MAY lumutang na  bagong testigo sa nawawalang mga sabungeros, ayon sa kumpirmasyon ng Department of Justuce (DOJ).

Ayon kay Justice Secretary  Crispin Remulla,  mayroon silang panibagong hawak na testigo kaugnay sa pagkawala ng mga sabungero.

Inaasahan aniyang mailalabas at malalaman ng publiko sa mga susunod o lalong madaling panahon.

‘Malalaman n’yo very soon mayroon kaming bagong testigo na lalabas,” ani Remulla.

Diin pa ng Kalihim, hindi lamang basta testimonya ang hawak nila kundi mayroon pang tiyak na ebidensya ang siyang ibinahagi ng naturang testigo.

Aniya makakatulong raw ito upang mas mapagtibay ang kredibilidad ng naunang lumantad na testigong si alyas ‘Totoy’. (Gene Adsuara)

ISANG makatotohanang paglilinis ng gobyerno ang pangako ng Pangulong Ferdinand Marcos Jr. sa isinagawang State of the Nation Address (SONA).

Matapang na sinabi ni Chairman Emeritus Dr. Jose Antonio Goitia na makikita sa Presidente na hindi nito pinagtatakpan ang mga pagkakamali, hindi nagkukunwari at harap-harapan na inaamin ang gulo sa sistema ng gobyerno at sinabing nililinis niya ito.

Partikular niyang tinukoy ang pagbubunyag ng Pangulo sa korapsyon sa mga proyekto ng gobyerno, lalo na sa flood control, kung saan sinabi nito na may mga kasabwat na mga opisyal ng gobyerno at negosyante na maituturing na mga cartel na kumikilos sa loob ng sistema at nangako na bubuwagin ang mga ito.

“Napakatagal nang ginagatasan ang mga proyektong dapat sana ay nagliligtas ng buhay. ‘Yung perang nakalaan  para sa bayan, napupunta sa bulsa ng iilan. Ngayon lang may Pangulong may lakas ng loob na ilantad ‘yan sa mismong araw ng  SONA. Isa lamang ang ibig sabihin nito, seryoso ang Pangulo” dagdag ni Goitia.

Paliwanag pa ni Goitia na simple ang mensahe ng Pangulo, tapusin ang palusot, itama ang sistema, at ibalik ang tiwala ng bayan.

Pinuri rin niya ang ipinapakitang resulta ng mga proyekto sa ilalim ng Build, Better, More kabilang ang mga paliparan, tren, terminal, hindi drawing o kaya press release.

Pero higit sa lahat, hanga si Goitia sa malinaw na direksyon ng Pangulo, mula agrikultura hanggang digitalization, kahit hindi ito ‘popular’ sa mata ng mga pulitiko.

“Habang nakatuon ang isip ng iba sa pamumulitika, iniisip niya  kung anong klaseng Pilipinas ang iiwan sa mga susunod na henerasyon. Hindi siya naghahanap ng pagpuri. Gusto niyang mag-iwan ng maayos at progresibong bansa,” sabi ni Goitia.

Sa gitna ng ingay at palabas sa pulitika, naninindigan si Goitia na si Presidente Marcos ay hindi umaarte kundi kumikilos para sa hinaharap para kapakanan ng Pilipinas at ang kanyang tinuran ay hindi isang simpleng talumpati kundi babala  sa mga tiwali at maging sa taong bayan na  hindi dapat makontento sa status quo dahil may isang  Pangulo na  kumikilos at hindi namumulitika.”

Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield (FDNY) Movement. (Gene Adsuara)

PINANGUNAHAN ni First Lady Liza Araneta Marcos at Malabon City Mayor Jeannie Sandoval ang isinagawang LAB FOR All-Laboratoryo, Konsultasyon at gamot para sa lahat na libreng handog para sa mga Malabueño na naapektuhan ng nagdaang bagyo na ginanaip sa Catmon Integrated School. “Ang kalusugan ay mahalaga! Huwag po natin pabayaan ito at panatilihin po nating malakas ang katawan para sa patuloy na pag-ahon sa buhay at ng bayan,” ani Mayor Jeannie. (Richard Mesa)

NAGPAHAYAG ng buong suporta si Speaker Ferdinand Martin Romualdez sa panawagan ni Presidente Bongbong Marcos na i-realign ang national priorities sa araw araw na pangangailangan ng bawat pilipino.

Isusulong aniya ng Kamara ang pagkakaroon ng budget reforms,  open bicam at investments sa agriculture, health at job creation.

“The President’s message was clear: make government work better for the people. As Speaker, I am committed to making sure the budget reflects that – every centavo must go where it’s needed most,” ani Romualdez.

