ISINUSULONG ni Agusan del NorteRep. Dale Corvera na ipagbawal ang mga opisyal ng gobyerno, kanilang kaanak at affiliates sa business enterprise na pumasok sa government contracts.

Layon ng House Bill No. 5222, o “An Act Prohibiting Public Officers and Their Relatives from Entering into Government Contracts and Providing Penalties Therefor” na mapalakas ang ethical governance at maalis ang conflict of interest sa public service.

Nakapaloob sa panukala ang pagbabawal sa mga public officers, kaanak ng hanggang four degrees of consanguinity or affinity, at business entities kung saan mayroon silang shares o substantial beneficial interest, na pumasok sa kontrata sa gobyerno.

Pinagbabawalan din ang mga indibidwal o entities ng panukala na mabigyan ng lisensiya, prangkisa, permits, accreditations, awards, o kahalintulad na dokumento ng gobyerno gamit ang pribilehiyo mula sa public officer, kaanak at affiliated business enterprises para makakuha ng government contracts.

“This bill is about restoring public trust and ensuring that government transactions are free from undue influence and self-dealing. It draws a clear line between public duty and private interest,” paliwanag ni Corvera.

Kapag ganap na naging batas, sa mapapatunayang lumabag dito ay posibleng mapatawan ng pagkakulong ng 1-10 taon at multang nagkakahalaga ng katumbas sa 50% ng total value ng government transaction, contract, o deal. Pagbabawalan din silang makakuha ng puwesto sa gobyerno.

“This proposed legislation sends a clear message: public service is a calling, not a business opportunity. By barring public officers and their close relatives to profit through government contracts, this measure ensures that those who serve do so with integrity—not for personal gain,” ani Corvera.
(Vina de Guzman)

TINULDUKAN na ni Presidential Communications Office Undersecretary at Palace Press Officer Claire Castro ang pagsagot sa usapin na may kinalaman sa kanila ni Baguio City Mayor Benjamin Magalong.

Itinuro kasi ni Magalong si Castro na dahilan ng kaniyang pagbibitiw sa Independent Commission for Infrastracture (ICI), responsable sa mabilis na pangangalap ng ebidensya at dokumento, gayundin sa masinsinang pagtutok sa mga kaso ng katiwalian sa mga imprastraktura.

“Sana po ay napanood niyang buo iyong ating press briefing. Pero ito pong isyu na ito ay paulit-ulit na at nasagot ko na po, pero hindi ko alam bakit paulit-ulit pa rin at parang hindi po nagkakaroon ng katapusan ang isyu na ito,” ayon kay Castro,

“But anyway, this will be my last time to answer these issues. Unang-una po, hindi ko po saklaw ang kaniyang damdamin. Siya po ang boluntaryong nag-resign, hindi naman po siya pinagri-resign. Kung iyon po ang kaniyang naging desisyon, hindi ko rin po saklaw ang kaniyang pagdidesisyon,” aniya pa rin.

Sinagot din ni Castro ang sinabi ni Magalong na tila nais na palabasin ng Malakanyang na wala siyang karapatang mag-imbestiga.

“Unang-una po, iba po kasi ang pag-presume at iba naman po iyong naging pronouncement ng ating Pangulo. September 15 sinabi po ng Pangulo na siya po ay special adviser. Hinanapan po siya sa isang programa kung nasaan po ang kaniyang mandato, ang papel patungkol po rito. Ang sinabi lamang po ni Mayor Magalong ay he just presumed that he is an investigator. Maaaring ganoon ang mangyayari kung siya po ay nag-resign bilang mayor. Pero ang Pangulo na nga rin po ang nagsabi na pinili niya pong mag-stay at manatiling mayor ng Baguio City,” ang litaniya ni Castro.

“So, kung kayo po ang magtatanong sa kaniya, maaari po nating hanapin, nasaan nga po ba iyong sinasabi nating papel na siya ay tinalaga ng Pangulo na
imbestigador,” anito.

Sa kabilang dako, nakiusap naman si Castro na iwasan ang mga guessing game na nagbibigay ng intriga lalung-lalo na sa kanyang naging trabaho.

“Ang aking naging pronouncement dito noong September 26 na ang role ni Mayor Magalong ay ibibigay muna sa legal team, iyan po ay nanggaling sa Pangulo. Huwag po niyang bigyan ng intriga na mayroong nag-utos sa akin na ibang tao,” ang sinabi ni Castro.

“Kaya sabi nga natin, iwasan natin ang kwentong walang ebidensiya. Kung sinuman iyong sinasabi niyang iyon, kung may alam siya kung sino ang nag-utos sa akin at hindi ang Pangulo sa mga sinabi ko noong September 26, ipalitaw niya po dahil alam kong wala siyang mapapalitaw dahil iyon ay walang katotohanan,” aniya pa rin.

