HINIKAYAT ni Bacolod City Rep. Alfredo “Albee” Benitez sa liderato ng Kamara na pangatawanan ang pahayag nitong transparency sa budget deliberations na nagsimula nitong nakalipas na Lunes.

“It is clear that there is only one way forward in the way Congress conducts its business, particularly the crafting of the national budget—and that is the way of genuine transparency,” ani Benitez.

Kasabay nito ang panawagan na ilabas ang ulat ng small committee sa 2025 budget, kabilang na ang pangalan ng mga miyembro nito at mga pagbabago sa budget.

Nitong Lunes, nagkaroon ng stand off sa deliberasyon ng House Committee on Appropriations sa panukalang P6.793-trillion national budget para sa taong 2026 matapos manawagan si Navotas Rep. Toby Tiangco sa komite na ipalabas ang report ng small committee sa 2025 budget.

Binigyan diin ni Benitez ang pangangailangan na ilabas ang report ng lahat ng amendments na ginawa ng small committee sa 2025 national budget upang matukoy ang mga proponents ng projects at masiguro na matukoy ang nagpanukala sa panukalang alokasyon.

Ang pagpupulong ng small committee para pangasiwaan ang budget amendments sa isang closed-door meetings ay matagal na ring nakagawian sa malaking kapulungan ng kongreso. Noong nakalipas na taon, ang small committee ay binigyan ng kapangyarihan upang magsagawa ng pagbabago kahit inaprubahan na ito sa ikalawang pagbasa.

“Now is the time to walk the talk. If we demand transparency, we must practice it ourselves,” pahayag ni Benitez.

(Vina de Guzman)

MARIING itinanggi ni House Deputy Majority Leader at Oriental Mindoro 1st District Representative Arnan Panaligan na may kinalaman siya sa pagtukoy at implementation ng flood control projects sa kanyang distrito, na naisama ni Senator Panfilo Lacson sa kanyang privilege speech noong Miyerkules.

Ayon kay Panaligan, ang proyekto ay ginawa ng Department of Public Works and Highways. Idinagdag nito na wala siyang koneksyon at wala siyang naka-usap ang sinumang kontraktor na gumawa ng flood control projects.

“Hindi ako nagpalista n’yan. Wala tayong papel sa paglilista ng mga proyektong ‘yan. Sabi ko nga, ang tunay na sistema diyan ay dumarating sa Kongreso ang NEP (National Expenditure Program) nakalista na ang mga flood control projects na ‘yan, kung saan lugar, kung ano’ng amount. At ang implementor niyan ay walang iba kundi ang regional office ng DPWH,” paliwanag nito.

Wala rin aniyang papel ang congressman sa paggagawa ng program of works.

“Wala tayong kapasidad nyan, ang Kongreso. ‘Yan ay exclusive authority, exclusive na teritoryo ng DPWH, ang paggawa ng design, paggawa ng plano, pag-bid, pag-award ng kontrata at pagbabayad ng contractor. Wala tayong connection doon. Hindi natin nakakausap ang mga contractor na ‘yun… I never deal with contractors,” dagdag nito.

Sinabi nito na tukoy na ang mga flood control projects sa NEP at hindi na mabago.

Minsan aniya ay nagtangka siyang magpanukala na baguhin at ilipat sa ibang bayan na binabaha rin, pero sinabihan na hindi puwede nilang baguhin pa dahil identified na umano ito ng DPWH.

Ipinakita nito sa media ang kopya ng liham na ipinadala niya sa DPWH noong Hulyo noong nakalipas na taon upang talakayin ang nasirang flood control projects.

“As early as July 31, 2024, may sulat na ako kay Secretary Bonoan at tinatawagan ko ang kanyang pansin na doon sa distrito ko, sa Bayang Naujan, ay may mga nasira na flood control projects na bagong gawa. At ako’y nanawagan din sa kanya na i-rectify, i-correct ang mga flood control projects na ito na in-implement ng highways at tiyakin na nag-a-adhere sila sa rigid structural designs and standards in order to prevent the wastage of public funds,” giit ni Panaligan.

Sinabi nito na handa siyang makipagpulong kay Senador Lacson upang ipaliwanang ang ang sarili.

