TININTAHAN ni Pangulong Ferdinand R. Marcos Jr. ang Republic Act (RA) 12288 upang maging ganap na batas, naglalayong isatatag ang Career Progression System for Public School Teachers and School Leaders upang masiguro ang kanilang professional development at career growth.

Pinirmahan ng Pangulo ang nasbaing batas noong Sept. 12, ang isang kopya ay isinapubliko, araw ng Martes.

Sa pamamagitan ng RA 12288, naitatag ang competency-based promotion system na pinahihintulutan ang mga elementary at secondary teachers na sumulong base sa merito at kuwalipikasyon.

Ang mga posisyon mula Teacher I hanggang Master Teacher I ay magsisilbi bilang base ng expanded system, may kasamang promosyon na dinetermina sa pamamagitan ng ‘fitness and competence’ na naka-ayon sa professional standards.

Kinikilala rin ng batas ang paunang pag-aaral at karanasan sa pagtuturo, payagan ang mga kuwalipikadong guro na pasukin ang anumang posisyon sa loob ng base level, batay sa qualification standards ng Civil Service Commission (CSC) at ng career stage indicators ng Teacher Education Council (TEC).

At para ipatupad ang batas, ang CSC, Department of Education (DepEd), Professional Regulation Commission (PRC), at TEC ay inatasan na i-harmonize ang qualification standards para sa teaching positions sa iba’t ibang public school system, isinasaalang-alang ang mandatong Standards-Based Assessment.

Samantala, inatasan naman ang Department of Budget and Management (DBM) na magtatag ng bagong teaching positions gaya ng Teacher IV to Teacher VII, Master Teacher V to VI, at School Principal V — para alawigin ang promotion opportunities.

Magpapalabas naman ang DepEd ng guidelines para suriin ang mga guro at school leaders na nafahangad ng promosyon, kabilang na ang ‘assessment process, criteria, point system, at standards-based assessment’ upang masiguro ang ‘transparency at accountability.’

Para palakasin ang implementasyon, inatasan ang TEC na i-align at pangasiwaan ang papel ng National Educators Academy of the Philippines at Bureau of Human Resource and Organizational Development ng DepEd.

Ang DepEd, CSC, PRC, at DBM, sa pagsangguni sa TEC at iba pang education stakeholders, ay dapat ipalabas ang implementing rules and regulations ng batas sa loob ng 90 araw ng pagiging epektibo nito.

Ang IRR ay magiging epektibo 30 araw matapos na mailathala sa pahayagan na may general circulation. ( Daris Jose)

KUMPIYANSA ang Department of Budget and Management (DBM) na mananatiling “on track” ang deliberasyon ng 2026 national budget sa gitna ng pagbabago sa liderato ng Mababang Kapulungan ng Kongreso.

Umaasa si Budget Secretary Amenah Pangandaman na susunod ang bagong liderato ng Kongreso sa itinakdang legislative calendar.

“Of course, we don’t want (a re-enacted budget). On-track naman sila, tuloy-tuloy naman ang budget deliberation natin,” ayon sa Kalihim.

Sa ulat, pormal nang nagbitiw si Leyte Rep. Ferdinand Martin Romualdez bilang lider ng House Speaker. Sa botong 253, nasungkit ni Isabela 6th District Rep. Faustino “Bojie” Dy ang posisyon bilang bagong House Speaker.

Sinabi ni Pangandaman na imo-monitor ng DBM kung paano tutugunan ng House deliberations ang pagkakatapyas sa budget ng Department of Public Works and Highways (DPWH) at ang posibleng epekto nito sa infrastructure spending targets.

“Hindi pa namin na-compute sa target na 5 to 6 percent (of GDP), siguro tingnan muna natin kung anong mangyayari sa budget deliberation kung ano ‘yong effect,” ang sinabi pa rin ng Kalihim.

Aniya, saklaw ng infrastructure budget ang “hard” at “soft” components, gaya ng konstruksyon ng school buildings.