Nakiusap din si Castro na iwasan ang mang-intriga lalung-lalo na kung tatamaan ang Pangulo.

“Ang Pangulo po ay sumusunod lamang sa batas, hindi po natin puwedeng i-please lahat ng tao sa kagustuhan nila pero ang maaapektuhan naman po ay ang batas at ang pronouncement ng Pangulo. Sana matapos na po ang isyu na ito dito at wala na po sanang paulit-ulit na isyu na ganito,” aniya pa rin.

Samantala, sa ulat, aminado si Magalong na marami pa sanang nakalinya na mga kasong isasampa ang Independent Commission for Infrastracture (ICI) kaugnay sa mga dawit sa anomalya sa flood control projects.

Pero ayon kay Magalong, nahinto ito kasunod ng kaniyang pagbibitiw bilang special adviser ng ICI.

Nito lamang nakaraang Martes ng umaga, nagkasama-sama sina Magalong, kaniyang kapalit na si dating PNP Chief Rodolfo Azurin at Department of Public Works and Highways Secretary Vince Dizon para sa turnover meeting.

Sinabi ni Magalong na itu-turnover na niya ang mga dokumento kay Azurin kasama ng ibang mga technical reports at mga kaso na ihahain kaugnay sa ghost projects.

Panawagan naman ni Magalong, hayaan sanang mag-imbestiga si Azurin at huwag itong pigilan at pakialaman gaya ng nangyari sa kaniya.

Possible kasi aniyang may nasagasaan siya sa ginagawang imbestigasyon. (Daris Jose)

TINATAYANG umabot na sa 19,729 ang naitatalang bilang ng mga reklamo na ipinaabot ng publiko sa Sumbong sa Pangulo website na inilaan para sa mga reklamong may kaugnayan sa maanomalyang flood control projects.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na asahan bukas, Oktubre 10, ang mas detalyadong mga impormasyon kung saan ay nakapaloob dito kung ano na ang development sa mga reklamo at alin sa mga ito ang naaksiyunan at nasolusyunan na.

Kaugnay nito, winika ni Castro na wala pa silang matukoy na timeline partikular sa kung hanggang kailan bukas ang Sumbong sa Pangulo website.

Tututukan aniya nila kung may darating pang mga reklamo, gayung ito ang maaaring maging hudyat para alisin na ang website.

Matatandaang, nauna nang sinabi ng Malakanyang na bukas din silang palawigin ang website para sa mga reklamo laban sa anomalya sa iba pang infrastructure projects ng gobyerno.

Matatandaang, August 11 , 2025, inilunsad ang Sumbong sa Pangulo website kasabay ng paglalantad sa top 15 contractors na dawit sa flood control anomaly.
( Daris Jose)

SOLID!
Ganito ilarawan ni Special Assistant to the President for Investment and Economic Affairs Secretary Frederick Go ang kumpiyansa ng mga nasa sektor ng pagnenegosyo sa gitna ng nabunyag na anomalya sa flood control.

Sa kabilang dako, aminado si Go na may bahagyang hamon dulot na din ng mga negatibong nailalathala at nailalabas sa mga social media feeds kaugnay ng flood control mess.

Sinabi ni Go na kailangang gawin ngayon ay mag-move on, magpokus sa reporma at ituon ang pansin sa corrective measures.

Samantala, positibo si Go na makakabawi dito ang pamahalaan at ang kinakaharap aniyang hamon ngayon ay short term lamang.
( Daris Jose)

AYAW patulan ng Malakanyang ang panawagan ni Cavite 4th District Representative Kiko Barzaga na People Power para mapatalsik si Pangulong Ferdinand Marcos Jr. katulad ng pagpapatalsik sa kanyang ama na si dating Pangulong Marcos Sr.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na makarating man o hindi ang panawagan na ito ni Barzaga sa Pangulo ay dedma lang ang Malakanyang.

Ang katuwiran pa rin ni Castro, saklaw na aniya ng Mababang Kapulungan ng Kongreso ang usaping ito.

Bukod kasi sa planong maghain ng impeachment complaints, nanawagan din si Barzaga sa Pangulo na magbitiw na siya sa tungkulin dahil ang usapin ng korapsyon ay napaluat na nanggagaling di umano mismo sa Malakanyang.

“Mahirap po kasing magsalita ng walang ebidensiya, madaling magbintang, madaling magsabi kung anu-ano. Kung walang ebidensiya hindi dapat paniwalaan,” ang pahayag ni Castro.

