PINAPURIHAN ni Speaker Ferdinand Martin Romualdez ang data sharing agreement sa pagitan ng Technical Education and Skills Development Authority (TESDA) at ng Department of Education (DepEd).

Dahil dito, mapapabilis aniya ang pagbibigay ng certification ng senior high school students sa ilalim ng technical-vocational-livelihood (TVL) track at magbubukas sa mas malawak na oportunidad para sa kanilang employment at paglago ng career.

“This partnership ensures that our SHS-TVL learners will suffer no delay in accessing TESDA’s assessments and services. With faster and more accurate certification, our graduates can more quickly pursue jobs or further studies, giving them a real head start in life,” ani Speaker Romualdez.

Iginiit nito na ang pagsasanib puwersa ng Assessment Schedules Information System (ASIS) ng TESDA sa Learners Information System (LIS) ng DepEd ay magtatanggal sa bottleneck sa pagtatakda at validation at magsisiguro na ang mga mag-aaral sa SHS-TVL ay agad na maassess at masesertipakahan.

“Sa pamamagitan ng kasunduang ito, masisiguro natin ang mas mabilis at mas may na proseso para makakuha ng TESDA certification na ang ating mga kabataang nasa TVL track. Ito ang magsisilbing susi upang mas marami sa kanila ang makahanap ng magandang trabaho o magpatuloy sa mas mataas na antas ng pagsasanay,” pahayag pa ni Romualdez.

Ang pahayag ng speaker ay kasunod sa paglagda nina TESDA Secretary Francisco Benitez at DepEd Secretary Sonny Angara ng kasunduan na pagsanibin ang kani-kanilang databases para sa mga TVL learners sa buong bansa.

Para naman matugunan ang isyu sa data privacy, winelcome din ni Romualdez ang kasiguruhang ibinigay na naglagay ang dalawang ahensiya ng data protection officers at nagpatupad na rin ng mahigpit na pamantanan kabilang na ang encryption, multi-factor authentication at breach notification protocols. (Vina de Guzman)

NAGPAHAYAG ng kumpiyansa ang Department of Agriculture (DA) na mananatiling nasa “controlled levels” o mas bumaba pa ang presyo ng retail rice sa panahon ng “ber” months sa kabila ng ipinatutupad na 60-day rice import ban na naging epektibo nitong Setyembre 1.

Winika ni Agriculture spokesperson Assistant Secretary Arnel De Mesa na ang pansamantalang pagpapatigil ay hindi nagresulta ng anumang pagsipa sa market prices.

“Ang maganda rito, despite ‘yung import ban itong first two weeks, we’re not seeing a spike sa prices ng rice. It’s a very good indication,” ang sinabi ni De Mesa sa isang panayam.

Aniya pa, posible na mas bumaba pa ang retail prices, suportado ang pagtataya ng Philippine Statistics Authority’s (PSA) na deplasyon para sa bigas sa mga susunod na buwan.

“Possible iyon talaga plus ‘yung continuous effort of the department to promote the Rice for All plus and P20, you can really expect the prices to continue to go down,” aniya pa rin.

Sa kabila ng import ban, ang maximum suggested retail price (MSRP) para sa 5% na broken imported rice ay nananatili sa P43 per kg.

“As of Sept. 10, the prices of premium imported rice in Metro Manila range from P42 to P52 per kg., while local premium rice is priced between P42 and P60 per kg., ” ayon sa Bantay Presyo ng DA.

Ang presyo ng imported ay mula P40 hanggang P50 per kg., habang ang local well-milled rice ay P38 hanggang P52 per kg.

Samantala, itinuturong dahilan ni De Mesa ang ‘rice deflation’ sa paglakas ng ani ng local palay (unhusked rice) at matatag na rice stock inventory sa bansa.

“The country’s rice inventory stood at 2.32 million MT in August, the highest for the month in a decade,” ang makikita sa data ng PSA.

Tinukoy pa rin ni De Mesa ang record ng pag-ani sa mga pangunahing rice-producing countries at mas mababang international rice prices bilang karagdagang dahilan na sumusuporta sa price stability.

( Daris Jose)

TULOY-tuloy ang pamamahagi ng Calamba City Social Pension sa pangunguna ng butihing Mayor Ross Rizal para sa lahat ng minamahal na Senior Citizens.

