have received their first dose,”aniya pa rin.

Samantala, target naman ng pamahalaan na gawing fully vaccinated ang 18.5 % ng 77 million eligible population bago matapos ang taon para makamit ang herd immunity. (Daris Jose)