2025 May Archive - People's Balita

Archive for May, 2025

Nagluluksa na naman ang showbiz industry: OPM legend na si Ka FREDDIE, pumanaw na sa edad 72

Posted on: May 28th, 2025 by @peoplesbalita No Comments

NAGLULUKSA na naman ang showbiz industry sa pagpanaw ng sikat na award-winning Filipino folk singer at OPM legend na si Freddie Aguilar.

Sa edad na 72, namaalam na si Ka Freddie noong May 27, habang naka-confine sa Philippine Heart Center. Naulila niya ang asawang si Jovi Gatdula Albao at ang kanyang mga anak sa unang asawa na sina Maegan, Jonan, Isabella, and Jeriko.

Kinumpirma ito ng abogadong si George Briones, ang general counsel of Partido Federal ng Pilipinas ang pagpanaw ng mang-aawit na dating national executive vice president ng PFP.

Nag-post din ang kaibigan at veteran actress na si Vivian Velez sa Facebook tungkol sa pagpanaw ng singer-songwriter.

“OPM icon Freddie Aguilar has passed away today (May 27) at the PH Heart Center Hospital.

“He was 72 years old. Our heartfelt condolences to his family and loved ones. His music will forever live on in our hearts. #FreddieAguilar.”

Itinuturing na isang haligi ng Philippine music industry si Ka Freddie at nakapagbigay din ng karangalan sa Pilipinas sa pamamagitan ng mga parangal at pagkilala sa iba’t ibang panig ng mundo.

Nagsimula si Ka Freddie sa pagiging isang street musician at folk club performer sa Maynila at Olongapo hanggang sa makakuha ng regular gig sa Mama Consuelo’s Music Lounge sa Quiapo, Maynila.

Hindi nagtagal ay naging kilala siya bilang isang folk singer sa Malate, Maynila.

Dahil sa kanyang hindi matatawarang talento sa pagkanta pagko-compose, naging isa siya sa mga pambatong musikero sa buong bansa at binigyang-parangal dahil sa kanyang makabuluhang at makabayan na mga kanta.

Dahil sa kanyang awiting “Anak”, mas nakilala pa siya dahil naging isang international hit at isinalin sa 29 na wika. Ito rin ang kanyang best-selling Philippine music record of all time.

Noong 1986, si Freddie Aguilar ay hinirang bilang ikalawa sa mga Asian artist na may pinakamaraming album sales sa buong mundo.

Bukod sa “Anak”, ang ilan pa sa mga pinasikat niyang awitin ay ang “Bayan Ko”, “Mindanao”, at “Pulubi”.

Noong January 18, 2008, tinanggap ni Ka Freddie ang Asia Star Award mula sa Asia Model Award Festival sa Korea.

Ipinanganak si Ka Freddie noong February 5, 1953, sa Santo Tomas, Isabela. Nakapag-asawa siya ng dalawang beses at may apat na anak sa kanyang unang asawa.

Taong 2013 nang magpa-convert siya sa relihiyong Islam at pinangalanan ang sarili bilang Abdul Farid. Ginawa niya ito upang mapakasalan ang isang 16-anyos na si Jovi Gatdula Albao (Muslim name Sittie Mariam).

(ROHN ROMULO)

Sa mga nagkalat ng fake news sa social media: Sen. BONG, nakatakdang magsampa ng cybel libel complaints

Posted on: May 28th, 2025 by @peoplesbalita No Comments

ISA kami sa maraming nagtaka kung bakit hindi napasama si Senator Ramon Bong Revilla sa 12 senador na nagwagi sa katatapos na local elections.

Pang labing apat lamang si Sen. Bong na more than 2 million votes ang kalamangan ni Sen. Imee Marcos na nasungkit ang pang labing tatlong puwesto.

Sa raming ginawang batas ni Sen. Bong na halos lahat ay napakinabangan na ng lahat.

Sa buong panunungkulan niya sa senado ay more than 2,000 bills and resolutions ang naihain ni Sen. Bong kumpara sa iba riyan na mabibilang mo lang sa daliri ang nagawang batas.

Kami man ay nasaktan para sa working senator Bong Revilla na nasa kanyang huling termino na sana sa senado.

