Community pantry sa panahon ng ECQ habang hinihintay ang ayuda mula sa gobyerno, puwede kung iba-bahay-bahay –Abalos

OKAY lang kay Metropolitan Manila Development Authority (MMDA) chair Benhur Abalos na magkaroon ng community pantry sa panahon ng Enhanced Community Quarantine (ECQ) sa National Capital Region (NCR) habang hinihintay ang ayuda na manggagaling sa pamahalaan.

Subalit, nilinaw ni Abalos na kailangan na i-coordinate ito sa barangay officials at gawin itong bahay-bahay.

Ang pangamba kasi ni Abalos, kapag ang community pantry ay nagpapila pa ng tao ay baka ito pa ang pagmulan ng pagkakahawa-hawa ng mga tao sa variants ng covid-19.

“Well, alam ninyo ang problema kasi natin sa community pantry kung magpapapila ka tapos maging super spreader event eh siguro i-coordinate na lamang para maibahay-bahay na lang po ito. as much as possible kasi ang purpose ng ECQ ay huwag talagang lumabas ng bahay eh,” ayon kay Abalos sa Laging Handa public briefing.

Mas makabubuti na lamang aniya na gumawa ng magandang sistema para maibigay sa tao ang tulong habang nasa 2-week ECQ ang Kalakhang Maynila.

“eh kung magpapapila tayo sa labas at magbibigay tayo eh baka magkagulo so, kung talagang gustong tumulong wala namang problema roon pero sana gumawa tayo ng magandang sistema na baka puwedeng ipa-deliver na lang natin sa bahay-bahay para huwag na pong lumabas ang tao,” ang pahayag ni Abalos.