30th FIBA Asia Cup 2021 qualifier 3rd window tagilid

NAMEMELIGRONG mapagpaliban ang 30th International Basketball Federation (FIBA) Asia Cup Men’s Basketball Championship 2021 qualifier third window sa Angeles University Foundation Sports Arena and Cultural Center at sa Clark Freeport sa Angeles City, Pampanga sa Pebrero 15-23.

Ito ay bunsod sa natuklasang mabilis na nakakahawang bagong variant ng Coronavirus Disease 2019 o COVID-19 na unang nadiskubre sa United Kingdom at nagpakaba sa Samahang Basketbol ng Pilipinas Inc. (SBPI) na siyang punong abala ng nalalapit na torneo.

Pinaiiral ngayon ng Inter-Agency Task Force (IATF) on Emerging Infectious Disease ang travel ban sa  maraming bansa na may kagayang kaso na rin sa UK.

Kabilang sa mga paparito para sa kompetisyon ang South Korea na dalawang ulit pang makakalaban ng Gilas Pilipinas o national men’s basketball team at ang makakatuos sa isang laoro na Indonesia, ang host ng tournament proper sa Agosto 16-28 sa Jakarta.

Kinunan ng People’s BALITA ng reaksyon sina SBPI president Alfredo Panlilio at Renauld Barrios. Pero minabuti na lang muna hindi muna magkomento sa isyu.  (REC)