Kaya nga dahil marahil sa sobrang nasaktan kung kaya nakatakdang sampahan ng kasong Cyber Libel ang ilang indibiduwal na nag-post ng mga paninira.

Kaya nga raw ayon pa sa abogado ni Sen. Bong na si Atty. Fortun sa mga susunod na araw daw ay pormal na silang magsasampa ng reklamo sa lima o sampung katao na nagkakalat ng fake news sa social media.

“Sen. Revilla wil be filing the appropriate charges as specifically Cyber Libel against certain individuals.

“I have been told not to disclose the names of these individuals at this time, because there is a need to let them…but definitely Sen. Revilla will be coordinating with the NBI to find out the bonafides of this people.

“Kasi ang mga iba ay pseudonyms lang yung gamit. But definitely, they will be traced through the active cooperation of Facebook and other online agencies. And the whereabouts will be discovered and the appropriate charges will be filed,” banggit pa ng abogado.

***

BUKOD kay Bong Revilla , isa rin sa pinanghinayangan namjn na hindi nabigyan ng pagkakataon na makapaglingkod sa probinsiya bg Batangas ay ang sikat na TV host at aktor ba si Luis Manzano.

Handa pa naman sana si Luis na ibigay ang kanyang 100 percent para lang mapatunayan sa mga taga-Batangas ang kanyang katapatan bilang bagong pasok sa larangan ng pulitika.

Kagaya ng ina na muling nahalal na Batangas governor ay nakahanda si Luis na mag-aral at tumanggap ng mga suhestiyon para sa kanyang unang pag upo bilang bise gobernador bg probinsiya.

Sabi nga ang tandem nilang dalawa ni Ate Vi bilang governor at vice governor ay lalong magpaunlad sa buong probinsiya ng Batangas.

Wala namang bahid ng pagsisisi ang asawa ni Jessy Mendiola at ama ni Peanut sa kanyang pagkatalo na sa survey pa lang ay umalagwa at nangunguna ang panganay ni Gov. Vi.

(JIMI C. ESCALA)

Secret pa kung meron kaya dapat abangan sa ‘Only We Know’: CHARO, game sa kissing scene with DINGDONG kung kailangan sa kuwento

Posted on: May 28th, 2025 by @peoplesbalita No Comments

SA ginanap na launch event ng pelikulang ‘Only We Know’ na sinulat at idinirek ni Irene Emma Villamor para kina Ms. Charo Santos-Concio at Dingdong Dantes ay halata sa mga batuhan ng linya na may relasyon ang mga karakter nilang Ryan at Betty base sa trailer.

At dahil May-December affair ang kuwento ng ‘Only We Know’ ay automatic na ang tanong ay kung may intimate scenes bagay na napapangiti ang dalawang bida na hindi nila sinagot ng diretso kundi read between the lines na lang.

Game naman sumagot ni Ms. Charo sa naugthy questions tulad ng kung sakaling kailangan may kissing scene sila ni Dingdong.

“Depende sa context ng kissing scene kailangan nasa konteksto ng kuwento,” nakangiting sagot ng premyadong aktres.

Habang sumasagot si Ms. Charo ay napapangiti naman si direk Irene bagay na nahalata ng press kaya tinanong siya kung may kissing scene ang dalawa at sinagot niya ng ‘secret!’ kaya nagkatawanan ang tatlo.

Ito naman kasi talaga ang aabangan sa ‘Only We Know’ kung papayag si Ms. Charo na magkaroon ng sila ng intimate scenes ni Dingdong.

Aliw ang sagot ng aktres, “talaga? Gusto mo ba? (tanong niya sa nagtanong na siangot ng ‘oo’)” at napa’hmmm’ ang leading lady ni Dingdong.

Say naman ng aktor kung may kissing scene, “only we know.”

Hirit ni direk Irene, “may surprise, siguro mag-usap tayo ulit kapag napanood n’yo na ang movie.”

Hmm tila may pa-survey kung tanggap ng manonood si Ms. Charo na magkaroon ng intimacy o affection kay Dingdong na sa palagay namin ay may dalawang version ito.

