INIUTOS ng Bangko Sentral ng Pilipinas (BSP) sa mga electro­nic wallet (e-wallet) na i-unlink ang kanilang serbisyo sa mga online gambling platform sa loob ng 48 oras.

Ginawa ni BSP De­puty Governor Mamerto Tangonan ang direktiba sa pagdinig ng Senado kahapon.

Nangangahulugan ito na dapat ay wala nang mga laro sa online na pagsusugal na magagamit sa pamamagitan ng mga e-wallet.

Gayunman, kinuwestiyon ng mga senador kung bakit kakailanganin ng e-wallet ang dalawang araw na palugit.

Ipinaliwanag ni ­Tangonan na ang mga institusyon ay nanga­ngailangan ng panahon upang alisin ang mga link sa mga site na ito.

Idinagdag niya na nagbibigay din ito ng panahon sa mga mamimili na mag-withdraw ng kanilang pera mula sa kanilang mga online gaming account.

Samantala, sinabi ni Philippine Amusement and Gaming Corp ­(PAGCOR) Chairman Alejandro H. Tengco na pinag-iisipan nilang payagan lamang ang pagsusugal sa mga betting station, tulad ng manu-manong pagtaya sa karera ng kabayo.

Nang ungkatin ang isyu ng posibleng pagsuspinde ng paggamit ng credit card sa online gambling, nilinaw ni Tengco na hindi pinapayagan ng PAGCOR na gamitin ang mga credit card para bayaran ang mga utang sa sugal. (Daris Jose)

IKINATUWA ni Speaker Ferdinand Martin Romualdez ang ipinatupad na  pilot rollout ng gobyerno sa unified identification system para sa mga persons with disabilities (PWDs).

Una nang inihayag ng Department of Social Welfare and Development (DSWD) na nagsimula na ang pilot implementation ng programa sa 35 lugar sa buong bansa, simula sa San Miguel, Bulacan.

Sinabi ni Romualdez, principal author ng House Bill No. 16, na naglalayong mapalawak ang diskuwento sa mga senior citizens at PWDs, na ang hakbang ay isang patunay sa sinserong commitment ni Pangulong Marcos  na maprotektahan at maiangat ang mga nangangailangan.

Umaasa ito na makakatulong ang unified ID na mapagaan at mapabuti ang mga PWDs sa pamamagitanng pagbibigay serbisyo at benepisyo na makakarating sa kanila.

“Sa inisyatibong ito ng DSWD at ng National Council on Disability Affairs, matitigil na ang pagnanakaw at pagsasamantala ng ilan sa mga karapatan at benepisyo na nakalaan para sa ating mga kababayang may kapansanan,” Speaker. (Vina de Guzman)

NAGSAGAWA si Pangulong Ferdinand R. Marcos Jr., araw ng Biyernes, ng site inspection ng river protection at flood mitigation structures sa dalawang barangay sa Calumpit, Bulacan, sa gitna ng masusing imbestigasyon ng gobyerno sa flood control projects ng bansa.

Unang binisita ni Pangulong Marcos ang Barangay Bulusan upang inspeksyunin ang rehablitasyon ng river protection structure sa lugar.

Ang St. Timothy Construction Corporation, isa sa top three contractors ang nakakuha ng mayorya ng flood control projects sa buong bansa, nangasiwa sa P96.4-milyong rehabilitasyon ng river protection structure sa barangay.

Pagkatapos ng inspeksyon, sinabi ni Pangulong Marcos na hihingi siya ng paliwanag mula sa kompanya para sa substandard work nito at kabiguan na magsagawa ng ‘desilting.’

Kitang-kita sa mukha ng Pangulo ang matinding pagkadismaya sa maling pahayag na ang proyekto kabilang na ang desiltation process, ay kompleto na.

“Meron kaming mga picture, pati meron kaming mga diver na sinisid ‘yung sa ilalim, at nakita talaga, very manipis lahat ‘yung semento, hindi pantay-pantay. Basta hindi maganda ang trabaho. Talagang bibigay kaya bumigay na nga. Kaya’t kailangan nilang sagutin kung bakit ganito,” ayon sa Pangulo.

“What possible excuse do they have for not doing this? Hindi ko maisip. Tapos ito pa. Lahat ng flood control, may kasamang dredging at desiltation. Pero anong sabi sa akin? Ni minsan, hindi pa nakakita ng desiltation dito. Kasama sa kontrata ‘yun,” dagdag na wika nito.

Matapos ito ay tumuloy ang Pangulo sa Barangay Frances para i- assess ang flood mitigation structure.

