PBA nakaabang sa bagong quarantine restrictions

Panibagong paghihintay na naman ang gagawin ng PBA upang makapag-ensayo sa loob ng NCR plus bubble at ang planong masimulan ang Season 46 Philippine Cup sa susunod na buwan.

Hihintayin pa ng PBA ang bagong Joint Admi­nistrative Order mula sa GAB, DOH at PSC para sa guidelines ng training resumption sa NCR plus bubble.

Pinapayagan na ang maliliit na group session training at individual workouts sa NCR plus bubble subalit bawal pa ang contact sports gaya ng basketball.

Ngunit tiwala ang PBA at GAB na papayagan na ang training at scrimmages  sa oras na maglabas ng panibagong quarantine restrictions sa lugar.

Kasalukyang nasa General Community Qua­rantine with some restrictions ang NCR plus bubble.

“There’s no clear indication yet,” ani PBA commissioner Willie Marcial.

Dahil sa restrictions, nagsasanay ang iba’t ibang teams sa labas ng NCR plus bubble gaya ng  Batangas City, Ilocos Norte at Pampanga.

Ayok kay GAB chairman Baham Mitra, posibleng mapayagan na sa Hulyo 1 ang training resumption sa NCR.

Sa oras na makapag-ensayo na sa NCR plus bubble ang PBA teams, malaki ang posibilidad na makapagsimula na ang season ng liga sa Hulyo.