Vaccination stickers sa mga bahay, suportado ng DOH

Suportado ng Department of Health (DOH) ang istratehiya ng ilang lokal na pamahalaan na kabitan ng ‘vaccination stickers’ ang mga bahay o establisimiyento na ang mga nakatira ay mga ‘fully-vaccinated’ na kontra sa COVID-19.

Sinabi ni Health Undersecretary Maria Rosario Vergeire na kung isa ito sa istratehiya ng mga lokal na pamahalaan na mapataas ang kumpiyansa ng publiko sa bakuna, wala siyang nakikitang uri ng diskriminasyon dito.

Nauna nang nagpatupad ng estilong ito ang pamahalaang lungsod ng Mandaluyong.

Iginiit ni Vergeire na patuloy na boluntaryo ang pagpapabakuna ng publiko ngunit madiin ang paghikayat nila na samantalahin ang libreng bakuna sa ‘vaccination program’ bilang proteksyon sa sarili at sa mga kasamahan sa bahay.

“Sa mga communications handle natin, pilit natin ini-encourage ang ating mga kababayan na magpabakuna. Pinapakita at pinaparinig natin sa kanila kung ano ang pwedeng maging benepisyo ng bakunang ito para sila ay makumbinse,” ayon pa sa opisyal.  (Daris Jose)