4 huli sa aktong nagtatransaksyon ng ilegal na droga sa Caloocan

Ayon kay Caloocan police chief P/Col. Ruben Lacuesta, habang nagsasagawa ng Oplan Galugad sa Brgy. 8 ang mga tauhan ng Sub-Station 4 ng Caloocan police sa ilalim ng pangangasiwa ni PCpt Ronald Allan Soriano dakong alas-12:05 ng madaling araw nang makatanggap sila ng impormasyon mula sa isang concerned citizen hinggil sa tatlong lalaki na nagsasagawa ng illegal drug transaction sa Salmon Street.

Agad pinuntahan ng mga pulis ang nasabing lugar kung saan naaktuhan nila ang mga suspek na nagtatransaksyon ng ilegal na droga subalit, nang mapansin ang kanilang presensya ay nagtakbuhan ang mga ito.

Hinabol sila ng mga pulis hanggang sa maaresto nina PCpl Ben Jay Catequista at PCpl Robert Louis Masalihit sina Raul Pilipil alyas Nognog, 40, pedicab driver at Rhojan Ericher Ferrer, 18, habang nakatakas naman ang isa pang suspek.

Nakumpiska sa mga suspek ang tig-isang heat sealed transparent plastic sachet na naglalaman ng hinihinalang shabu na nasa Php 4,080.00 ang halaga.

Nauna rito, naaresto naman ng mga tauhan ng Sub-Station 8 ng Caloocan police na nagsasagawa ng Oplan Galugad sa Capricorn Street, Maria Luisa Subdivision, Barangay 177, dakong ala-1:15 ng madaling araw sina Jayflord Alcantara, 44 at Manolito Pascua, 50, construction worker matapos maaktuhan nagtatransaksyon ng ilegal na droga habang nakatakas ang hindi kilalang kasabwat ng mga ito.