SUPORTADO ni Navotas City Congressman Toby Tiangco ang direktiba ni Pangulong Ferdinand “Bongbong” Marcos Jr. na imbestigahan ang hinggil sa umano’y katiwalian sa mga flood control projects ng pamahalaan.

Sinabi ni Tiangco na ang pinakagusto niya sa naging pahayag ng Pangulo sa kanyang State of the Nation Address (SONA), ay ang “Mahiya naman kayo sa inyong kapwa Pilipino. Mahiya naman kayo sa mga kababayan nating naanod o nalubog sa baha. Mahiya naman kayo sa mga anak nating magmamana sa mga utang ba ginawa nyo,”.

Aniya, panahon na para panagutin ang mga tiwaling nakinabang at pinagkakitaan ang mga proyektong dapat sana ay para sa ating mga kababayan.

Dapat din aniyang singilin ang mga kawani ng pamahalaan na sangkot sa mga palpak at substandard na proyekto.

“Maliwanag ang mensahe ng pangulo, kailangang labanan ang korapsyon sa pamahalaan at kailangang bantayan ang budget ng bayan para masigurong walang sikretong sinisingit na mga items (budget insertions) na hindi naman kabilang sa plano at programa ng pamahalaan,” ani Tiangco. (Richard Mesa)

MAY 50% diskwento na ang mga senior citizens at mga persons with disabilities

(PWDs) sa lahat ng trains sa Metro Manila tulad ng Metro Rail Line 3 (MRT3), Light Rail Transit Lines 1 & 2 (LRT 1 and LRT 2).

Ito ang pinahayag ni President Ferdinand Marcos, Jr. noong nakaraang July 16 ng

nagkaron ng paglulungsad sa programa na ginawa sa estasyon ng MRT 3 Santolan-Annapolis.

“Around   13   million   senior   citizens   and   7   million   PWDs   will   benefit   from   this program. It is available in MRT 3, LRT 1, and LRT 2 and will be valid until 2028,” wika ni Marcos.

Nauna ng nabigyan rin ng 50% diskwento ang mga estudyante kung saan may

mga designated lanes sila sa mga istasyon ng MRT 3.

Sinabi rin niya na ang Dalian trains na binili pa noong 2014 ay nagagamit na sa

MRT 3 kung saan may 3 trains na may 3 coaches bawat isa ang tumatakbo na may kabuuang 9 na train-cars.

“We will keep working to make all of them operational,” sabi ni Marcos.

Ayon   sa   pamahalaan   na   nagbigay   ng   kumpirmasyon   ang   CRRC   Dailian   na kanilang gagawin ang modification ng mga trains upang mabigyan ng solusyon ang problema sa compatibility ng walang gagastusin ang ating pamahalaan.

Ang German TUV Rheinland na kumpanya ang siya pa ang nangasiwa sa full technical   audit   habang   ang   MRT’s   3   na   current   maintenance   provider   na   Japan’s Sumitomo Corporation ang gumawa ng safety checks at compliance procedures.

“Once   fully deployed,  the  new   trains, each   capable   of   carrying   up   to   1200 passengers, will significantly boost capacity on Line MRT 3, which currently carries an average of 380,000 passengers a day. Entry into service of the new fleet will also reduce intervals between trains from 4 minutes to 2 minutes and 30 seconds,” dagdag ni Marcos.

Kaugnay pa rin sa MRT 3, maari ng gamitin ang Gcash bilang bayad sa pamasahe kung kaya’t magiging cashless na ang isa sa mga paraan ng pagbabayad matapos na makipag partner ang Department of Transportation (DOTr) sa e-wallet na Gcash. Ito ay sa ilalim ng automated fare collection system (AFCS) ng MRT 3.

Ang AFCS ay magbibigay sa mga pasahero ng MRTs ng mas mabilis na paraan ng pagbabayad ng pamasahe dahil diretso na silang magbabayad sa pamamagitan ng GCash app o EMV tulad ng Europay, Mastercard o Visa debit at credit cards.