Kinokunsidera din nito ang pagbibigay ng privilege speech sa kamara o dumalo sa imbestigasyon ng kamara sa flood control projects upang magbigay linaw sa isyu.

“Parang unfair na tayo ay makaladkad doon na hindi naman tayo ang naglagay ng proyektong iyan, hindi tayo ang nag-prioritize, kundi dumating na sa atin yan,” pahayag nito.

(Vina de Guzman)

ISANG high-value drug trafficker ang napatay sa isang buy-bust operation sa loob ng isang hotel sa kahabaan ng Entertainment City, New Seaside Drive, Barangay Tambo, Parañaque City noong Agosto 19, 2025.

Bandang alas-10:30 ng gabi, pinagsanib na mga operatiba ng Philippine Drug Enforcement Agency (PDEA) Regional Office IV-A Cavite Provincial Office; PDEA Regional Office- National Capital Region (RO-NCR) Southern District Office; at Special Operations Unit ng Philippine National Police Drug Enforcement Group, nagsagawa ng buy-bust operation laban sa tatlong drug personalities sa ika-18 palapag ng hotel.

Sa kasamaang palad, nanlaban ang isa sa mga suspek na si alyas “Stephen”, 50-anyos, may lahing Chinese at Filipino, at pinagsasaksak ang isa sa mga operatiba. Ito ang nagtulak sa iba pang mga arresting officer na makipagbuno sa suspek at kalaunan ay pinasuko ito. Habang nag-papambuno, nahirapang huminga ang suspek at biglang nawalan ng malay. Dinala siya sa pinakamalapit na ospital ngunit kalaunan ay namatay dahil sa atake sa puso. Sa kabilang banda, ginagamot ang sugatang ahente sa hindi pa masabing ospital sa Pasay City.

Arestado sa operasyon ang mga suspek na kinilalang sina alyas “Mohamad”, isang German/Syrian national, 32 taong gulang mula sa Poblacion, Makati City, at ang kanyang Filipina cohort na si alyas “Mikhaela”, 24, residente ng Project 6, Quezon City.

Nakumpiska mula sa mga suspek ang mahigit isang kilo ng hinihinalang methamphetamine hydrochloride, o shabu, na may standard street price na ₱6,800,000.00, buy-bust money na ginamit sa operasyon at isang glass tooter.

Kasong paglabag sa Section 5 (Sale of Dangerous Drugs), Section 11 (Possession of Dangerous Drugs), Section 12 (Possession of Drug Paraphernalia) at Section 15 (Use of Dangerous Drugs), ang isasampa sa korte laban sa mga naarestong suspek na pansamantalang nakakulong sa PDEA Regional Office IV-A custodial facility sa Santa Rosa City custodial facility. Kung mapatunayang nagkasala, habambuhay na pagkakakulong at multang mula ₱500,000 hanggang ₱10M ang ipapataw kina alyas “Mohamed” at alyas “Mikhaela”.

“The bravery shown by the arresting operatives in the face of a knife attack is commendable. They had the audacity to take action in spite of the dangers involved. Every single day, anti-drug operatives are putting their lives on the line to make our communities as safe as possible from illegal drugs”, sabi ni PDEA Director General Undersecretary Isagani R. Nerez. (PAUL JOHN REYES)

TIKLO ang 26-anyos na lalaki na wanted sa kaso ng pang-aabuso sa isang menor-de-edad nang matunton ng pulisya sa kanyang tinutuluyang lugar sa Valenzuela City.

Sa ulat, nakatanggap ng impormasyon ang mga tauhan ni Valenzuela Police OIC Chief P/Col. Joseph Talento hinggil sa kinaroroonan ng akusado na kabilang sa talaan ng mga Most Wanted Person sa Valenzuela CPS.

Agad bumuo ng team ang Warrant and Subpoena Section (WSS) saka ikinasa ang manhunt operation na nagresulta sa pagkakaaresto sa akusado dakong alas-2:10 ng hapon sa Brgy. Paso De Blas.

