REHAS na bakal ang kinasadlakan ng isang factory worker na akusado sa kasong panghahalay at pangmomolestiya sa isang menor-de-edad na biktima matapos matiklo ng pulisya sa manhunt operation sa Valenzuela City.
Sa ulat, ipinag-utos ni Valenzuela Police Acting P/Col. Joseph Talento sa kanyang mga tauhan ang pagtugis sa 39-anyos na factory worker na kabilang sa talaan ng most wanted person ng Valenzuela CPS.
Kaagad namang isinagawa ng mga operatiba ng Valenzuela Police Warrant and Subpoen Section ang pagtugis sa akusado makaraan ang natanggap na impormasyon hinggil sa kinarooonan ng akusado.
Hindi na nakapalag ang akusado nang damputin ng mga tauhan ni Col. Talento sa kanilang lugar sa Brgy. Marulas sa bisa ng warrant of arrest para sa kasong Statutory Rape at Acts of Lasciviousness in relation to RA 7610 as amended by RA 11648 – The Anti-Rape Law of 1997 (4 counts).
Ang arrest warrant ay inilabas ng Family Court, Branch 16, ng Valenzuela City nito lamang October 20, 2025 na walang inirekomendang piyansa para sa pansamantalang paglaya ng akusado.
Ayon kay Col. Talento, pansamantalang nakakulong ang akusado sa custodial facility unit ng Valenzuela police habang hinihintay ang utos ng korte para sa paglilipat sa kanya sa City Jail.
(Richard Mesa)

HIMAS-REHAS ang dalawang babaing pekeng faith healer nang mabisto ang ginawang pambubudol sa mag-asawa na tinangka nilang matangayan ng malaking halaga ng cash at alahas sa Valenzuela City, Linggo ng gabi.
Hindi na nakapalag ang mga suspek na sina alyas “ Charie”, 34, at “Maria”, 50, kapwa ng Brgy., San Rafael, Montalban Rizal, nang damputin ng mga tauhan ni Valenzuela Police Acting P/Col. Joseph Talento na hiningan ng tulong ng mag-asawang sina alyas “Gilda”, 46, at alyas “Domingo”, 46, kapwa ng Brgy., Mapulang Lupa.
Sa pahayag ni ‘Domingo’ kay P/Capt. Robin Santos, hepe ng Station Investigation and Detective Management Section (SIDMS), nakilala niya ang mga suspek sa palengke ng Malinta na nagkunwaring mga faith healer at naisip niya na baka makatulong ang dalawa na mapagaling ang sakit na “sciatica” na matagal ng dinaranas ng kanyang asawa kaya’t kinuha niya ang serbisyo ng dalawa.
Pinaghanda umano ng mga suspek si ‘Domingo’ ng walong iba’t ibang uri ng prutas, walong bulaklak, walong itim na kandila, P198,100 cash, mga gintong alahas na nagkakahalaga ng P113,000, dalawang puting sobre na pang-alay umano sa puting duwende na si “Datu Kuru” na gagamitin sa rituwal sa bahay ng biktima.
Isinilid ni ‘Maria’ ang pera at mga alahas sa puting sobre at tinalian bago inutusan si ‘Domingo’ na dalhin ito sa loob ng kanilang banyo saka magdasal at makalipas ang ilang sandali ay sumunod si ‘Charie’ at pinalabas ang biktima bago sumunod na pumasok ang isa pang suspek.
Ibinalot kunwari ng mga suspek sa dilaw na tela ang alay na pera at alahas saka sinabihan ang mag-asawa na huwag bubuksan hanggang sila ay makaalis dahil mawawalan umano ng bisa ang panggagamot bago nagmadaling umalis ang mga ito.
Gayunman, nagduda si ‘Domingo’ at binuksan ang binalot na tela na naglalaman na ng mga budol na perang papel kaya kaagad niyang hinabol ang mga suspek hanggang may nakapagturo na sumakay ang mga ito sa bus sa VGC.
Humingi ng tulong ang biktima sa mga tauhan ng Police Sub-Station 8 na nagresulta sa pagkakaaresto sa mga suspek at nabawi sa kanila ang tinangay na pera at alahas sa mag-asawa. (Richard Mesa)

INARESTO ng Bureau of Immigration (BI) ang dalawang banyagang pugante na hinahanap ng kani-kanilang mga pamahalaan, sa magkahiwalay na operasyon ng Fugitive Search Unit (FSU) sa Cagayan de Oro at Olongapo City.
Sa unang operasyon, nagsanib-puwersa ang mga ahente ng FSU, Philippine National Police, BI Regional Intelligence Unit 10, at mga awtoridad ng Japan upang arestuhin ang Japanese national na si Yoshihiko Kubura sa Barangay Patag, Cagayan de Oro City.
Si Kubura, na gumagamit din ng alyas na Yoshihiko Tashiro, 59, ay hinahanap ng Kyoto District Court dahil sa kasong pananakit sa ilalim ng Japanese Penal Code, matapos umanong bugbugin ang isang lalaki sa loob ng isang karaoke bar sa Kyoto City noong 2013, na nagresulta sa bali sa mukha ng biktima. Ang kanyang pagkakaaresto ay bunga ng pormal na kahilingan ng pamahalaang Hapones para sa kanyang deportasyon.
Batay sa beripikasyon sa database ng BI, huling dumating sa Pilipinas si Kubura noong Pebrero 2012 bilang pansamantalang bisita at overstaying na mula pa noong Abril 2014. Siya rin ay nakalista sa Watchlist at Blacklist Orders ng Bureau bilang isang pugante sa hustisya.
Makalipas ang ilang oras, nagsagawa muli ng operasyon ang mga ahente ng FSU sa isang resort sa Olongapo City, katuwang ang mga operatiba ng National Bureau of Investigation (NBI) mula sa NCR at Olongapo.
Naaresto nila si John Emmanuel Obasi, 33, isang Nigerian national na kalaunan ay kinumpirma ng kanyang embahada bilang kasapi ng isang sindikatong kriminal na nagpapatakbo sa loob ng bansa.
Ayon sa mga awtoridad ng Nigeria, sangkot umano si Obasi at ang kanyang grupo sa isang pamamaril sa publiko at hit-and-run incident na nagresulta sa pagkamatay at malubhang pagkasugat ng ilang tao. Nabigo rin siyang magpakita ng balidong pasaporte o mga dokumentong pang-imigrasyon nang tanungin ng mga awtoridad.
Pinuri ni Viado ang FSU sa kanilang mabilis at koordinadong aksyon, at sinabing nananatiling masigasig ang Bureau sa pagtugis at pagpapatalsik sa mga hindi kanais-nais na dayuhan sa bansa.
“Pinaigting pa natin ang ugnayan sa mga lokal at banyagang ahensiya ng pagpapatupad ng batas upang matiyak na ang mga umiiwas sa hustisya sa ibang bansa ay mahuhuli at mapapaalis sa ating teritoryo,” ayon kay BI Commissioner Joel Anthony Viado. “Magpapatuloy ang aming mga operasyon nang walang tigil. Hindi magiging ligtas na kanlungan ang Pilipinas para sa mga pugante,” dagdag pa niya.
Ang dalawang pugante ay dinala sa detention facility ng BI sa Taguig City para sa booking at dokumentasyon, habang nakabinbin ang kanilang deportation proceedings. (Gene Adsuara)