“Commuters have the option to pay fares using different payment methods. They don’t have to fall in line to buy their tickets. This is the first of its kind in the world, I was told, because in other countries, not all forms of visa cards are accepted,” dagdag ni DOTr Secretary Vince Dizon.

Sa ngayon ay lahat ng estasyon ng MRT 3 ay nilagyan na ng GCash-powered tap-

to-pay turnstile. Maliban sa GCash, ang mga pasahero ay walang gagawin kung hindi mag-tap lamang ng kanilang credit o debit cards sa mga turnstiles upang magbayad para sa kanilang pasamahe.

Kung kaya’t mawawala na ang mahabang pila upang bumili lamang ng single-

journey o stored-value tickets.

Sinabi ng DOTr na ang kanilang layunin sa hinaharap ay magkaroon ang lahat ng

ganitong sistema sa lahat ng ng rail lines tulad ng LRT 1 and LRT 2. LASACMAR

MULING nagbabala si Pangulong Ferdinand Marcos Jr. laban sa mga responsable sa mga nawawalang “sabungeros.”

Tiniyak ni Pangulong Marcos sa kanyang pang-apat na State of the Nation Address (SONA) sa Batasang Pambansa, araw ng Lunes, Hulyo 28, na nakakasa na ang whole-of-government approach para resolbahin ang krimen na may kaugnayan sa mga nawawalang tao.

“We will go after and hold accountable the masterminds and those involved — be it civilians or officials,” ayon kay Pangulong Marcos.

“No matter how strong, heavily influential or wealthy they are, they will not prevail over the law.” aniya pa rin.

At ang pangako ng Pangulo ay “Most of all, we will make the perpetrators feel the weight of the punishment for these heinous crimes.”

Sa ulat, diretsahan na muling idinawit ang pangalan ng negosyanteng si Atong Ang at aktres na si Gretchen Barretto sa isyu ng mga nawawalang sabungero.

kabilang sina Ang at Barretto sa mga pinangalanan ni Julie Dondon Patidongan o alyas Totoy na nasa likod ng malagim na nangyari sa tinatayang mahigit 100 nawawalang mga sabungero.

Si Patidongan daw ang head ng security ng mga sabungan ni Atong at sa kaniya raw ibinababa ang utos na ipitin ang mga sabungerong mahuhuling nag-chochope o nandadaya sa sabong.

Nang tanungin naman kung sino ang artistang babaeng nauna na niyang isiniwalat na sangkot sa naturang isyu, diretsahang sinabi ni alyas Totoy ang pangalan ni Gretchen. (Daris Jose)

BINALAAN ni Pangulong Ferdinand Marcos Jr., ang mga trader na magtatangkang magmanipula ng presyo ng palay o ng bigas, o manloloko ng mga magsasaka.

Tiniyak ni Pangulong Ferdinand Marcos Jr. sa kanyang pang-apat na State Of the Nation Address (SONA) sa Batasang Pambansa, araw ng Lunes, Hulyo 28, “Hahabulin namin kayo, dahil ang trato namin sa inyong ginagawa ay tinuturing naming economic sabotage.”

Napatunayan na kasi ng gobyerno na kaya nito na magbenta ng P20.00 sa bawat kilo ng bigas, nang hindi malulugi ang mga magsasaka.

Sa katunayan, kamakailan lamang aniya ay matagumpay na nailunsad ang pagbebenta ng P20.00 sa bawat kilo ng bigas sa Luzon, Visayas at Mindanao kagaya sa San Juan, Pangasinan, Cavite, Occidental Mindoro, sa Cebu, sa Bacolod, sa Guimaras, Siquijor, at Davao Del Sur.

At dahil aniya sa ilalaan na isandaan at labintatlong bilyong piso upang palakasin ang mga programa ng DA, ilulunsad ng gobyerno sa buong bansa sa pamamagitan ng daan-daang KADIWA store at center sa iba’t ibang lokal na pamahalaan.