Nakahanda aniya ang liderato ng Kamara na agad aksyunan ang mga

structural changes sa national budget.

Ang mga naturang reporma ay dapat magbigay prayoridad sa accountability, maalis ang mga  inefficiencies at siguruhing direktang matutugunan ng pondo ang pangangailangan ng pamilyang Pilipino.

“This is not just about numbers, it’s about making sure families feel the impact of every peso we allocate,” pahayag nito.

Kaisa din ito sa panawagan na transparency sa budget deliberations, partikular na sa bicameral conference committee, kung saan pinag iisa ang bersyon sa national budget ng senado at kamara.

“No backroom haggling. The people have every right to know how their money is being spent. If we want trust, we have to earn it, starting with an open bicam,” giit nito. (Vina de Guzman)

NATIMBOG ng mga ahente ng Philippine Drug Enforcement Agency (PDEA) ang isang 26-anyos na lalaking nagbebenta ng droga sa ikinasang buy-bust operation noong July 28, 2025 bandang alas 4:55 ng hapon sa isang open mall parking sa Lungsod ng San Fernando Pampanga na nagresulta sa pagkakasamsam ng 700 gramo ng mechlorbushamine (hydrochloride) sa operasyon.

Ang nadakip na suspek na kinilala sa alyas na SATAR, 26 taong gulang, tubong Lanao Del Norte, ay pinaniniwalaang sangkot sa paglaganap ng iligal na droga sa Lungsod ng San Fernando.

Ang mga ilegal na substance (humigit-kumulang 700 gramo) ay inilagay sa loob ng pitong knot-tied transparent plastic bag na kinumpiska ng mga operating team kasama ang buy-bust money.

Ang operasyon ay isinagawa sa pamamagitan ng collaborative effort sa pagitan ng PDEA CALABARZON Special Enforcement Team 1 (RSET I) at PDEA Pampanga Provincial Office sa pakikipag-ugnayan sa City of San Fernando Police Station.

Isang non-bailable offense sa ilalim ng section 5 (sale of dangerous drugs) na may imposable penalty na habambuhay na pagkakakulong sa ilalim ng Republic Act 9165 ang kakasuhan laban sa naarestong suspek. (PAUL JOHN REYES)

PINURI ni Education Secretary Sonny Angara ang pang-apat na State of the Nation Address (Sona) ni Pangulong Ferdinand Marcos Jr., na para sa Kalihim ay “simple yet powerful” message na nakatuon sa pang-araw-araw na paghihirap ng mga Filipino.

“I didn’t think the President could top last year’s SONA. But somehow, he has,” ang sinabi ni Angara.

Tanggap naman ni Angara ang para sa kanya ay “rare attention” na ibinibigay sa mga usapin ng edukasyon sa naging talumpati ng Pangulo, tinukoy naman ang pangako ng Pangulo na pagaanin ang paghihirap na kinahaharap ng guro at mga estudyante.

Kabilang sa iba pang benepisyo na inanunsyo ng Pangulo para sa mga guro ay ang makatanggap ang mga ito ng bagong laptops para sa school year 2025-2026 at “we have made sure their procurement is not riddled with anomalies”.

Pinuri rin ng Kalihim ang naging anunsyo ni Pangulong Marcos na bagong college scholarship program na makatutulong na maitaas at maiahon ang mga Filipino mula sa kahirapan.

Tinuran ng Pangulo na magbibigay siya ng “Presidential Merit Scholarship”sa high school graduates na makatatanggap ng ‘high honors.’

Nangako rin ang Pangulo na magtatayo ng 40,000 na bagong silid-aralan bago matapos ang kanyang termino sa 2028 sa layuning tuldukan na ang ‘classroom shortage crisis’ dahilan para mapilitan ang milyong estudyante na mag-aral sa ‘overcrowded spaces.’

Nanawagan naman ito sa 20th Congress na maglaan ng sapat na pondo para sa school infrastructure program ng DepEd.

“[The situation of our students] is really disheartening. Their time in class should no longer be cut short due to a shortage of classrooms,” ayon sa Pangulo sabay sabing “With the help of the private sector, we will strive to build 40,000 more classrooms before the end of our administration.”

Maliban sa mga bagong silid-aralan, nangako naman si Pangulong Marcos na maghahatid ng iba pang learning essentials, gaya ng smart televisions, free Wi-Fi, at free load sa pamamagitan ng Bayanihan SIM card para tulungan ang mga estudyante na maka-cope sa mga pangangailangan ng postpandemic curriculum.

Winika pa nito na ang administrasyon ay maglalaan ng P6 billion sa pondo para mapanatili ang free college education program at technical and vocation education scholarships. (Daris Jose)