Onyok pinayuhan ang 4 Olympic medalists

Imbes na makuntento sa nakamit na Olympic Games medals ay dapat pang magpursige sina weightlifter Hidilyn Diaz at boxers Nesthy Petecio, Carlo Paalam at Eumir Felix Marcial.

Ito ang payo ni 1996 Atlanta Olympics silver medalist Mansueto ‘Onyok’ Velasco  Jr. kina Diaz, Petecio, Paalam at Marcial na tatanggap ng milyones dahil sa kanilang pagko­lekta ng apat na medalya sa Tokyo Games.

“Tuluy-tuloy lang din at huwag ninyong isipin na may pera na kayo, huwag ninyong isipin na mayaman na kayo,” ani ng 47-anyos na dating amateur boxer. “Isipin ninyo na back to normal ulit, back to zero ka ulit para iyong pagkauhaw mo sa medalya nandoon pa rin.”

Tinapos ni Diaz ang 97 taon na paghihintay ng Pinas sa kauna-unahang Olympic gold medal nang magreyna sa women’s 55-kilogram division ng Tokyo Games weightlifting competition.

Kapwa naman sumuntok ng silver medal sina Petecio at Paalam sa women’s featherweight at men’s flyweight classes, ayon sa pagkakasunod at nag-ambag ng bronze si Marcial sa men’s middleweight.