Isang may kissing scene at isang wala at kung ano ang feedback base sa trailer ay doon pag-uusapan ng cast at producers kung ipapakita ito sa pelikula o hindi kaya sinagot kami ng, “panoorin n’yo.”

Sa kabilang banda ay inamin ni direk Irene na sina Ms. Charo at Dingdong talaga ang gusto niya sa script na sinulat niya 7 years ago.

Aniya, “Bale meron kaming mutual friend na producer na nag-isip and then si Dong ‘yung lumapit sa akin na gusto na niyang maka-trabaho si Ma’am Charo at isinama niya ako sa meeting and nag-pitch ako ng concept sa kanilang dalawa and the rest is history.”

Matatandaang nagka-trabaho na sina Dong at direk Irene sa pelikulang ‘Sid & Aya: Not A Love Story’ noong 2018 kasama si Anne Curtis at dahil maganda talaga ang kuwento nina Sid at Aya kaya humirit ulit si Dingdong with Ms Charo as his leading lady na inaming gusto niyang maka-work ang dating boss ng ABS-CBN.

Sakto ang bilang naming dahil after 7 years, 2018 at 2025 na ngayon bukod pa na mas lalong na-inspire si Dingdong bilang isa sa producer ng mga pelikula niya, ang AgostoDos Pictures dahil kumita ito ng P160M.

Nang mabasa raw nina Ms Charo at Dingdong ang script ay nagustuhan nila agad.

Sagot ni Ma’am Charo tungkol sa script, “sabi ko nga, napakatapang (Dingdong) because he wanted to do this movie, this narrative with me.”

Base sa trailer ay may chemistry sina Ryan at Betty kaya naman nu’ng unang mapanood ito sa socmed ng Star Cinema ay iisa halos ang narinig naming komento, “ay nakaka-intriga ang kuwento, panoorin ko” at “true kayang may relasyon o iniisip lang ng viewers, baka platonic.”

Samantala, hindi magkakilala ng personal sina Ms Charo at Dong at inamin din ng un ana wala sa radar niyang maka-trabaho ang aktor dahil nga abala siya sa trababo niya bilang president ng ABS-CBN bukod pa sat aga-GMA 7 ang aktor.

Pero aminadong napagkikita na niya si Dingdong noon sa bakuran ng ABS-CBN dahil ang unang pelikulang ginawa ng aktor sa Star Cinema ay ‘Segunda Mano’, 2011 kasama si Kris Aquino at Angelica Panganiban.

Anyway, mapapanood ang ‘Only We Know’ nationwide simula sa June 11 handog ng Star Cinema, AgostoDos Pictures, 7K Entertainment at Cornerstone Studios. Makakasama sa pelikula sina Shamaine Buencamino, Joel Saracho, Al Tantay, Max Collins, Johnny Revilla, Rafa Sigueon-Reyna, Isabel Oli, Gil Cuerva, Yesh Burce at Soliman Cruz.

(REGGEE BONOAN)

DUMLAO, nasa bansa pa rin

Posted on: May 28th, 2025 by @peoplesbalita No Comments

NANANATILI pa rin sa bansa si dating police Lt Col Rafael Dumlao III, ayon kay Bureau of Immigration (BI) spokesperson Dana Sandoval.

Ang pahayag ni Sandoval ay tugon sa tanong kung ano na ang status ng dating pulis na itinuturong utak sa pagdukot at pagpatay sa Korean businessman na si Jee Ick-joo.

Sinabi ni Sandoval na nasa proseso pa ng pagsasailalim sa hold departure order (HDO) si Dumlao at hindi pa rin nakakalabas ng bansa.

Bukod dito, isinailalim na ng BI si Dumlao sa immigration lookout bulletin order (Ilbo) upang malaman o mamonitor kung tatangkain nitong umalis ng Pilipinas.

Aniya, sakaling maka-salamuha ng kanilang tauhan parikular ng mga immigration officers si Dumlao, agad nila itong ipagbibigay alam sa kinauukulan.

