Lumobo pa ang pabuya sa mga makakamedalya

TATANGHALING multi-millionaire bukod pa matatamong karangalan at kaligayahan, ang sinumang mananalo ng gold medal sa 32nd Summer Olympics Games 2020 sa Tokyo, Japan na inusog lang ng pandemya sa parating na Huly 23-Agosto 8.

Pinalaki pa ni business tycoon Ramon S. Ang ng San Miguel Corporation ang cash pot para sa quadrennial sports festival sa pagdagdag ng P10M sa bawat mag-uuwi ng gold, P5M sa mga makaka-silver at P2M sa bronze.

Isiniwalat ito nitong Martes ni Philippine Olympic Committee (POC) president Abraham Tolentino na dumalo bilang bisita sa tuwing Martes na online Philippine Sportswriters Association (PSA) Forum na mga hatid ng San Miguel Corporation (SMC), MILO, Amelie Hotel Manila, Braska Restaurant, Philippine Amusement and Gaming Corporation (PAGCOR) Smart at Upstream media.

Unang binunyag ni sports patron Manuel Pangilinan sa pamamagitan ng MVP Sports Foundation ang additional na P10M-P5M-P2M para sa G-S-B  medalists, katulad ng ipagkakaloob ng Philippine Sports Commission na pinamumunuan ni Chairman William Ramirez.

“Now RSA is giving the same amount,” pagbubunyag ni Tolentino, hinirit na P30M na ang makukuha sa gold winner, P15M sa silver, at P6M sa bronze. (REC)