Sa kabilang dako, bilang pangunahing solusyon sa mataas na presyo ng baboy, pinalalakas ng pamahalaan ang lokal na produksyon.

“Namimigay tayo ng mga biik at inahin. Nagpapatayo rin tayo ng mga biosecured facilities,” ang sinabi ng Pangulo.

At upang lubos na pababain ang presyo ng karne, nagsimula nang magbakuna laban sa ASF, at palalawigin pa aniya ng gobyerno ng pagbabakuna sa lahat.

“Pinataas natin ang produksyon ng palay, mais, pinya, saging, mangga, kape, cacao, calamansi, tubo, sibuyas, bawang, at iba pang mga agricultural products,” ani Pangulong Marcos.

Ibinida ng Pangulo na mula nagsimula ang kanyang administrasyon, mahigit walo at kalahating milyong magsasaka at mangingisda ang nakatanggap ng tulong.

“Lalo pa natin paiigtingin ang mga programa ng pamahalaan para mas marami pa ang matutulungan,” ang sinabi ng Pangulo.

Libo-libong kilometro aniya ng farm-to-market road na ang ginawa na, at libo-libong kilometro pa ang pinapasinayaan. Libo-libong ektarya ng lupa ay nalagyan na ng patubig sa buong bansa. At libo-libong ektarya pa ang patutubigan.

“Libo-libo ring makinarya at pasilidad ang ating binuksan at pinamigay para sa mga magsasaka at mangingisda. Marami po tayong ipapatayo na Rice Processing System. Itong mga pasilidad at mga bangkang yari sa fiberglass na ipapamigay naman sa mga mangingisda,” ang sinabi ng Pangulo.

“Lahat ng ito ay sumusuporta sa kanila mula paghahanda, sa pagpunla, pag-ani, pagbiyahe, hanggang sa pagbenta,” aniya pa rin. (Daris Jose)

INAMIN ni Pangulong Ferdinand Marcos Jr., na mayroon pa rin mga problema sa enerhiya na damang-dama ng bawat Pilipino.

Ito’y sa kabila ng dumarami ang mga planta ng kuryente sa buong bansa lalo na ang mga bagong teknolohiya at malinis na enerhiya, tulad ng solar, windmill, natural gas.

Sa katunayan ayon may Pangulong Ferdinand Marcos Jr. sa kanyang pang-apat na State of the Nation Address (SONA) sa Batasang Pambansa, araw ng Lunes, Hulyo 28, may tatlong milyong kabahayan ang wala pang kuryente; nakararanas ng palagiang brownout att ang mataas na presyo ng kuryente.

Kaya nga aniya binibilisan ng pamahalaan na mabigyan ng koneksyon at pinapalakas pa lalo ang kakayahan na ginagawa ng kuryente.

“Pagpasok ng Administrasyong ito, mahigit limang milyon ang mga bahay na wala pang kuryente. Sa loob ng tatlong taon, dalawa at kalahating milyong kabahayan ang ating nakabitan na, na may kuryente na sila,” ayon sa Pangulo.

“Sa susunod na tatlong taon, halos dalawandaang planta ang ating tatapusin. Ito ay may kakayahang magpailaw sa apat na milyong kabahayan, o sa mahigit na dalawang libong pabrika, o sa halos pitong libong tanggapan at negosyo,” aniya pa rin.

Tiniyak ng Pangulo na hahabulin at tutuparin ng Department of Energy (DOE) at National Electrification Administration (NEA) ang nakatakdang dami ng mga kabahayang makakabitan ng kuryente ngayong taon hanggang 2028. Lalo na aniya sa Quezon, sa Camarines Norte, sa Palawan, sa Masbate, sa Samar, sa Negros Occidental, sa Zamboanga del Sur.

At sa pagtatapos aniya ng 2028, dagdag na mahigit isang milyong kabahayan pa ang magkakaroon na rin ng kuryente, sa pamamagitan ng solar power home system.