Ang istraktura ay nagkakahalaga ng P77.1 million, itinayo ng Wawao Builders, kinilala bilang isa sa top 15 contractors na sangkot sa flood control projects.

Bagama’t ang lalawigan ay hindi nakalista na kabilang sa official flood-prone areas, ang Bulacan ang naiulat na mayroong ‘most number of flood control projects’ may kabuuang 668 at nagkakahalaga ng P6.5 billion.

Dahil dito, hinikayat ng Pangulo ang publiko na mag-report o isumbong ang mga iregularidad na flood control projects sa pamamagitan ng sumbongsapangulo.ph website.

“Mabuti nga ‘yung website nandyan na at marami nang nagsusumbong. Gamitin niyo ‘yun para sa flood control. Mag-report kayo. I-report niyo sa akin,” ang tinuran ni Pangulong Marcos.

“Hindi puwedeng ganito. Pambihira, this has been going on for years,” aniya pa rin. (Daris Jose)

MULING pinagtibay nina Pangulong Ferdinand R. Marcos Jr. at South Korean President Lee Jae Myung ang matatag na strategic partnership sa pagitan ng Pilipinas at South Korea, nangako ng mas matibay na pagtutulungan sa ‘kalakalan, tanggulan at cultural exchanges.’

“The commitment was made during Marcos’ phone call with Lee on Thursday,” ayon sa Presidential Communications Office (PCO).

“During their conversation, President Marcos conveyed his warm congratulations and expressed his full support for President Lee’s administration,” ang sinabi pa rin ng PCO sabay sabing “The two leaders reaffirmed their commitment to deepening the Strategic Partnership, emphasizing cooperation in key areas, such as trade and investment, defense and security, and people-to-people ties.”

Pinasalamatan naman ni Pangulong Marcos ang South Korea para sa patuloy na suporta sa ‘development and advocacies’ ng Pilipinas.

Binigyang diin nito ang kahalagahan na panatilihin ang international support para sa maritime interests at regional stability ng Pilipinas, na ‘consistent’ sa international law.

Looking forward naman si Pangulong Marcos na makapulong si Lee sa 2025 Asia-Pacific Economic Cooperation, kung saan ang South Korea ang magsisilbing host bago matapos ang taon.

Nagpahayag naman ng kanyang suporta si Lee para sa mas matibay na pagtutulungan sa pagitan ng South Korea at Association of Southeast Asian Nations (ASEAN), habang naghahanda ang Pilipinas na i assume ang chairship ng regional bloc sa 2026.

Samantala, itinatag ng Pilipinas at South Korea ang kanilang diplomatic relations noong March 3, 1949, tanda ng 76 taon na pormal na ugnayan ngayong 2025. (Daris Jose)

NAGSASAGAWA na ang gobyerno ng pangunahing reporma para palakasin ang maritime industry ng bansa at tiyakin ang kahandaan ng susunod na henerasyon ng mga filipino seafarers.

Sa isinagawang commencement exercises ng Philippine Merchant Marine Academy’s (PMMA) Kadaligtan Class of 2025 sa San Narciso, Zambales, tinukoy ni Pangulong Marcos ang mga mahahalagang inisyatiba na naglalayong paghusayin ang ‘training quality at global competitiveness’ ng Philippine maritime workforce.

“Each path is different, but you carry the same compass guiding you towards excellence and service. The seas are rife with danger. It will test you, it will push you to your limits, but above all, it will shape you into the mariner that you are meant to be,” ayon sa Pangulo.

“I believe your safe arrival at your destination is a triumph for yourself and for the people that you serve. Kaya naman tinitiyak ng pamahalaan na mas matibay at mas mataas ang antas ng pagsasanay ng ating bansa,” aniya pa rin.

Tinuran pa ng Pangulo na masusukat ng National Merchant Marine Aptitude Test ang kahandaan ng mga estudyante na ituloy ang maritime courses sa tertiary level, tiyakin na taglay nila ang kinakailangang foundational skills na kailangan para sa napakahigpit na academic at practical training.

Winika pa ng Pagulo na isinasapinal pa ng Maritime Industry Authority (MARINA) ang ‘maritime education at training program’ para pahintulutan ang’ smoother transition’ mula sa non-degree programs tungo sa full maritime degrees, buksan ang oportunidad para sa mga Filipino seafarers.

Aniya pa, tinatrabaho rin ng MARINA ang pagpapalawak sa oportunidad para sa onboard training.

