4 todas sa sunog sa printing office sa Valenzuela

NASAWI ang apat manggagawang kalalakihan sa isang printing office matapos sumiklab ang sunog sa kanilang tanggapan sa Valenzuela City, kamakalawa ng hapon.

Hindi muna pinangalanan ni Valenzuela Fire Marshal Supt. Ana Mae Legaspi ang apat na nasawing trabahador na na-trap makaraang sumiklab ang sunog sa pinaglilingkurang Printing Press sa 2067 Lamesa St. Brgy. Ugong, sa naturang lungsod.

Sa panayam kay FO1 Kim Alnas ng Valenzuela Bureau of Fire Protection (BFP), nagsimula ang sunog dakong alas-3:57 ng hapon matapos marinig ang isang malakas na pagsabog na sinundan ng mabilis na pagsiklab ng apoy.

Kaagad namang nakapag-responde ang mga bumbero ng Valenzuela BFP, pati na ang ilang mga fire volunteers kaya’t mabilis ding nakontrol ang apoy na umabot lamang sa unang alarma bago tuluyang naapula dakong alas-4:35 ng hapon.

Inaalam pa ni Arson investigator FO2 Paul Fajardo ang dahilan ng pinagmulan ng pagsabog at pagsiklab ng apoy na tumupok sa hindi pa batid na halaga ng ari-arian.

Kaagad namang nagtungo si Valenzuela City Mayor Wes Gatchalian, kasama ang opisyal at kawani ng City Social Welfare and Development Office sa pinangyarihan ng sunog, upang makiramay at maghandog ng kaukulang tulong sa naulilang pamilya ng mga nasawi,

Sinabi pa ni FO1 Alnas sa panayam na isinasailalim na rin sa autopsy examination ang bangkay ng mga nasawi upang malaman kung may iba pang dahilan ng kanilang pagkamatay. (Richard Mesa)