Ngayong araw, nakapunta sila sa Brgy. Barandal (1276 beneficiaries) at Brgy. Bucal (1799 beneficiaries) upang personal na maihatid ang benepisyo.

Pahayag pa ni Mayor, “Huwag mag-alala mga kababayan, dahil may nakatakdang schedule rin sa inyong mga barangay sa mga susunod na araw. Lubos ang ating pasasalamat sa ating mga taxpayers—kayo po ang tunay na katuwang sa programang ito.”

( Boy Morales Sr.)

MALUGOD na tinanggap ng top envoy ng Pilipinas sa Washington ang probisyon ng karagdagang $250-million aid mula sa Estados Unidos para tulungan ang inisyatiba ang administrasyong Marcos ukol sa public health at tuberculosis prevention.

Sinabi ni Ambassador Jose Manuel Romualdez na ang ‘fresh funding’ ng Estados Unidos para sa Pilipinas ay pagbibigay-diin sa commitment nito na mas palakasin ang ugnayan sa long-time treaty ally sa lahat ng aspeto kabilang na ang kalusugan.

“This is another clear manifestation of the deep alliance we have with the United States especially after Pres. Marcos’ official visit to the United States last July where he and President (Donald) Trump established a strong personal working relationship,” ayon kay Romualdez.

Sa kabilang dako, sinabi naman ni US Ambassador MaryKay Carlson na ipinakikita lamang ng bagong tulong na “the US is proud to stand with the Philippines as friends, partners, allies to build a safe, strong, prosperous future for our peoples.”

Ang hakbang ay matapos na inanunsyo ni US Secretary of State Marco Rubio noong Hulyo ang $63-million funding na naglalayon na pagtibayin at itaguyod ang ‘energy, maritime, at economic growth programs’ ng Pilipinas.

Ito ang kauna-unahang anunsyo ng US government ukol sa bagong foreign assistance para sa kahit na kaninumang bansa sa mundo simula ng magsimula ang second Trump administration.

Tinatayang may $15 million mula sa nasabing halaga ang magsisimulang gamitin para sa private sector development sa Luzon Economic Corridor, isang US-envisioned growth region sa Asya, na naglalayong itaas ang kalakalan at magtatag ng isang economic hub sa hilagang bahagi ng Pilipinas sa pamamagitan ng pangunahing imprastraktura at iba pang mahahalagang proyekto.

Sinabi pa ni Rubio na ang karagdagang $250 million na tulong ng Washington sa Pilipinas ay naglalayon at hangad na tugunan ang tuberculosis, maternal health at banta ng umuusbong na mga sakit. (Daris Jose)

ISANG araw bago pa ang kanyang ika-68 taong kaarawan, nagbigay na si Pangulong Ferdinand Marcos Jr., ng isang masayang Salo-salo sa Palasyo sa Kalayaan grounds ng Palasyo ng Malakanyang.

Ipinagpapatuloy lamang ni Pangulong Marcos ang tradisyon ng pagdiriwang ng kanyang ‘special day’ kasama ang mga mamamayang Filipino.

Sa katunayan, muli ay binuksan ang Malakanyang para sa publiko, mainit na tinanggap ang mga tagasuporta mula sa ibat ibang lugar sa Metro Manila at hanggang sa Ilocos region, na dumating para personal na batiin ang Pangulo sa kanyang kaarawan.

Sa kabilang dako, dumating ang Pangulo sa venue sakay ng golf cart kasama si Unang Ginang Liza Araneta-Marcos, mainit na kumaway sa crowd bago pa nakisali sa mga ito sa selebrasyon. Nakiisa rin sa nasabing okasyon ang kanyang mga anak.

Hindi naman nagbabago ang birthday wish ni Marcos mula noon hanggang ngayon at ito ay ang magkaroon ng maayos na buhay ang bawat Filipino.

Kasama aniya sa kanyang mga harangin ang pagpapatuloy ng mga proyekto ng pamahalaan na tutulong lalo na sa mga mahihirap na Filipino.

Desidido rin aniya siyang abutin ang kanyang pangarap na matuldukan ang gutom sa bansa.

