12 milyong essential workers target bakunahan sa ‘NCR Plus 8’

Lumarga na ang ‘vaccination’ para sa A4 prio­rity group o mga ‘essential workers’ kung saan nakatutok ang Department of Health (DOH) sa National Capital Region (NCR) at walo pang lugar na mataas ang kaso ng COVID-19.

Tinukoy ni Health Undersecretary Maria Rosario Vergeire na nasa 12 milyong ‘essential workers’ mula sa Metro Manila, Batangas, Bulacan, Cavite, Laguna, Pampanga, Rizal, Metro Cebu at Metro Davao ang uunahin na bakunahan sa A4 group.

Maaaring maging istratehiya ang pagbase sa edad o sa mas nakatatanda para nakalinya ang programa na maprayoridad ang mga mas ‘vulnerable’.

Nakatakdang maglabas ang Inter-Agency Task Force (IATF) ng panuntunan sa pagbakuna sa mga manggagawa.

Sa datos ng DOH, nasa 22 milyong ‘essential workers’ sa buong bansa ang maaaring makasama sa A4 group.  (Daris Jose)