Nauna rito, tinapyasan ngP255 billion ang panukalang budget ng DPWH para sa locally-funded flood control projects.

( Daris Jose)

MULING ibinoto si 4Ps Party List Rep. Marcelino “Nonoy” Libanan bilang House minority leader matapos makakuha ng unanimous vote mula sa 27-miyembrong minority bloc sa isinagawang caucus matapos na mailuklok si Isabela Rep. Faustino Dy III bilang bagong Speaker.

Ang pagkakahalal kay Dy ay kasunod na rin sa pagbibitiw ni Leyte Rep. Martin Romualdez mula sa naturang posisyon.

Ang minority group ay binubuo ng mga mambabatas na hindi bumoto kay Dy bilang speaker.

Kabilang sa mga kongresistang bumoto kay Libanan ay sina Arlene Bag-ao (Dinagat Islands, Lone District), Edgar Erice (Caloocan City, Second District), Cielo Krisel Lagman (Albay, First District),      Jesus Suntay (Quezon City, Fourth District), Audrey Kay Zubiri (Bukidnon, Third District),   Christopher Sheen Gonzales (Eastern Samar, Lone District), Stephen James Tan (Samar, First District),    Reynolds Michael Tan (Samar, Second District), Niko Raul Daza (Northern Samar, First District),     Leila De Lima (Mamamayang Liberal), Jose Manuel Diokno (Akbayan), Percival Cendaña (Akbayan),  Dadah Kiram Ismula (Akbayan), Paolo Henry Marcoleta (Sagip), Jonathan Clement Abalos II (4Ps),       Presley De Jesus (Philreca), Sergio Dagooc (Apec), Antonio Tinio (ACT-Teachers),Renee Louise Co (Kabataan), Roberto Gerard Nazal Jr. (Bagong Henerasyon), Jernie Jett Nisay (Pusong Pinoy),       Allan Ty (LPGMA), Terry Ridon (Bicol Saro), Elijah San Fernando (Kamanggagawa), Arlyn Ayon (Swerte) at Iris Marie Montes (4K).

(Vina de Guzman)

NAARESTO ng mga operatiba ng Bureau of Immigration (BI) Fugitive Search Unit (FSU) at Makati Police ang isang Australian national dahil sa paggamit ng iba’t ibang pekeng pagkakakilanlan at overstaying sa Makati City.

Ayon sa nagrereklamo, si Camphell ay may aliases na Dio Munro at Daniel John at gumagamit ng mga pekeng immigration documents kaya gusto niya itong ipa-deport.

Dagdag pa ng nagrereklamo na si Camphell ay nasangkot din sa droga at may kaso rin ng pag-aabuso.

Sa ulat ng Australian Embassy si Camphell ay nahaharap sa kasong paglabag sa Republic Act 9262, o Anti-Violence Against Women and Their Children Act of 2004 laban sa kanyang live-in partner noong 2021..

Ayon naman sa BI database, pumasok sa bansa si Camphell noong February 22 gamit ang isang Australian passport pero unang ginamit ang isang Seychelles passport. Nakapasok siya sa bansa bilang temporary visitor subalit hindi nag-apply ng visa extension kaya’t maituturing siyang overstaying.

Kinumpirma rin ng United States Drug Enforcement Administration (DEA) na si Camphel ay iniimbestigahan sa money laundering at narcotics trafficking at umano’y kasama siya sa isang motorcycle gang at gumagamit ng pekeng US drivers license.

(Gene Adsuara)

ITINURN-OVER ni Manila Mayor Francisco “Isko Moreno” Domagoso kay Pangulong Ferdinand “Bongbong” Marcos Jr. ang Drainage Master Plan ng lungsod bilang suporta nito sa pagsisikap ng administrasyon na tugunan ang pagbaha sa kabisera ng bansa.