Nauna rito, sa kanyang social media post ay hinihikayat ni Barzaga ang taumbayan, gayundin ang Armed Forces of the Philippines (AFP), Philippine National Police (PNP), at military reserve forces na sumama sa isang democratic revolt na sisimulan sa October 12.

Diin ni Barzaga, tatlong taon na tayong nagtitiis sa mga pagkukulang ni PBBM at hindi na rin intres ng mamamayang Pilipino ang isinusulong nito kundi ang kapakanan ng kanyang pamilya at mga kaalyado sa politika.

Sa video ay inilatag ni Barzaga ang mga puna sa pamumuno ni Marcos, pangunahin ang bilyun-bilyong pisong ninakaw na pondo para sa flood control program.

Binanggit ni Barzaga na dahil sa matinding kritisismo nya sa korapsyon sa gobyerno ay nadiskubre nya ang plano na alisin sya bilang miyembro ng House of Representatives.

Ayon kay Barzaga, hindi sya natitinag dahil handa syang mamatay o makulong para sa kanyang ipinaglalaban na pag-asa para sa ating kinabukasan. ( Daris Jose)

KAILANGAN munang pag-aralang mabuti ng Department of Finance (DoF) at Department of Budget and Management (DBM) ang isinusulong ni Senator Erwin Tulfo na pagpapataw ng isang buwang income tax holiday para sa mga manggagawa sa gitna na rin ng isyu ng multi-bilyong maanomalyang ghost flood control projects.

Para kay Special Assistant to the President for Investment and Economic Affairs (SAPIEA) Frederick Go, “This is quite, quite a big, big matter ‘no. And I think, it’s best to give the DOF and the DBM time to carefully study this proposal.”

“I’d like to defer this matter to to the Department of Finance and the DBM because this really has to be studied carefully. I would not, I would hesitate to make a state, a response that’s probably not very well thought about,” aniya pa rin.

Sa ulat, isinusulong ni Senator Erwin Tulfo ang pagpapataw ng isang buwang income tax holiday para sa mga manggagawa sa gitna na rin ng isyu ng multi-bilyong maanomalyang ghost flood control projects.

Sa Senate Bill 1446 o ang One-Month Tax Holiday of 2025, layon nitong kilalanin ang pangangailangan na mabigyan ng agarang ginhawa at maibalik ang benepisyo ng mga kabilang sa working population.

Sa ilalim ng panukala, ang one-time na one-month income tax holiday o hindi pababayarin ng buwis para sa isang buwang kita ay maia-apply sa mga individual taxpayers na tumatanggap ng sahod.

Sa oras na maisabatas ang panukala, ipapatupad ito agad sa unang payroll month ng manggagawa.

Para naman sa mga mixed income earners, tanging ang bahagi lamang na tukoy bilang compensation income o sweldo ang siyang malilibre sa income tax.

Nililinaw naman sa panukala na hindi saklaw ng panukalang tax holiday ang mga mandatory contributions sa Social Security System (SSS), Government Service Insurance System (GSIS), Philippine Health Insurance Corporation (PhilHealth), Home Development Mutual Fund (Pag-IBIG), loan amortizations, at iba pang voluntary payments na pinapayagan ng empleyado.

Sinabi ni Tulfo na makatwiran lamang ang panawagan ng mga tao na ibalik ang pera ng bayan at ibaba ang tax dahil matapos malantad ang mga anomalya sa flood control projects ay lubhang nawala ang tiwala ng mga Pilipino sa pamahalaan. ( Daris Jose)

INIHAYAG ni Speaker Faustino “Bojie” Dy III na hiniling niya sa Department of Justice (DOJ) na kanselahin ang pasaporte ni dating Ako Bicol Rep. Rizaldy Co matapos magbitiw bilang miyembro ng Kamara noong September 29.

Sinabi ni Dy na agad niyang kina-usap, na noon ay Justice Secretary, ngayon ay Ombudsman, Jesus Crispin “Boying” Remulla para hilingin ang aksyon nito upang malimitahan ang biyahe ni Co sa ibang bansa kasabay na rin sa ginagawang imbestigasyon sa umano’y iregularidad sa mga public works projects.

“Right after nung matanggap nga namin [ang resignation letter], tinawagan ko kaagad ang dating DOJ Secretary Remulla. Ang sabi ko, nakatanggap nga kami na nag-resign na siya (Co) as member of the House of Representatives na kung maaari lamang, kung ano ang pinakamabilis na paraan na makansela na ang kanyang passport para sa ganoon ang movement din niya ay malimita. ‘Yun ang aming ginawa, nakipag-cooperate kaagad kami sa [DOJ],” ani Dy.