Pero hindi magiging sapat ang immigration lookout bulletin order laban sa dating pulis kung saan karapatan pa din nito na makapagbiyahe at tanging ang hold departure order mula sa Korte ang paraan upang hindi na makalabas pa ng bansa.(Gene Adsuara)

PH, Vietnam nag-uusap para sa ‘comprehensive strategic partnership’

Posted on: May 28th, 2025 by @peoplesbalita No Comments

KASALUKUYANG nasa negosasyon ang Pilipinas at Vietnam upang mas iangat ang kanilang ‘strategic partnership sa “comprehensive strategic partnership”.

Nagkaroon ng bilateral meeting si Pangulong Ferdinand Marcos Jr., kasama si Vietnamese Prime Minister Pham Minh Chinh sa sidelines ng nagpapatuloy na ASEAN Summit in Malaysia, araw ng Lunes.

“Our ministers are in discussion on the possibility of elevating the strategic partnership to a comprehensive strategic partnership. I believe there are already productive conversations between our two countries,” ang sinabi ni Pangulong Marcos sa nasabing miting.

Kinilala naman ng Vietnamese Prime Minister ang “remarkable progress” sa bilateral relations simula nang magkaroon ng state visit si Pangulong Marcos sa Vietnam noong January 2024.

“I hope that it has come to the point where we can elevate the strategic partnership between our two countries,” ang sinabi ng Prime Minister.

Sa kabilang dako, ipinaabot naman ni Pangulong Marcos ang kanyang pakikidalamhati sa Vietnamese leader sa pagpanaw ni dating Vietnamese President Tran Duc Luong nito lamang May 20, 2025.

Kapuwa kinilala ng dalawang lider ang lumalawak na ‘economic at trade cooperation’ sa pagitan ng Pilipinas at Vietnam.

Pinalakas din ng mga ito ang kanilang kolaborasyon sa agrikultura at food security at pinahusay ang people-to-people exchanges sa edukasyon, turismo at cultural engagement.

Samantala, kapuwa ginugunita ng Pilipinas at Vietnam ang ika-10 taong anibersayo ng kanilang strategic partnership, tanda ng isang dakada ng pinalakas na pagtutulungan at pangmatagalang pagkakaibigan sa pagitan ng dalawang bansa. ( Daris Jose)

PBBM, kumpiyansa sa ‘legally binding’ ng ‘code of conduct’ sa South China Sea

Posted on: May 28th, 2025 by @peoplesbalita No Comments

KUMPIYANSA si Pangulong Ferdinand Marcos Jr. kaugnay sa adopsyon ng Code of Conduct on the South China Sea.

”President Ferdinand Marcos Jr. is very optimistic that there will be a final, rather conclusion, on this legally binding Code of Conduct regarding the South China Sea. He is very optimistic that’s why he bring this up to the plenary just this morning,” ang sinabi ni Presidential Communications Office Undersecretary at Palace Press Officer Claire Castro sa Philippine media delegation.

Iyon nga lamang aniya ay depende pa rin ito sa magiging pag-uusap ng ASEAN member states.

”Depende ‘yan sa bawat bansa, siyempre may mga involved na bansa tulad ng China, iba pang miyembro ng ASEAN so depende kung papaano ang takbo ng pag-uusap,” ang sinabi ni Castro.

Layon ng panukalang code ang magtakda ng mga patakaran upang mapigilan na umigting ang sigalot sa South China Sea mula sa hindi na makontrol at lumalalang ‘major armed conflict’ na maaaring madamay ang Estados Unidos, kaanib ng Pilipinas at iba pang Asian countries na kontra sa Tsina.

Sa ngayon, inangkin na ng Tsina ang buong South China Sea, kabilang na ang mga lugar na hinahabol at inaangkin din ng Pilipinas Philippines, Vietnam, Indonesia, Malaysia, at Brunei. (Daris Jose)

Trade regulations, hindi dapat maging ‘hadlang’- PBBM

Posted on: May 28th, 2025 by @peoplesbalita No Comments

HINDI dapat maging hadlang o sagabal ang regulasyon sa kalakalan upang masiguro na ang ‘goods and services’ ay maayos na dumaloy.

”While regulations are certainly necessary, we must ensure that they do not become trade barriers. At the same time, ASEAN can begin looking into strategic trade management to equally ensure secure trade in our region,” ang sinabi ni Pangulong Ferdinand Marcos Jr., sa isinagawang ASEAN Leaders Interface with Representatives of ASEAN Business Advisory Council.