Hindi naman umano pumalag ang akusado nang isilbi sa kanya ng mga pulis ang warrant of arrest na inisyu ng Valenzuela City Regional Trail Court (RTC) Branch 172, para sa dalawang bilang ng paglabag sa R.A 7610, o ang Special Protection of Children Against Abuse, Exploitation, and Discrimination Act na may inirekomendang piyansa na P160,000.

Pansamantalang nakapiit ang akusado sa custodial facility unit ng Valenzuela police habang hinihintay ang pagpapalabas ng commitment order mula sa hukuman para sa paglilipat sa kanya sa City Jail.

Pinuri naman ni Northern Police District (NPD) Acting District Director P/BGen. Jerry Protacio ang arresting team para sa kanilang kasipagan na idiniin ang kanilang hindi natitinag na pangako sa pangangalaga sa kaligtasan ng publiko at pagbibigay ng hustisya sa mga biktima. (Richard Mesa)

BUKOD sa mahigit P80K halaga ng shabu, nakuhanan din ng baril ang isang kelot na sangkot sa pagtutulak ng ilegal na droga matapos maaresto ng pulisya sa buy bust operation sa Caloocan City.

Sa kanyang ulat kay Northern Police District (NPD) Acting District Director P/BGen. Jerry Protacio, kinilala ni Caloocan Police Acting Chief P/Col. Joey Goforth ang suspek na si alyas “Tom”, 30, ng lungsod.

Ayon kay Col. Goforth, ikinasa ng mga operatiba ng Station Drug Enforcement Unit (SDEU) ang buy bust operation, sa koordinasyon sa PDEA matapos ang natanggap na impormasyon hinggil sa umano’y illegal Drug activities ng suspek.

Dakong alas-12:10 ng hating gabi nang makipagtransaksyon umano ang suspek sa isang under police na nagpanggap na buyer na nagresulta sa pagkakaaresto sa kanya sa Brgy. 171, matapos tanggapin ang marked money.

Nakumpiska sa suspek ang nasa 12 grams ng hinihinalang shabu na may estimated standard drug price na P81,600, buy bust money, cellphone at isang caliber .38 revolver na kargado ng bala.

Sinampahan na ang suspek ng kasong paglabag sa Sections 5 at 11, under Article II ng R.A 9165 (Comprehensive Dangerous Drugs Act of 2002) at paglabag sa R.A 10591 (Comprehensive Firearms and Ammunition Regulation Act) sa Caloocan City Prosecutor’s Office sa pamamagitan ng sa inquest proceedings. (Richard Mesa)

SA pagpapalakas sa pangako nito sa pagtatayo ng malinis at mas ligtas na komunidad, tumanggap ang Pamahalaang Lungsod ng Malabon ng backhoe-on-barge mula sa Department of Environment and Natural Resources (DENR) para sa pagpapahusay ng dredging operations at makatulong para mabawasan ang pagbaha sa buong lungsod.

Ang turnover ng equipment ay bahagi ng Manila Bay Rehabilitation Project ng pambansang pamahalaan at gagamitin ito sa pag-alis ng silt, basura, at iba pang mga sagabal sa major water systems, kabilang ang Tullahan River bilang suporta sa patuloy na pagsisikap ng lungsod para matiyak ang kalinisan, kaligtasan, at paghahanda sa sakuna.

Ang programa ay naglalayon na tulungan ang malinis na mga daluyan ng tubig patungo sa Manila Bay, na may sukdulang layunin na ibalik ang natural na sigla at kagandahan ng bay.

“Prayoridad po natin ang kalinisan hindi lang sa mga kalsada, kundi maging sa mga daanan ng tubig sa Malabon. Dahil ang pagpapanatili ng kalinisan at kaayusan ng mga ito ay mahalaga para mabawasan ang epekto ng baha sa mga barangay. Mas magiging mabilis at epektibong ang mga operasyon na magtatanggal ng ano mang basura na humaharang sa mga daanan na ito na nagiging sanhi ng pagbabaha,” ani Mayor Jeannie Sandoval.

Ang backhoe-on-barge na ito ay magbibigay-daan sa mga tauhan ng lungsod na linisin ang mga daluyan ng tubig na mahirap ma-acces sa panahon ng dredging, declogging, at clean-up operations.

