3 arestado sa P119K shabu sa Valenzuela

MAHIGIT sa P.1 milyon halaga ng illegal na droga ang nasamsam ng mga awtoridad sa tatlong hinihinalang drug personalities sa buy bust operation at sa isang checkpoint sa Valenzuela city.

Kinilala ni Valenzuela police chief Col. Ramchrisen Haveria Jr, ang naarestong mga suspek na si Ricardo Carriedo, 45 ng 292 Canumay West at Eduard Plano, 37 ng 72 Rubber Master, Lingunan.

Sa imbestigasyon ni PSSg Ana Liza Antonio, dakong alas-9:20 ng gabi nang magsagawa ang mga operatiba ng Station Drug Enforcement Unit (SDEU) sa pangunguna ni PLT Joel Madregalejo ng buy bust operation sa Rubber Master St., Bukid, Brgy. Lingunan na nagresulta sa pagkakaaresto kay Carriedo at Plano matapos bentahan ng P500 halaga ng shabu ang isang pulis na nagpanggap na buyer.

Nang kapkapan, nakumpiska sa mga suspek ang anim na plastic sachets na naglalaman ng nasa 15 gramo ng hinihinalang shabu na tinatayang nasa P102,000.00 ang halaga, buy bust money, P460 cash, cellphone at pouch.

Samatala, dakong alas-2:30 ng hapon, nagsasagawa ng checkpoint sa harap ng Sea Oil Karuhatan Road, Brgy. Karuhatan ang mga tauhan ng Valenzuela Police Sub-Station 9 sa pangunguna ni PLT Francisco Tanagan nang parahin ni Pat Sunny Mercado at PCpl Darwin Orale si Rodel Deran, 38, tricycle driver na sakay ng isang motorsiklo.

Ani SDEU investigator PCpl Glenn De Chavez, nang hingin ng mga pulis ang kanyang driver license ay nakita ni Pat. Mercado ang nakapiit dito na isang plastic sachet ng hinihinalang shabu kaya’t inaresto ang suspek at nang kapkapan ay nakuha sa kanya ang isa pang sachet ng hinihinalng shabu na tinatayang nasa P17,000 lahat ang halaga. (Richard Mesa)