Paliwanag ni Dy na habang ang Department of Foreign Affairs (DFA) ang siyang may otoridad para sa pormal na kanselasyon ng passports, humingi ng tulong ang kamara sa DOJ dahil makakatulong ito na mapabilis ang coordination process.

“Ang DOJ kasi po, sila ‘yung aming kinausap kaagad para sa ganoon gumawa rin sila ng tamang hakbang, ng tamang proseso para makansela nga po ang kanyang (Co) passport,” pahayag ng Speaker.

Sinabi naman sa kanya ni Remulla na gagawin niya kaagad ang pinakamabilis na paraan nang sa ganoon ay makansela nga ang passport ni former congressman Zaldy Co. (Vina de Guzman)

IGINIIT ni Speaker Faustino “Bojie” Dy III na mas nakatuon ngayon ang Kamara na tugunan ang mahahalagang alalahanin tulad ng pagtulong sa mga magsasaka at patatagin ang presyo ng bigas.

“Marami tayong mga problema sa ating bansa. Dapat unahin po natin muna yung mga bigyan ng solusyon. Kita niyo po yung daing ng ating mga farmers. Yan po yung aming talagang tinututukan ngayon,” pahayag ng Speaker sa isang radio interview.

Nakipagpulong na rin aniya siya kay Sen. Kiko Pangilinan at mga opisyal mula sa Department of Agrarian Reform (DAR), Dng epartment of Agriculture (DA), National Food Authority (NFA), at ilang lokal na opisyal upang talakayin ang mabilis na pagtulong.

Kabilang sa mga proposals na natalakay ay pagbabalik ng rice import tariff mula 15% sa 35%, paglimita sa rice importation, at pag-atas sa mga government agencies, partikular na sa Department of Social Welfare and Development (DSWD), na gawing prayoridad ang pagbili sa locally produced rice.

Dagdag nito, nagkasundo silang lahat na dapat bumili ang gobyerno ng mga local rice at hindi imported.

According pa sa Speaker, “kung maaari lamang na lahat ng ating mga government agencies, lalo na ang DSWD, huwag na sana munang bumili ng imported rice. Kailangan locally produced rice ang bilhin ng ating pamahalaan.”

Sinabi ng Speaker sa tanong ukol sa naging media posts na maghahain umano si Dasmariñas City Rep. Francisco “Kiko” Barzaga ng impeachment complaint laban kay Pangulong Marcos, na wala pa namang isinampa sa Kamara na reklamo laban sa presidente.

“Wala pa naman kaming natatanggap, pero alam ninyo, marami po tayong mga dapat asikasuhin,” pahayag nito.

Siniguro naman ng Speaker sa publiko na sa ilalim ng kanyang liderato, patuloy ang kamara sa pagtutok sa mga polisiya
na susuporta sa mga magsasaka, magpapalakas sa food security, isulong ang accountability at magpatupad ng maaayos na programa para sa mamamayan.
(Vina de Guzman)

ARESTADO ang 34-anyos na tambay na nagpanggap na pulis nang mabisto ang dalang shabu makaraang masita ng totoong mga pulis sa maling pagsusuot ng uniporme sa Caloocan City, kahapon ng madaling araw.

Sa nakarating na report sa opisina ni Caloocan Police Acting P/Col. Joey Goforth, kinilala ang naarestong suspek na si alyas “Roge”, residente ng Jordan Valley St. Brgy. Baesa.

Batay sa ulat, habang nagpapatrulya sa Tullahan Road, Brgy. 162 ang mga tauhan ng Caloocan Police Sub-Station-6 dakong ala-1:15 ng madaling araw nang mapansin nila ang suspek, na nakasuot ng pang-itaas na uniporme ng pulis.
Dahil sa hindi maayos na pagsusuot ng uniporme ng suspek at mahaba ang buhok nito, nagduda sina P/Cpl. Andy Mejal at Pat. Mark Angelo Araneta kaya nilapitan at sinita nila ang suspek saka hinanapan ng PNP-ID.

Nang ilabas ng suspek ang kanyang wallet na kinalalagyan ng ID, nalaglag ang isang plastic sachet na naglalaman ng tatlong gramo ng hinihinalang shabu na nagkakahalaga ng P20,400 na naging dahilan upang arestuhin siya ng mga pulis.

Mahaharap ang suspek sa kasong paglabag sa Article 179 of RPC (Illegal Use of Uniform or Insignia) at R.A 9165 (Comprehensive Dangerous Drug Act of 2002 sa Caloocan City Prosecutor’s Office. (Richard Mesa)