Samantala, ang Salo-salo sa Palasyo ay naging annual tradition sa ilalim ng administrasyong Marcos, sumisimbolo sa pagiging bukas, pasasalamat at matibay na pagbubuklod sa agitan ng Pangulo at mga taong kanyang pinaglilingkuran. (Daris Jose)

CAPTION: Pinarangalan ni Pangulong Ferdinand R. Marcos Jr. kasama si DAR Secretary Conrado Estrella III sa ginanap na Gawad Agraryo ang mga magsasaka, organisasyon, at komunidad na nagpamalas ng natatanging kontribusyon sa agrikultura, maliban sa plake at medalya, nakatanggap ng cash award na halagang tig-PhP25,000 ang 10 Most Outstanding Agrarian Reform Beneficiaries (ARB), at mga proyektong halagang PhP70,000 ang tatlong Most Progressive ARB Organizations at apat na Most Progressive Agrarian Reform Communities. (Boy Morales Sr.)

HINAMON ni Chairman Emeritus Dr. Jose Antonio Goitia ang mga Filipino kung ano talaga ang isang bansa kung hindi kayang ipagtanggol ng sariling dangal.

Ayon kay Goitia, sang-ayon siya sa pahayag ni Pangulong Ferdinand Marcos na ang soberanya ay hindi lamang paksa ng debate, hindi isang bagay na puwedeng pagpalit o ipagbili kundi ito ay buhay ng ating bayan.

Dagdag pa ni Goitia na hindi rin teorya ang laban dito kundi ito ay tungkol sa kinabukasan ng ating mga anak at kaligtasan ng ating karagatan at ang tinatawag na soberanya ay hindi pagbibitiw ng salita kundi pagdedeklara ng karapatan ng buong sambayanan na tumangging apihin.

Ipinaalala ni Goitia na hindi teorya lamang ang laban na ito. “Ito ay tungkol sa kinabukasan ng ating mga anak, sa pagkain sa hapag-kainan ng bawat pamilya at sa kaligtasan ng ating karagatan. Kapag sinabi ng Pangulo na ang soberanya ay hindi maaaring ipagpalit, hindi siya basta nagbibitaw ng salita. Idinedeklara niya ang karapatan ng buong sambayanan na tumatangging apihin.”

Hinimok ni Goitia ang mga Filipino na lubos magkaisa. “Araw-araw, hinaharap ng ating mga mangingisda ang banta sa karagatan. Ang ating mga sundalo ay inilalagay sa panganib ang kanilang buhay upang bantayan ang ating mga karagatan. Ang ating mga pinuno ay humaharap sa matinding hamon mula sa buong mundo. Ang pinakamaliit na magagawa natin ay tumindig kasama nila. Ang pagkakawatak-watak ay kahinaan. Ang pagkakaisa ang ating lakas. Ang soberanya ay tungkulin ng bawat Pilipino.”

Ipinahayag din ni Chairman Emeritus Goitia na ang multi-awarded na dokumentaryong “Food Delivery: Fresh from the West Philippine Sea” ay isang matibay na katotohanan kung bakit mahalaga ang laban na ito kung saan ipinapakita ang katotohanang kinakatakutan ng Tsina, ang mukha , paghihirap at tapang ng mga mangingisda.

Ayon pa kay Goitia, isa pang bagong pelikula na may malawak na saklaw sa hirap at pagsubok ng mga bayani sa West Philippine Sea. Dito ay ipapakita ang karahasan at pang-aabuso ng mga dayuhang mananakop. Ipapakita rin dito ang tunay na karapatan sa ilalim ng pandaigdigang batas na ginawa ng Blessed Movement sa pamumuno ni Chairman Herbert Martinez.

“Hindi kailanman maaaring ipagbili ang diwa ng Pilipino. Ang ating mga dagat ay atin, ayon sa batas, ayon sa kasaysayan at ayon sa sakripisyo. Sa pamumuno ni Pangulong Marcos at sa pagkakaisa ng sambayanan, hindi tayo kailanman susuko, hindi tayo bibitaw, at hindi tayo patatahimikin. Ang soberanya ay hindi maaaring ipagpalit, at panahon na upang igalang ito ng buong mundo.” ayon kay Goitia. (Gene Adsuara)