Sinimulan ang Drainage Master Plan, noo unang kanyang termino noong 2021 at natapos bago siya bumalik sa City Hall noong 2025, na nagbibigay ng siyentipiko at teknikal na balangkas upang matugunan ang patuloy na problema sa pagbaha sa Maynila.

Bukod sa Drainage Master Plan, ibinigay din ng Alkalde ang operations plan ng Lungsod na tinawag na “Opla Pagmamahal sa Bayan” sa darating na September 21 mass protests sa Maynila na nagdedetalye sa paglalagay ng Incident Command System, mobilization of health, disaster response, traffic, and public service personnel, at koordinasyon sa Manila Police District (MPD).

Bilang tugon, sinabi ni Pangulong Marcos kay Mayor Domagoso na i-coordinate ang drainage master plan ng lungsod ng Maynila sa Department of Public Works and Highways (DPWH) at Metro Manila Development Authority (MMDA).

Tiniyak naman ng Alkalde sa Pangulo na handa ang pamahalaang lungsod na makipagtulungan sa pambansang administrasyon.

“Rest assured that the City Government of Manila stands ready to work with your administration in pursuit of sustainable development and the well-being of our people,” ani Domagoso.

Kasama rin sa pagbisita nina Pangulong Marcos at Mayor Domagoso sina Vice Mayor Chi Atienza, Congressman Ernix Dionisio at si Manila Department of Social Welfare (MDSW) Director Jay Reyes Dela Fuente.

 (Gene Adsuara)

NILAGDAAN ni Pangulong Ferdinand R. Marcos Jr. ang isang batas na pinapayagan ang gobyerno na magdeklara ng “State of Imminent Disaster” bago pa humagupit ang kalamidad upang ang paghahanda at emergency actions ay kagyat na maisagawa nang maaga para protektahan ang mga komunidad

Sa ilalim ng Republic Act No. 12287, magtatatag ang gobyerno ng mekanismo para sa pagdedeklara ng State of Imminent Disaster and magbibigay ng pamantayan para sa deklarasyon nito at pagbawi, at maging ang kinakailangang appropriations.

Sa ilalim naman ng R.A. No. 12287, o Declaration of State of Imminent Disaster Act na nilagdaan ni Pangulong Marcos noong September 12, pinahihintulutan ang Chief Executive na magdeklara ng State of Imminent Disaster sa mga piling barangay, munisipalidad, lungsod, lalawigan at rehiyon sa rekumendasyon ng National Disaster Risk Reduction and Management Council (NDRRMC).

Ang local chief executives, sa rekumendasyon ng Regional Disaster Risk Reduction Management (DRRM) Councils, maaaring magdeklara ng State of Imminent Disaster sa pamamagitan ng isang executive order sa kani-kanilang hurisdiksyon na hinuhulaang maaapektuhan ng nalalapit na sakuna.

Ang NDRRMC o Regional DRRM Councils ay dapat na magsagawa ng pre-disaster risk assessment sa inaasahang ‘highly probable disaster na may projected catastrophic impacts’ na magiging basehan ng deklarasyon.

“The classification of a forecasted hazard’s impacts as severe or its equivalent, with adverse effects on the population, and an allowable or sufficient three-day lead time for the national or local government to implement anticipatory action interventions must be present in the pre-disaster risk assessment. The allowable lead time may be extended to five days,” ayon sa ulat.

Papayagan naman ng Declaration of a State of Imminent Disaster ang National, Regional, at Local DRRM Councils na gamitin ang national at local resources at mga mekanismo para ipatupad ang anticipatory actions sa loob ng natukoy o ‘allowable lead time.’

Kabilang dito, ang “disseminating public information advisories on recommended actions to relevant sectors; mobilizing and prepositioning inter-agency response teams; initiating pre-emptive or forced evacuation; mobilizing duly accredited and trained volunteers; and procuring, mobilizing, prepositioning, and distributing food at non-food items to forecasted affected population.”