Aniya pa, kahit pa nananatili ang tensyon sa kalakalan at mga kawalan ng katiyakan sa patakaran, makatitiyak ang pribadong sektor ng tahimik na paglutas ng regional bloc para panindigan ang katatagan at palalimin pa ang economic cooperation.

”By ensuring that trade remains both open and secure, we aim to foster a more trusted and resilient economic environment within the region and beyond,” ang sinabi ni Pangulong Marcos.

Nananatili aniyang committed ang Pilipinas na makatrabaho ang ASEAN-BAC ”to build a future-ready ASEAN that is united in purpose, bold in vision, and inclusive in progress.”

Samantala, winika pa ng Pangulo na may pangangailangan na ipagpatuloy ang pamumuhunan sa mga tao dahil ang ‘digitally literate at adaptable workforce’ ang pundasyon para sa anumang pag-unlad.

Sinabi pa nito na ang AI Engagement Platform ay nag-aalok ng napapanahon at strategic approach sa digital governance sa iba’t ibang rehiyon.

”By fostering collaboration on responsible and inclusive AI, it ensures that technological advancements benefit all segments of society. We fully support this initiative and recognize its potential for a future ASEAN Centre of Excellence for AI, built on innovation, ethical standards, and transparency,” ang sinabi ni Pangulong Marcos. ( Daris Jose)

PBBM, tinukoy ang pangangailangan para sa ‘freedom of navigation’ sa South China Sea, Arabian Sea

Posted on: May 28th, 2025 by @peoplesbalita No Comments

BINIGYANG DIIN ni Pangulong Ferdinand Marcos Jr., araw ng Martes ang pangangailangan na tiyakin ang ‘freedom of navigation’ para magarantiya ang daloy ng komersiyo sa South China Sea at sa Arabian Sea.

“The South China Sea and the Arabian Sea cover vital seabeds that serve as lifelines for regional and international commerce in both our regions. As such, it is necessary to provide the freedom of navigation to guarantee unimpeded commerce and to protect the marine environment through compliance to established international law, specifically UNCLOS,” ang sinabi ni Pangulong Marcos sa idinaos na 2nd Association of Southeast Asian Nations (ASEAN) – Gulf Cooperation Council (GCC) Summit.

Ang summit aniya ay testamento ng ‘strong commitment’ ng Pilipinas sa isang nakabahaging pananaw ng kapayapaan, seguridad at tagumpay sa pagitan ng dalawang interconnected regions.

“The Philippines, as country coordinator for ASEAN-GCC relations, wishes to express its sincere appreciation to ASEAN and GCC in their counterparts for their valuable contribution and hard work for this summit,” ang winika ng Pangulo.

“Your Majesty, Your Highnesses, Excellencies, as we confront the challenges to peace and security in various regions of the world, we commend the GCC and its member states for their increasing involvement and endeavors in peacemaking and in peacebuilding,” ang sinabi pa rin ng Chief Executive.

Tinuran pa ng Pangulo na ang pagsisikap ay iniambag sa pagpapahusay ng ‘global security at katatagan sa pamamagitan ng ‘mediation, dayalogo, at diplomasya, na kinalaunan ay nagbunga ng ‘mapayapang kasunduan, prisoner exchanges, at family reunifications.’

Ayon pa sa Punong Ehekutibo, ang economic front, ang estratehikong kahalagahan ng ASEAN-GCC relations ay hindi maaaring ‘overstated.’

“We are two dynamic regions, rich in natural and human capital, bound by shared aspirations for prosperity and sustainable development,” ang sinabi ni Pangulong Marcos. ( Daris Jose)

PBBM nanawagan ng pagkakaisa sa ASEAN

Posted on: May 28th, 2025 by @peoplesbalita No Comments

NANAWAGAN si Pangulong Ferdinand Marcos Jr. ng pagkakaisa at pagtutulungan ng mga lider ng ASEAN para sa isang makatao, inklusibo, at tuluy-tuloy na pag-unlad sa kabila ng mga hamong kinakaharap ng rehiyon at ng buong mundo.

