PDu30, naniniwala na maaaring maging Pangulo ng bansa si Willie Revillame

NANINIWALA si Pangulong Rodrigo Roa Duterte na maaaring maging pangulo ng bansa ang TV host na si Willie Revillame.

Kinumpirma ni Presidential Spokesperson Harry Roque ang video na lumabas noong nakaraang linggo kung saan hinihikayat ni Pangulong Duterte si Revillame na tumakbo sa pagka-senador.

“I have a copy of the video greeting of the President. Ang sabi nga po niya tumakbo ka ng senador pero sa bandang huli rin sabi rin po niya na pu-puwedeng magpresidente si Willie Revillame ‘no,” ang pahayag ni Sec. Roque.

“It’s a video greeting of sorts ..so it’s not a… new meeting between Willie and the President,” dagdag na pahayag ni Sec. Roque.

Nauna rito, hinihikayat ni Pangulong Duterte na tumakbo bilang senador ang “Wowowin” TV host na si Willie Revillame sa darating na eleksyon.

“Willie, si Mayor ‘to. Kumusta ka? Matagal na tayong ‘di nagkita pero palagi kitang naaalala dahil gusto ko sanang maging senador ka,” ani Duterte sa isang video message.

Ayon kay Duterte, nagdadalawang isip na tumakbo si Revillame.

Ngunit sabi ng Presidente na bukas ang slot para kay Revillame anumang oras.

“Kung ayaw mo na talaga eh ‘di puwede na tayong mag-usap ulit,” Duterte said.

Dagdag ng Pangulo, bilib siya sa appeal ni Revillame sa masa.

Si Duterte ang chairman ng Partido Demokratiko Pilipino–Lakas ng Bayan. (Daris Jose)