PAGKATAPOS ng Pasig River Esplanade, ang Binondo naman ang susunod na pagagandahin.
Inilunsad ni Pangulong Ferdinand R. Marcos Jr. ang Phase II ng Chinatown Revitalization Project sa Binondo, Manila, araw ng Biyernes upang pangalagaan ang pamana ng distrito habang pinalalakas ang turismo at mga lokal na negosyo.
Sa opisyal na paglulunsad na ginanap sa Hotel Lucky Chinatown sa Binondo, sinabi ni Pangulong Marcos na pinarangalan ng proyekto ang matagal nang ugnayan sa kalakalan at ng kultura sa pagitan ng Pilipinas at Tsina.
“Itong inisyatiba ay tungkol sa paggalang sa kasaysayan at pagbibigay sa distrito ng pansin at paggalang na nararapat dito,” ayon sa Pangulo.
Matapos ang tagumpay ng Phase I na nagpanumbalik sa kagandahan ng Jones Bridge, sinabi ng Pangulo na layon ng Phase II na gawing masiglang sentrong pang-kultura at pang-ekonomiya ang Binondo.
“Lalo nating pauunlarin ang Ongpin Street bilang sentrong kultural at pang-ekonomiyang, at pagagandahin ang mahahalagang makasaysayang landmark gamit ang ilaw at tematikong presentasyon sa Ongpin at Escolta Streets,” ang winika ng Pangulo.
Katuwang din ito ng Pasig Bigyang Buhay Muli Program ng Administrasyon upang mapanumbalik ang Pasig River at mga komunidad sa paligid sa pamamagitan ng pag-aayos ng mga pampublikong espasyo, makabagong sistema ng transportasyon at paglilinis ng waterways.
Maaari na ngayong maglakad, mag-jogging, o magbisikleta ang mga tao mula Intramuros hanggang makarating sa Binondo, ayon sa Pangulo.
Binigyang-diin ng Pangulo na ang proyekto ay para sa kapakinabangan ng mga Chinese-Filipino na tinuturing ang Binondo bilang tahanan, ng lahat ng mga Manileño na pumupunta sa lugar araw-araw, at ng bawat Pilipinong nais na higit na maunawaan ang kultura at kasaysayan.
Sinabi ng Pangulo na naging posible ang proyekto dahil sa matibay na pagtutulungan ng gobyerno, pribadong sektor, at Filipino-Chinese community.
Sa nasabing launching, pinanood din ng Pangulo at First Lady Louise Araneta-Marcos ang nailawang MacArthur Bridge; La Madre Filipina; Minor Basilica of Our Lady of the Pillar (Parokya ng Sta. Cruz); Qui Shan Gate; at ang Dragon Lights sa kahabaan ng Quentin Paredes Street. (Daris Jose)

INIHAYAG ni Pangulong Ferdinand R. Marcos Jr., araw ng Lunes na mahigit sa 423,000 pabahay ang naitayo o napondohan ng pamahalaan mula Hulyo 2022 hanggang Enero 2026 sa ilalim ng Expanded Pambansang Pabahay Para sa Pilipino (4PH) Program.
Ito ay patunay ng mas pinaigting na pagsisikap ng administrasyon na maghatid ng ligtas, disente, at abot-kayang tahanan sa mga Pilipino.
“Mula Hulyo ng 2022 hanggang Enero ng 2026, tayo ay nakagawa at nakapag-finance ng higit 423,000 housing unit,” ayon sa Pangulo na pinangunahan ang seremonyal na pamimigay ng mga bagong pabahay at tulong sa ilalim ng Expanded 4PH Program na idinaos sa Megawide Precast Plant sa Taytay, Rizal.
“Malayo na ang ating narating, ngunit patuloy pa rin tayong nagsisikap upang maabot ang ating target na bahay sa mga susunod pa na taon,” dagdag pa ng Pangulo sa nasabing okasyon ng pagdiriwang ng ika-7 na anibersaryo ng Department of Human Settlements and Urban Development (DHSUD).
Binigyang-diin ng Pangulo na patuloy na magsisikap ang pamahalaan upang maabot ang target na pabahay sa mga susunod na taon.
Kanyang ipinaliwanag na pinabilis ang konstruksyon at pinagaan ang proseso ng pagkuha ng bahay sa pamamagitan ng mga reporma gaya ng pagpapababa ng interest rates sa housing loans, na nagbigay-daan upang mas maraming miyembro ng Pag-IBIG Fund ang makinabang.
Sa tulong ng mga subsidiya ng pamahalaan, mas maraming pamilya ang nagkaroon ng pagkakataong magkaroon ng sariling tahanan.
“At hindi po kami titigil dito,” ayon kay Pangulong Marcos, na idinagdag na ng kanyang pagbisita sa Megawide precast plant ay isang hakbang para sa pagtatayo ng mga bahay gamit ang modernong teknolohiya.
“Dito po ay ating natunghayan ang isang napakahalagang proseso kung paano mas mapabilis ang produksyon ng mga housing unit,” diin ng Pangulo.
Ayon sa Pangulo, ang paggamit ng makabagong teknolohiya sa produksyon ng housing units ay makatutulong upang mas mapabilis ang pagtatayo ng mga bahay.
Sa ika-pitong anibersaryo ng DHSUD, muling tiniyak ni Pangulong Marcos ang kanyang pangako na bigyang access ang mga Pilipino sa disente at abot-kayang pabahay, at nanawagan ng mas matibay na pagtutulungan ng pamahalaan at pribadong sektor upang palawakin ang saklaw ng Expanded 4PH Program.
“Kaya patuloy na magtutulungan ang pamahalaan at pribadong sektor upang pabilisin ang produksyon, ayusin ang proseso, at palawakin ang saklaw ng ating mga programa, lalo na ang Expanded 4PH Program,” pahayag ng Pangulo.
“Habang may Pilipinong nangangarap ng sariling tahanan, patuloy na kikilos ang pamahalaan upang suportahan ang pangarap na ito.” (Daris Jose)

