Sara nanguna sa presidential, Duterte sa VP – survey

Si Davao City Mayor Sara Duterte ang napipisil ng mayorya ng mga Pinoy na maging susunod sa pangulo ng bansa sa nalalapit na May 2022 elections habang si Pangulong Rodrigo Duterte naman sa pagka-bise presidente.

Base sa resulta ng Pulse Asia survey na inilabas kahapon, 28% ng mga Pinoy adults ang boboto kay Mayor Duterte sa nalalapit na presidential election.

Pumangalawa si Manila Mayor Francisco “Isko Moreno” Domagoso na nakakuha ng 14%, kasunod si dating Senator Ferdinand “Bongbong” Marcos Jr. na may 13% at Sen. Grace Poe na may 10%.

Sumunod sa kanila sina Sen. Manny Pacquiao (8%), Vice Pres. Leni Robredo (6%); Sen. Panfilo Lacson (4%); Sen. Bong Go (3%); habang 2% sina dating vice president Jejomar Binay, Taguig-Pateros Rep. Alan Peter Cayetano at dating senador Antonio Trillanes IV.

Nadomina ni Sara ang Mindanao, kung saan 62% ang susuportahan ang kanyang posibleng presidential bid.

Sa Metro Manila, neck-to-neck sina Moreno at Marcos na 23% at 22%, habang si Sara ay 16%.

Sa vice presidential post, nanguna si Pang. Duterte na nakakuha ng 18%, kasunod si Moreno na 14%, Senate President Vicente Sotto III at Marcos, na kapwa tig-10%, Pacquiao na may 9%, Caye­tano, 8% at Sorsogon Gov. Francis Escudero, 7%. (Daris Jose)