PERSONAL na binisita ni Mayor John Rey Tiangco para batiin si Lola Prudencia Solomon ng Brgy. Bangkulasi, na kamakailan ay naging centenarian matapos magdiwang ng kanyang ika-100 kaarawan. Siya ay nakatanggap ng P10,000 mula sa Pamahalaang Lungsod ng Navotas at makakatanggap din siya ng P100,000 mula sa pamahalaang nasyonal. (Richard Mesa)

TINAWAG na forum shopping ni Justice Secretary Jesus Crispin Remulla  ang paghahain ni Acting Davao City Mayor Baste Duterte ng kasong kidnapping laban sa kanya sa Ombudsman Mindanao.

Giit ni Remulla, gusto lamang subukan na pabagsakin ang kanyang kagustuhang maging Ombudsman.

Aniya, may naka-pending pang kaso si Atty. Israelito Torreon sa Korte Suprema hinggil sa illegal na pag-aresto at pagpapadala kay dating Pangulong Rodrigo Duterte sa Internationa Criminal Court (ICC).

Ayon pa kay Remulla, gusto nilang gawing imposible para sa JVC na makuha ang mga kinakailangan na requirements na kanyang isinumite.

“It’s really an organized effort to shoot down my candidacy sa Ombudsman”, dagdag pa ni Remulla.

Aminado naman ang kalihim na wala pa rin siyang clearance para sa aplikasyon nito sa posisyon para maging Ombudsman dahil sa inihaing Motion for Reconsideration ni Sen. Imee Marcos sa pagbasura ng kaniyang mga pending cases sa Ombudsman.  (Gene Adsuara)

TARGET ng Commission on Elections (Comelec) na makapagrehistro ng hindi bababa sa tatlong milyong overseas voters para sa 2028 national at local elections (NLE).

Positibo si Comelec Chairperson George Garcia sa pagkamit ng target na overseas voter registrants dahil ito ay magiging presidential elections.

Sinabi ni Garcia na umaasa silang makakuha ng humigit-kumulang dalawang milyong bagong botante kapag natuloy ang rehistrasyon ng botante sa ibang bansa sa Disyembre 1.

Dagdag pa niya, hihingi rin sila ng tulong sa iba pang ahensya ng gobyerno upang maabot ang kanilang target sa pagpaparehistro.

Ang panahon ng pagpaparehistro ng botante sa ibang bansa ay tatakbo hanggang Setyembre 30, 2027.

Ginanap noong Disyembre 9, 2022 hanggang Setyembre 30, 2024, ang huling pagpaparehistro sa ibang bansa kung saan humigit-kumulang 200,000 ang nagparehistro.

Mayroong kabuuang 1.241 milyong rehistradong botante sa ibang bansa noong Mayo 12 midterm elections. (Gene Adsuara)

MAHIGIT 1,000 pamilya na benepisyaryo ng Emergency Housing Assistance Program (EHAP) ng National Housing Authority (NHA) na bahagi ng Handog ng Pangulo: Serbisyong Tapat para sa Lahat program ang nakatanggap ng tig-P10K tulong pinansyal na emergency relief para sa kanilang gastusin sa pabahay.

Ito’y naisakatuparan sa pakikipagtulungan ng Pamahalaang Lungsod ng Caloocan sa NHA sa pamamagitan ng Housing and Resettlement Office (HARO) at Caloocan City Social Welfare and Development Department (CSWDD).

Nagpahayag naman ng pasasalamat si Mayor Dale Gonzalo “Along” Malapitan sa NHA at binigyang-diin ang sariling hakbangin ng pamahalaang lungsod na palakasin ang mga lokal na programa sa pabahay.

“Makaaasa po ang pamunuan ng NHA at ng iba pang ahensya ng pamahalaang nasyonal na mananatili nilang katuwang ang ating administrasyon sa pagsasaayos ng sistema ng pabahay sa ating lungsod. Maraming salamat po sa inyo,” ani Mayor Along.