UMAABOT sa 353 kolorum na mga sasakyan ang nalambat ng mga elemento ng Land Transportation Office (LTO) sa isinagawang One-Time Big-Time (OTBT) anti-colorum operation mula Pebrero 9 hanggang 11 ng taong ito.

Mula sa Region 4 A nakuha ang pinaka maraming bilang ng huli na umaabot sa 140 sasakyan, sinundan ng Region X – 34 apprehended vehicles at National Capital Region- 29 sasakyan ang nahuli. Sa mga nahuli, aabot sa 34 na sasayan ay mga bus.
“Colorum vehicles risk passenger safety, bypass regulations, and disadvantage compliant operators. We commend our personnel and ask the public to use only authorized transport. We will keep working to create a safer, more orderly system,” ani LTO Chief Markus Lacanilao.

Una nang binalaan ni Lacanilao ang mga private vehicle owners na huwag gagamitin bilang pampasaherong sasakyan dahil may katapat itong parusa at multa. (Daris Jose)

INIUTOS ni Department of Public Works and Highways (DPWH) Secretary Vince Dizon sa mga kontratista na agad ayusin ang mga flood control projects na natukoy na may depektibo o hindi tumutugma sa itinakdang pamantayan.

Ayon sa mga ulat, natukoy ang mga proyektong ito matapos ang isinagawang inspeksyon at beripikasyon ng DPWH. Nakasaad sa kontrata ng DPWH na may “gua­rantee provision” kung saan obligadong itama ng kontratista sa sariling gastos, ang anumang kakulangan o depekto.
Ilang contractor naman ang nagpahayag ng kahandaan na gawin ang pagsasa-ayos batay sa obligasyon sa kontrata.

Samantala, sinusuri rin ng DPWH ang mga discrepancy kaugnay ng ilang proyekto sa Bulacan na napaulat bilang “ghost projects” bunsod ng maling grid coordinates na nakatala sa opisyal na records.

Ilang contractor naman ang nagpahayag ng kahandaan na gawin ang pagsasa-ayos batay sa obligasyon sa kontrata.

Samantala, sinusuri rin ng DPWH ang mga discrepancy kaugnay ng ilang proyekto sa Bulacan na napaulat bilang “ghost projects” bunsod ng maling grid coordinates na nakatala sa opisyal na records.
Ang grid coordinates ang ginagamit upang matukoy ang eksaktong lokasyon ng proyekto sa mapa at monitoring system. Batay sa joint inspection na isinagawa sa lugar, may mga proyektong napatunayang umiiral at gumagana, ngunit nagkaroon ng kalituhan dahil sa hindi tugmang datos ng lokasyon.

Patuloy ang beripikasyon ng mga dokumento at rekord upang maitama ang anumang maling impormasyon at malinawan ang ­katayuan ng mga nasabing proyekto.
(Daris Jose)