“To our cadets, do not forget to carry your mission and carry on the tradition of excellence of the PMMA. Let this day inspire you to live up to your class’ name, bringing your own light event to the darkest of seas,” ayon kay Pangulong Marcos.

Ang Kadaligtan Class, kumakatawan sa “Kawal ng Dalampasigan, Liwanag ng Karagatan,” binubuo ng 252 kadete, na may 144 graduating ng Bachelor of Science (BS) in Marine Transportation at 108 naman ay BS in Marine Engineering.

Sa kabilang dako, hinirang si Midshipman 1st Class Marc John Castañeto mula Llanera, Nueva Ecija, bilang ‘top of the class.’ Siya ay anak ng retiradong elementary school teacher at isang retiradong bus conductor.

Ang PMMA ay isang government-funded institution na itinatag 205 taon na ang nakararaan, “dedicated to maritime higher education, producing the finest Filipino merchant marine officers to serve in marine and maritime-related industries worldwide.”

“Its graduates are bound to join the Philippine Navy, Philippine Coast Guard, and Merchant Marine Fleet as licensed marine engineers and deck officers, playing key roles in the global maritime industry and in strengthening the country’s maritime defense,” ayon sa ulat. ( Daris Jose)

SINAGOT ni Philippine National Police (PNP) Chief Gen. Nicolas Torre III ang abogado ng isa sa mga pulis na iniuugnay sa mga “nawawalang sabungero” dahil sa pagtatangka umanong guluhin ang imbestigasyon sa kaso.

Bilang abogado, sinabi ni Torre na lubos na nauunawaan ni Bernard Vitriolo na ang Criminal Investigation and Detection Group (CIDG) ay hindi tamang forum para makatanggap ng mga affidavit na pabor sa mga pulis na iniimbestigahan nito.

Nagbigay ng reaksiyon si Torre sa pahayag ni Vitriolo sa isang press briefing sa Quezon City noong Miyerkules, Agosto 13, kung bakit hindi inaksyunan ng CIDG ang mga affidavit na isinumite ng 12 testigo para sa mga pulis na iniugnay sa kaso ng mga nawawalang sabungero.

“He knows fully well that the CIDG is not the proper forum to submit counter-affidavits. They are not witnesses there (for the missing sabungeros). Ther proper forum to submit that affidavit is the Department of Justice,” ani Torre.

Para sa pulis na kinakatawan ni Vitriolo, binigyang-diin ni Torre na ang pulis na si Police Senior Master Sgt. Joey Encarnacion, ay suspek sa kaso, kaya hindi makatanggap ang CIDG ng anumang affidavit ng kanyang mga testigo na pabor sa kanya, o pabor sa iba pang pulis na sangkot sa kaso.

Sinabi ni CIDG Director Brig. Gen. Christopher Abrahano na natanggap ng ahensya ang mga affidavit noong Hulyo 11 ngunit sinabing hindi nila ito maaksyunan dahil sa mga isyu sa pamamaraan.

As a matter of procedure, ipinaliwanag ni Abrahano na dapat ay isang imbestigador ng CIDG ang dapat magtanong at tumulong sa paghahanda ng mga affidavit.

Sa kaso ng affidavits na tinutukoy ni Vitriolo, sinabi ni Abrahano na handa na ito nang isumite sa CIDG.

“We acknowledge the receipt of the documents that were brought here on July 11… but it begs the questions on the veracity of the statements since it is not our police investigators who prepared them,” sinabi ni Abrahano sa mga mamamahayag sa isang panayam sa Camp Crame.

Sa paliwanag ng tamang pamamaraan, sinabi ni Torre na ang pag-aangat ng isyu ng umano’y nawawalang affidavit ay may masamang motibo.

“It’s very clear (that the intent) is to muddle the case, unless the lawyer forgot the procedures,” sabi ni Torre. (PAUL JOHN REYES)

PINADI-DEKLARANG unconstitutional sa Korte Suprema ang batas na nagpapaliban sa Disyembre 2025 Barangay at Sangguniang Kabataan Elections (BSKE) ni Election Lawyer Romulo Macalintal.

Sa kanyang petisyon , iginiit ni Macalintal na hindi maaaring ipagpaliban ang halalan sa kadahilanang pagsasaayos ng termino sa panunungkulan ng mga opisyal ng BSK.

“The term of office of BSK officials had been fixed by law and, yet, their tenure in office appeared to vary with the vagaries of politics. Accordingly, with due respect, retroactive changes in terms of office – or legislated extension of tenure of incumbent officials – should be not be allowed to remain unchecked,” saad sa petisyon.