“Hindi naman po lingid sa ating kaalaman na mayroon pa tayong mga kababayan na wala pang kasiguraduhan pagdating sa kanilang mga tahanan. Kaya naman mula noong nagsimula ang ating pamumuno, sinimulan natin ang pagpapatayo ng Deparo at Banker’s Residences, kasabay pa ng pagtulong sa ating mga matagal nang residente ng Caloocan na magkaroon ng Certificate of Entitlement for Lot Allocation (CELA),” dagdag niya. (Richard Mesa)

NAGSAGAWA ng piket ang Kilusang Magbubukid ng Pilipinas (KMP), AMIHAN National Federation of Peasant Women at mga magsasaka sa harap ng Kongreso kasabay ng pagdinig sa badyet ng Department of Agriculture (DA) kahapon Lunes, Setyembre 15.

Tinutukan ng mga magsasaka ang P16-bilyong pondo para sa Farm-to-Market Roads (FMR) sa 2026, sa gitna ng higit 36,000 kilometrong backlog na katumbas ng P300 bilyon. Ayon sa datos ng DA, umaabot sa P15 milyon ang halaga bawat kilometro ng FMR, ngunit libo-libong kilometro pa rin ang hindi natatapos. Kagaya sa mga ghost flood control projects, kailangan maisiwalat kung nasaan ang mga “ghost roads” na pinopondohan mula sa buwis ng taumbayan.

Kasabay nito, hihilingin din ng KMP ang pagbusisi sa Rice Competitiveness Enhancement Fund (RCEF) na pinalaki mula P10 bilyon tungong P30 bilyon kada taon ngunit mababa ang paggamit at delayed ang pagbibigay ng pondo sa magsasaka. Mula sa 86% utilization noong 2020 bumagsak sa halos 29% pagsapit ng 2023. Nanawagan ang mga magsasaka ng malinaw na ulat kung saan napupunta ang bilyon-bilyong pondo at kung paano ito direktang nakikinabang sa kanila.

“Bawat pisong inilaan sa FMR at RCEF ay dapat mapunta sa magsasaka at sa produksyon ng pagkain, hindi sa korapsyon,” giit ng KMP.

Hihilingin din ng grupo na ang P260 bilyong badyet para sa flood control na nakalagay pa rin sa NEP 2026 ay ilipat o ilaan para sa pondo para sa production subsidy o ayuda sa mga magsasaka at mangingisda. (Vina de Guzman)

HINIKAYAT ni Speaker Ferdinand Martin Romualdez ang Department of Social Welfare and Development (DSWD) na palawigin ang Pag-Abot Program na naglalaan ng short-term at long-term assistance sa naninirahan sa kalsada at disadvantage families, at mabigyan ang mga ito ng pangkabuhayan at buhay na may dignidad.

Ang panawagan ay kasunod na rin sa ginawang pamamahagi ng DSWD ng ilang farming implements sa 521 Aeta families sa Barangay Maruglo, Capas, Tarlac, bilang bahagi ng patuloy nitong pagbibigay tulong sa mga indigenous people na maging self-reliant at iwasan ang pamamalimos sa kalsada partikular kapag panahon ng Kapaskuhan.

“The Pag-Abot Program is a critical social safety net that fills gaps in our poverty alleviation measures. It is also proof of President Ferdinand R. Marcos Jr.’s strong commitment to eradicate poverty in line with the Philippine Development Plan 2023-2028 and the United Nations Sustainable Development Goals,” ani Romualdez.

Binanggit nito ang Executive Order No. 52, series of 2024, na nilagdaan ni Presidente Marcos noong January 18, 2024, para sa Pag-Abot Program bilang susi sa inisyatibo ng gobyerno na maipaabot ang tulong at suporta sa mga vulnerable, disadvantaged, at hard-to-reach populations sa bansa.

Bahagi ng ibinigay na suporta ng DSWD sa pamilya Aeta ay 50 kalabaw, 10 hand tractors na may trailers, 9 mini-tiller cultivators, 10 grass-cutters, 10 water pumps, 33 knapsack sprayers, 6 power sprayers, 4 mini palay threshers, at 3 rice mills.

Bukod pa ito sa 91 kalabaw na una nang ipinamahagi ng ahensiya sa pamilyang Aeta ni-rescue na nagpunta sa Metro Manila noong December 2023.

“These farm implements for our Aeta brothers and sisters in Tarlac are not just tools to till the land. They are also symbols of hope—hope that with hard work and determination, supported by responsive government programs, a brighter future is within reach for their families and communities,” pahayag ni Speaker.

Pinapurihan naman nito ang liderato ni DSWD Secretary Rex Gatchalian sa pagsisiguro na matukoy ng Aeta community ang kinakailangan nilang tulong. (Vina de Guzman)