Sa kanyang talumpati sa plenary session ng ika-46th ASEAN Summit sa Malaysia, binigyang-diin ng Pangulo ang kahalagahan ng temang “Inclusivity and Sustainability” na dapat maramdaman ng lahat, lalo na ng mga karaniwang mamamayan.

Ayon kay Pangulong Marcos, hindi sapat na may pag-unlad kung may naiiwang sektor ng lipunan, gayundin ang pantay na oportunidad at tulong, lalo na sa panahon ng krisis gaya ng pagbabago ng klima, pandemya, at kahirapan.

Iginiit din ng Pangulo ang mahalagang gampanin ng kabataan sa kinabukasan ng ASEAN.

Sa Pilipinas pa lamang, higit 30 milyong kabataan ang itinuturing niyang susi sa pagbabago at sa pagpapaunlad ng rehiyon.

Kabilang din sa mga tinutukan ng talumpati ng Pangulo ang pangangailangan ng agarang legal na kasunduan para sa South China Sea upang mapanatili ang kapayapaan at maiwasan ang tensyon sa karagatan.

Kasabay nito hinikayat din ni Pangulong Marcos ang mas malawak na kooperasyon sa harap ng mga hamon sa klima, kalakalan, at seguridad, maging ang pagtiyak ng sapat at madaling ma-access na pondo para sa mga bansang apektado ng climate change.

Iginiit ng Pangulo na dapat patuloy na makipag-ugnayan ang ASEAN sa mga kaalyado, hindi lang upang palakasin ang ugnayan, kundi upang itaguyod ang tunay na diwa ng kapayapaan, pagkakaisa, at sabayang pag-unlad sa rehiyon. ( Daris Jose)

Traffic mitigation measures para maibsan ang inaasahang mabigat na daloy ng trapiko… Odd/Even Scheme ipatutupad ng MMDA sa EDSA

Posted on: May 28th, 2025 by @peoplesbalita No Comments

NAKATAKDANG ipatupad ng Metropolitan Manila Development Authority (MMDA) ang traffic mitigation measures para maibsan ang inaasahang mabigat na daloy ng trapiko sa muling pagsasaayos ng Epifanio Delos Santos Avenue (EDSA) na isasagawa ng Department of Public Works and Highways (DPWH).

Sa press briefing sa MMDA Communications and Command Center nitong Lunes kaugnay sa “EDSA Rebuild”, sinabi ni MMDA Chairman Atty. Romando Artes na inatasan sila ni Pangulong Ferdinand R. Marcos Jr. na magpatupad ng mga mitigating measures upang maiwasan ang “carmageddon” sa panahon ng EDSA rebuild project.

Sa ilalim ng odd-even scheme, ang mgasasakyang may plaka na nagtatapos sa odd number (1,3,5,7,9) ay hindi pinapayagang gumamit ng EDSA tuwing Lunes, Miyerkules, at Biyernes. Samantala, ang mga sasakyang may plaka na nagtatapos sa even na numero (2,4,6,8,0) ay ipinagbabawal na dumaan sa EDSA tuwing Martes, Huwebes, at Sabado.

“With the enforcement of the odd-even scheme, we are expecting a 40% reduction of vehicles along EDSA,” ani Artes na nilinaw ding ipatutupad pa rin ang number coding scheme sa ibang mga lansangan sa Metro Manila.

Bawal sa Edsa ang mga provincial bus at truck na may perishable goods, mga garbage truck, at mga aviation fuel delivery truck. Sila ay papayagang tumawid sa EDSA mula alas-10 ng gabi hanggang alas-5:00 ng umaga. Tatanggalin na rin sa EDSA ang mga bike lane separator.

Ipapatupad naman ng DOTr ang pagdaragdagang mga unit sa EDSA Bus Carousel system para hikayatin ang mas maraming tao na sumakay ng mga public utility bus; pagdaragdag ng mga tren sa MRT 3; at pagkatanggal ng mga toll fee sa ilang mga seksyon ng Skyway Stage 3, sa pakikipag-ugnayan sa Toll Regulatory Board at San Miguel Corporation. ( Daris Jose)