Kamakailan, nilagdaan ni Pangulong Ferdinand Marcos Jr. ang Republic Act No. 12232 bilang batas na naglilipat sa Disyembre 2025 BSKE sa unang Lunes ng Nobyembre 2026.

Si Macalintal ay isa sa pinakamahusay na naghain ng petisyon ayon kay retired Supreme Court Justice Antonio Carpio. (Gene Adsuara)

NAIS ng chairman ng House Special Committee on Food Security na ibenta ng direkta ng mga magsasaka ang kanilang ani sa pamamagitan ng government agencies online.

Sa House Resolution 155, ni Rep. Raymond “Adrian” Salceda, ang Department of Budget and Management (DBM) at Department of Agriculture (DA) ay magkasanib na bubuo ng isang digital marketplace sa ilalim ng Section 11 ng Republic Act No. 11321, o Sagip Saka Act, kung saan ang mga magsasaka at mangingisda na nakarehsitro sa Registry System for Basic Sectors in Agriculture (RSBSA) ay maaaring magbenta ng kanilang aani o huli ng direkta sa government agencies.

Nakasaad pa sa resolution na ang Government Procurement Policy Board (GPPB) ang mag-iisyu ng rules na magre-require sa mga agencies na bumili ng mandatory percentage ng kanilang food requirements para sa nutrition, feeding, at food assistance programs sa pamamagitan ng naturang platform.

“This is Sagip Saka in the digital age, and it makes full use of Section 11’s mandate to directly procure from farmers and fisherfolk. It will be simple, transparent, and easy to audit. Farmers will be able to post and sell directly to agencies online, without middlemen taking away their margins. Even the general public can buy from the platform,” ani Salceda.

Sa ilalim ng sistema, ang sinumang magsasaka o fisherfolk sa RSBSA ay otomatikong kuwalipikado na magbenta sa platform ng walang karagdagang accreditation, na nakasunod sa basic food safety standards.

Mas madali ang procurement rules para sa mga items na binili sa pamamagitan ng plataporma upang mas magiging mabilis ang transaksyon.

Umaasa ito na sa pamamagitan nito ay mas matatag ang government feeding at nutrition programs at kapaki-pakinabang sa magsasaka at food security. (Vina de Guzman)

INATASAN ni Pangulong Ferdinand R. Marcos Jr. ang mga kinauukulang ahensiya na magsagawa ng malalimang imbestigasyon hinggil sa kamakailan lamang na krimen kung saan sangkot ang isang guro at estudyante sa loob ng paaralan.

Sinabi ni Presidential Communications Office (PCO) Undersecretary at Palace Press Officer Claire Castro na ‘fully aware’ si Pangulong Marcos sa sunud-sunod na karahasan sa eskuwelahan at hangad ang agarang aksyon para tugunan ang usapin.

Binigyang diin ni Castro ang agarang imbestigasyon gayung ang mga mga sangkot sa krimen ay menor de edad at nagpahayag ng pagkabahala sa mental health sa mga kabataan.

“So, muli kailangan po talagang maimbestigahan ito lalo po at mayroong mga menor de edad na nasasangkot po dito at nagiging isyu na po talaga iyong mental health sa mga Kabataan,” ang sinabi ni Castro.

“So, hindi po ito tutulugan, at aaksyunan po ng mga concerned agencies agad-agad din po,” aniya pa rin.

Sa kabilang dako, inatasan na ni Pangulong Marcos ang Department of Education (DepEd), Department of the Interior and Local Government (DILG), at Philippine National Police (PNP) na tingnan ang crime incidents sa mga eskuwelahan.

Ipinag-utos na ng DepEd ang mas mahigpit na school safety measures at pinagtibay ang preventive measures, kasunod ng lumalagong alalahanin ukol sa school security sa gitna ng insidente ng school-based violence.

Samantala, winika ni Castro na wala pang posisyon ang Malakanyang sa panukalang mas ibaba ang minimum age ng criminal responsibility sa 10 taong gulang para sa mga kabataan na nakagawa ng heinous crimes.

“Sa ngayon, hindi ko po nakausap ang Pangulo patungkol po diyan pero tandaan natin even before kung hindi tayo nagkakamali ang Revised Penal Code naman nine below ang hindi exempted ‘no na makasuhan. Pero kapag may certain age 12 acting with discernment ay maaari naman po talagang makasuhan. Pero iyon lang iyong aking pagkakatanda, medyo matagal na po kasi iyong Revised Penal Code pagdating sa edad dahil ngayon po 15 below ay hindi nakakasuhan.,” ang sinabi ni Castro. ( Daris Jose)