At para lalo pa aniyang makatipid ang mga mga mamamayan at maipagbili ang anumang sobrang kuryente nila, isusulong na ng Department of Energy ang Net Metering Program, at pabibilisin din ng Energy Regulatory Commission (ERC) ang proseso ng pag-apruba nito.

“Habang inaayos natin ang kumplikado nating sistema ng enerhiya sa bansa upang maipababa ang presyo, pinapalawig pa natin ang Lifeline Rate. Bukod sa mga miyembro ng 4Ps, kasama na rin ngayon ang mga pamilyang nasa Listahanan na maliit lamang ang kinikita, at ang konsumo naman ay hindi lumalagpas sa “lifeline rate”.” ayon sa Pangulo.

“Hindi ko palalampasin ang nangyari kamakailan sa Siquijor.

Dahil sa malawakang brownout, napilitan pang magdeklara ng state of calamity sa lalawigan. Naperwisyo nito ang mga taga-roon, ang kanilang turismo, kanilang negosyo, ospital, at sari-saring serbisyo.

Sa ginawa nating imbestigasyon, ano ‘yung ating natuklasan?

Mga expired na permit. Mga sirang generator, na halatang napabayaan, kaya sunud-sunod na bumibigay. Mabagal na aksyon, at kawalan nang maayos na sistema nang pagbili ng krudo at ng mga piyesa,” litanya ng Pangulo.

Titiyakin aniya ng gobyerno na maitatag agad ang mga pasilidad para sa pangmatagalang lunas sa kanilang problema sa kuryente.

“Hindi na dapat ito maulit muli,” diing pahayag ng Pangulo.

“limbestigahan ang naging kapabayaan dito, at ang iba pang mga katulad na kaso sa buong bansa. Dapat nilang ayusin ang pamamahala ng mga kumpanya ng kuryente, at ipag-utos ang pag-refund kung kinakailangan,” aniya pa rin. (Daris Jose)

MAAYOS na hanapbuhay talaga ang mabisang pantiyak laban sa kahirapan at laban sa gutom.

Ito ang sinabi ni Pangulong Ferdinand Marcos Jr. sa kanyang pang-apat na State of the Nation Address (SONA) sa Batasang Pambansa, araw ng Lunes, Hulyo 28, inihayag ng Pangulo na patuloy na dumarami ang mga nalilikhang hanapbuhay sa bansa ngayon.

Sa katunayan, magpupursige ang DOLE, DTI, DSWD, kasama pati ang DOT, at mga kaugnay na ahensiya, sa paghahanap ng paraan at ng mga oportunidad para sa natitirang apat na porsiyento ng puwersang manggagawa na hanggang ngayon ay walang trabaho.

Sinabi ng Pangulo na ipagpapatuloy ng gobyerno ang pagbibigay ng puhunan sa mas marami pang negosyante para makapagsimula ng maliit na negosyo o microenterprise, sa mababang interest, at walang kolateral. Pati na rin aniya ang kapital at proteksyon para sa mga yamang-isip.

At para naman aniya sa mga tinataguyod mula sa kahirapan, patuloy na magbibigay ng libreng training at puhunan ang pamahalan para makapagtayo ang mga ito ng sariling negosyo.

“Hindi tayo titigil hanggang halos dalawa’t kalahating milyong maralitang pamilya ay matutulungan natin na magkaroon ng kanilang sariling maliit na negosyo,” ayon sa Pangulo.

“Palalaguin natin ang mga industriya – mga pabrika ng sasakyan, hulmahan, electronics, biotechnology, pharmaceuticals, critical minerals, telang Pinoy, Halal, construction, at mga planta ng kuryente,” aniya pa rin.

Kaya nga ang panawagan pa rin ang Pangulo sa mga negosyante ay “Mamuhunan kayo sa ating agrikultura.”

“My single resounding message to the international business community is this: The Philippines is ready. Invest in the Filipino,” ayon sa Pangulo sabay sabing “Our cavalcade of dependable and hardworking Filipinos, innately skilled, adaptable, and possessed with a heart for service, are here, ready to work and to succeed with you.” (Daris Jose)