Kabilang sa iba pang hakbang ay ang pagpapatupad ng social amelioration program para sa indigent at most vulnerable population; isagawa ang contingency plans para pagaanin ang pinsala sa agricultural products at food supply; at magbigay ng technical at advisory assistance upang masiguro ang ‘public health at kaligtasan.

Ipinag-utos naman ng batas sa NDRRMC, sa pamamagitan ng chairperson nito, na may konsultasyon sa mga kaugnay na stakeholders, na magpalabas ng kinakailangang rules and regulations, kabilang ang operational guidelines at procedures para sa epektibong implementasyon sa loob ng 60 araw matapos na aprubahan ito. ( Daris Jose)

TIMBOG ang isang lalaki na wanted sa kaso ng homicide matapos matunton ng tumutugis na mga pulis sa kanyang tinutuluyan sa Valenzuela City.

Hindi na nakapalag ang 30-anyos na akusado nang bitbitin siya ng mga operatiba ng Intelligence Section ng District Mobile Force Battalion (DMFB) ng Northern Police District (NPD).

Sa ulat, ang akusado ay kabilang sa mga Most Wanted Person ng Valenzuela City Police dahil sa kasong Homicide.

Nang makatanggap ng impormasyon ang mga operatiba Intelligence Section ng DMFB hinggil sa kinaroroonan ng akusado, agad nilang ikinasa ang manhunt operation.

Dakong alas-12:30 ng hating gabi nang tuluyang makorner ng mga operatiba ng DMFB ang akusado sa kanyang tinutuluyan sa Pablo Street, Barangay Karuhatan.

Dinakip ang akusado sa bisa ng warrant of arrest na inisyu ng Valenzuela City Regional Trial Court (RTC) Branch 270 para sa kasong Homicide noong September 15, 2025, na walang inirekomendang piyansa.

Pansamantalang nakapiit ang akusado sa custodial facility unit ng NPD habang hinihintay ang pagpapalabas ng commitment order mula sa korte para sa paglilipat sa kanya sa City Jail. (Richard Mesa)

BAGSAK sa selda ang apat na kelot nang maaktuhan ng pulisya na naglalaro umano ng illegal na sugal at makuhanan pa ng droga ang dalawa sa kanila sa magkahiwalay na lugar sa Valenzuela City.

Ayon kay Valenzuela Police Acting Chief P/Col. Joseph Talento, nakatanggap ng impormasyon ang mga tauhan ng Ugong Police Sub-Station 8 mula sa isang concerned citizen na may nagaganap umanong illegal gambling sa Sia Compound, Lamesa St., Brgy., Ugong.

Agad namang ipinag-utos ni SS8 Commander P/Capt. Joan Dorado sa kanyang mga tauhan na respondehan ang naturang ulat at pagdating sa lugar ay naaktuhan ang dalawang lalaki na abala umano sa paglalaro ng sugal na ‘Dice’ dakong alas-4:20 ng Miyerkules ng hapon.

Nasamsam ng mga pulis sa mga suspek na sina alyas “Brian” at alyas “Bongyaw” ang bet money, isang pirasong Dice at isang plastic sachet na naglalaman ng hinihinalang shabu na nakuha kay ‘Brian’.

Nauna rito, nadakma naman ng mga tauhan ng Marulas Police Sub-Station 3 sina alyas “Gino” at alyas “Joel” nang mahuli sa akto na nagsusugal ng ‘cara y cruz sa La Huerta St., Brgy. Marulas bandang alas-6:35 ng gabi.

Nakumpiska sa kanila ang bet money, tatlong peso coins ‘pangara’ at isang plastic sachet na naglalaman ng hinihinalang shabu na nakuha kay alyas Gino.

Mahaharap ang mga suspek sa kasong paglabag sa PD 1602 habang karagdagan na kasong paglabag sa R.A 9165 o ang Comprehensive Dangerous Drug Act of 2002 ang kakaharapin pa nina ‘Brian’ at ‘Gino sa Valenzuela City Prosecutor’s Office. (Richard Mesa)