“Sobrang halaga nito [backhoe-on-barge] kasi nakita naman noong mga nakaraan sobrang affected tayo ng malakas na ulan, kasabay pa nung high tide level. So, may mga lugar sa ating lungsod na mababa kung saan lahat nung mga debris doon napupunta. So ito yung mga lugar na kinakailangan tutukan at magkaroon ng dredging operations,” paliwanag ni City Environment and Natural Resources Office (CENRO) Chief Mark Mesina.

“Nakita naman natin na isang dahilan kung bakit nagbabaha at nagbabara yung ating mga kanal ay dahil doon sa mga basurang itinatapon kung saan-saan. So sa pamamagitan nito, malaking tulong na makuha natin yung mga basura na nandoon na sa kailaliman ng ating mga water system,” dagdag niya.

Pangungunahan ang dredging operations ng City Engineering Department (CED) sa koordinasyon sa CENRO para matiyak ang kahusayan at pagpapanatili ng mga daluyan ng tubig.

Ipinahayag naman ni Mayor Sandoval ang kanyang pasasalamat sa DENR para sa patuloy na suporta nito na idiniin na ang backhoe-on-barge ay gaganap ng mahalagang papel sa pagpapabuti ng mga hakbang sa flood control at pangangalaga sa kapakanan ng Malabueños.

Hinikayat din niya ang mga residente na makilahok sa mga hakbangin sa kapaligiran ng lungsod sa pamamagitan ng pagpapanatili ng kalinisan sa kanilang paligid, maayos na pagtatapon ng basura, pagsuporta sa mga programa tulad ng pagtatanim ng puno at community clean-up drives. (Richard Mesa)

NAGSAGAWA kamakailan ang National Housing Authority (NHA) ng dalawang magkahiwalay na turnover ceremonies upang maghandog ng ligtas at disenteng pabahay para sa mga benepisyaryo ng ahensya sa Saranggani at Davao de Oro.

Sa gabay ni NHA General Manager Joeben A. Tai, pinangunahan ni Region 12 Regional Manager, Engr. Zenaida M. Cabiles ang pamamahagi ng 48 housing units sa Barangay Colon, Maasim, Saranggani.

Ang nasabing pabahay ay bahagi ng ₱25M Maasim Resettlement Project, bilang bahagi ng Resettlement Assistance Program for Local Government Unit (RAP-LGU) ng NHA, ay binubuo ng 40 concrete duplex-type na istruktura na ilalaan para sa mga informal settler families (ISFs) ng munisipalidad.

Dumalo sa kaganapan sina Engr. Gerald Faciol at Mr. Ser Rosen Kranz Espartero na kumatawan kina Sarangani Lone District Representative Steve Chiongbian Solon at Governor Rogelio Pacquiao; Mayor Zyrex Pacquiao, Vice Mayor Visitacion Nambatac, mga lokal na opisyal, Philippine National Police at Bureau of Fire Protection personnel.

Samantala, 64 na pamilyang biktima ng Bagyong Pablo ang nakatanggap ng pabahay mula sa NHA Region 11, na parte ng Balai Maal’lag Housing Project (On-Site) sa Purok 4, Barangay Andap, New Bataan, Davao de Oro.

Nangasiwa sa turnover sina Region 11 Officer-In-Charge Engr. Shariffuddin I. Nami and District 2 OIC Gerold P. Namoc, Vice Mayor Elfa P. Digaynon bilang kinatawan ni Mayor Mar Bianca F. Cua Brua at kasama rin ang mga kinatawan nina Governor Raul Mabanglo at Congresswoman Maria Carmen S. Zamora.

Sa ilalim ng Housing Assistance for Calamity Victims (HAPCV) ng NHA, ang proyekto ay isang hakbang ng pamahalaan upang matiyak ang mas matatag at ligtas na tirahan para sa mga apektadong komunidad.

Alinsunod sa adhikain ni Pangulong Ferdinand “Bongbong” Marcos Jr. para sa isang Bagong Pilipinas, patuloy ang masigasig na pagsisikap ng NHA upang tugunan ang pangangailangan sa pabahay ng mga pamilyang Pilipino, lalo na ang higit na nangangailangan. (PAUL JOHN REYES)