SUNDALO INALOK NG SHABU, VENDOR KULONG

SWAK sa kalaboso ang isang fruit vendor dahil sa halip na prutas ay shabu ang inalok niya sa isang sundalo na noon ay nakasuot damit pang sibilyan sa Valenzuela City, kamakalawa ng hapon.

Nahaharap sa kasong paglabag sa Sec. 11 under Article II of RA 9165 ang naarestong suspek na kinilalang si Arsenio Mejia, 22, ng Dulong Tangke, Brgy., Malinta.

Base sa report ni PSSg Carlos Erasquin Jr, may hawak ng kaso kay Valenzuela police chief Col. Ramchrisen Haveria Jr, dakong alas-2 ng hapon nang ipakita ng suspek kay PFC Jebson Batalla, 37, miyembro ng Philippine Army at residente sa naturang lugar ang isang transparent plastic sachet ng hinihinalang shabu.

Dahil nakasuot ng damit pang sibilyan, hindi inakala ni Mejia na isang sundalo si PFC Batalla at inalok niya dito ang naturang item sa halagang P300.

Nagulat na lamang si Mejia nang bigla na lamang siyang sinunggaban ni PFC Battala at narekober sa kanya ang isang plastic sachet na naglalaman ng nasa P340.00 halaga ng hinihinalang shabu. (Richard Mesa)