NAKATAKDANG maglabas ng resolusyon ang Political Finance and Affairs Department (PFAD) ng Commission on Elections (Comelec) kaugnay sa isinagawang imbestigasyon sa umano’y hindi tamang pagdedeklara ni Senator Rodante Marcoleta ng mga donor sa kanyang statement of contributions and expenditures (SOCE) para sa eleksyon noong Mayo 2025.
Sa kanyang counter-affidavit, iginiit ni Marcoleta na ang mga donasyon ay ginawa bago siya opisyal na maideklarang kandidato, alinsunod sa desisyon ng Korte Suprema sa kasong Penera vs. Comelec, na nagsasabing ang mga aspirante sa automated elections ay opisyal na nagiging kandidato lamang sa unang araw ng campaign period.
Noong Nobyembre 2025, naglabas ang Comelec ng show cause order (SCO) na nag-aatas kay Marcoleta na ipaliwanag ang kanyang pahayag na hindi niya ganap na idineklara ang mga donor sa kanyang SOCE para sa midterm elections noong nakaraang taon.
Pinagpapaliwanag din ng SCO ang diumano’y hindi pagkakatugma ng kanyang SOCE at statement of assets, liabilities at net worth (SALN)
Ayon kay Comelec Chairman George Garcia, nakatuon ang imbestigasyon sa kanyang SOCE.
Inamin ni Marcoleta na hindi niya idineklara ang mga natanggap na kontribusyon para sa eleksyon noong Mayo 2025 dahil hiling ng kanyang mga donor na manatiling anonymous.
Batay sa kanyang SOCE, gumastos ang senador ng P139.9 milyon para sa kampanya, mas mataas kaysa sa kanyang SALN na P51,965,559.
Samantala, hindi na nagbigay pa ng detalye si Garcia kung kailan maglalabas g resolusyon ang PFAD .
Dagdag pa ni Garcia, nasa law department na aniya kung magsasagawa ng preliminary investigation dahil siya ay nag-inhibit kaya hindi siya nakikialam.
Nauna nang sinabi ni Garcia na kailangang ideklara ng mga kandidato ang kanilang mga gastusin at donasyon lalo na kung ang mga gastusin at kontribusyon ay naganap s panahon ng kampanya alinsunod sa Section 99 ng Omnibus Election Code.
(Gene Adsuara)

NAKATAKDANG magkita sina Pangulong Ferdinand Marcos Jr. at dating Vice President Leni Robredo sa darating na Sabado, Pebrero 21 para sa implementasyon ng Oplan Kontra Baha sa Naga City.
Sinabi ni ni Presidential Communications Office (PCO) Undersecretary at Palace Press Officer Claire Castro sa press briefing sa Malakanyang na ang nakatakdang pagbisita ni Pangulong Marcos sa Naga City ay may kinalaman sa ‘flood mitigation measures’ ng gobyerno.
”’Yung Oplan Kontra Baha ay pinasimulan na po sa Naga City ng ating Pangulo. Busy po ngayon ang kawani ng DPWH para linisin ang mga kanal at estero sa Naga City. ‘Yan po ang bibisitahin ng Pangulo at totoo po na bibisita po siya at makakasama niya po ang Mayor Leni Robredo ng Naga City,” ayon kay Castro.
Si Robredo ay kasalukuyang Alkalde ng Naga City.
Ani Castro, wala pang impormasyon ang ibinibigay sa kanya kung pag-uusapan ng dalawa ang political plans para sa 2028 national elections.
(Daris Jose)

TIMBOG ang isang hinihinalang tulak ng iligal na droga nang kumagat umano sa ikinasa buy bust operation ng pulisya sa Valenzuela City, Huwebes ng madaling araw.
Ayon kay Valenzuela Police Station Drug Enforcement Unit (SDEU) Chief P/Lt. Sherwin Dascil, mahaharap ang suspek sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 ang suspek na si alyas “Ella”, 28, ng Brgy., Potrero, Malabon City.

Sa kanyang ulat kay Valenzuela Police Chief P/Col. Joseph Talento, sinabi ni Lt. Dascil na ikinasa nila ang buy bust operation laban kay ‘Ella’ sa koordinasyon sa PDEA nang magpositibo ang natanggap nilang ulat hinggil sa umano’y illegal drug activities nito.

Dakong alas-5:00 ng madaling araw nang makipagtransaksyon umano ang suspek sa isa sa mga operatiba ng SDEU na nagpanggap na buyer sa R. Jacinto Street, Brgy. Canumay West, na nagresulta sa pagkakaaresto sa kanya.
‎
Nakumpiska sa kanya ang humigi’t kumulang sa 3 grams ng hinihinalang shabu na nagkakahalaga ng P20,400, buy bust money na isang tunay na P500 bill, at dalawang P500 boodle money, P200 cash at coin purse.

Pinuri naman ni Northern Police District (NPD) Acting Director P/BGen. Christopher Dela Cruz ang SDEU team sa kanilang dedikasyon at pagsisikap para hulihin ang mga indibidwal na sangkot sa pagpapakalat ng iligal na droga sa Valenzuela.
(Richard Mesa)

ITINATWA ng Malakanyang ang bintang ni dating Pangulong Rodrigo “Digong” Roa Duterte na siya ay kinidnap ng gobyerno ng Pilipinas.
Ito kasi ang ginamit na dahilan ni Digong Duterte kaya’t tumanggi siya na dumalo sa International Criminal Court’s (ICC) hearings sa susunod na linggo.
“Alam naman natin kung anong ibig sabihin ng kidnapping,” ang sinabi ni Presidential Communications Office (PCO) Undersecretary at Palace Press Officer Claire Castro sa isang panayam.
“Since nag-start na ang hearing doon, pinauubaya ng ating gobyerno through RA 9851 ang pagdinig nang tuluyan ng kaso doon,” aniya pa rin.
Tinukoy naman ni Castro ang Philippine Act on Crimes Against International Humanitarian Law, Genocide, at iba pang Crimes Against Humanity.
Sinabi pa nya na sa ilalim ng Section 17, “Philippine authorities defer to an international tribunal if a case is already being heard or investigated there.”
Tinukoy din nito na ang mga reklamo na inihain kay Digong Duterte ay inihain ng mga mamamayang Filipino na naramdaman na hindi nila makukuha ang hustisya noong panahon na iyon.
Sa ulat, muling naghain ng waiver si Digong upang hindi na personal na dumalo sa confirmation of charges hearing ng International Criminal Court (ICC) na itinakda mula Pebrero 23 hanggang 27, 2026.
Sa liham na may petsang Pebrero 17 at ipinadala mula sa ICC Detention Centre, iginiit ni Duterte na hindi niya kinikilala ang hurisdiksyon ng ICC.
Iginiit din ng dating Pangulo na ang kasalukuyang administrasyon umano ang nasa likod ng kaniyang sapilitang pagdadala sa Netherlands, na tinawag niyang isang uri ng “kidnapping.”
Mariin din niyang pinabulaanan ang mga paratang kaugnay sa umano’y extra-judicial killings, na aniya ay isang “outrageous lie.”
Binanggit din ni Duterte ang kanyang edad at kalagayang pangkalusugan bilang dahilan ng hindi pagharap sa pagdinig.
Gayunman, sinabi niyang handa siyang harapin ang anumang kahihinatnan ng kaso at ipinauubaya na lamang sa kanyang mga abogado ang pagtutol at paghamon sa ebidensyang ihaharap ng prosekusyon, habang nananatiling nakatuon ang kaniyang puso sa Pilipinas. ( Daris Jose)