Diaz, Ando nakahanda na
- Published on July 23, 2021
- by @peoplesbalita
MAY dalawang bet ang Pilipinas sa 32nd Summer Olympic Games 2020 women’s weightlifting sa Tokyo, Japan na inatrasado ng Coronavirus Disease 2019 na papailanlang na ngayong Biyernes, Hulyo 23 at aabutin ng hanggang Linggo, Agosto 8.
Sila ay sina Hidilyn Diaz, 30 taon, 4-11 ang taas, ng Zamboanga City sa 55-kilogram class, at Elren Ann Ando, 22, ng Cebu City sa 64kg.
Puwedeng ang pang-apat na quadrennial sports festival na ito ng sundalong dalagang si Diaz ang huli na niya. Puntirya niyang madale ang gold medal para malampasan ang silver sa 2016 Rio de Janeiro Olympics.
At higit sa lahat matapos na ang may 96 na taong tag-uhaw sa gold ng mga Pinoy sa paligasahang ito,
Si Ando naman sa kabilang banda ang isa sa mga tinatayang susunod sa yapak ni Diaz.
Sa Lunes, Hulyo 26 na ang sabak ni Diaz, kinabukasan o Martes si Ando sa sport na sisimulan sa Sabado, Hul. 24 at matatapos sa Miyerkoles, Agosto 4.
Parehong nagpahayag na ng kahandaan ang dalawa sa kanilang mga kampanya rito. (REC)